المصير المكتوب مرتين 🕰️✍️💔

البارت الرابع✨

الهدوء اللي سابوه وراهم في الكافيتريا فضل مالي أوضة حبيبه. لسه بتبص على صورتها في المراية، مبتسمة، كأنها بتشوف انعكاس يومها الحلو مع عمر.

​مسكت الموبايل وبدأت في مذاكرة مادة صعبة، لكن كل صفحة بتتقلب بترجع تفكر في آخر جملة قالها: "أنا مش محتاج دكتور، محتاجك أنتي وبس."

​وصلتها رسالة من عمر، كانت قصيرة: "صباح الورد يا حبيبه. بادئ يوم جديد بضحكتك في بالي."

​ابتسمت وكتبتله رد طويل، مليان حماس عن خططهم ليوم خروج جديد. ضغطت إرسال... وانتظرت.

​مرت عشر دقايق.

​الأمر غريب، عمر ما كانش بيتأخر أبداً في الرد بعد يوم زي ده. يمكن مشغول؟

​حاولت تنسى، ورجعت للمذاكرة، لكن كل نص ساعة كانت بتفتح الشات، بتلاقي علامة القراءة موجودة، لكن مفيش رد.

​"يا رب ما يكونش رجع تاني للدوامة دي..." همست لنفسها، وهي بتحاول تطمن قلبها اللي بدأ يدق بسرعة. الوقت لسة بدري، أكيد مشغول في مشوار عادي.

​لكن القلق بيكبر زي بقعة زيت في المية.

______

عمر كان واقف في مخزن مهجور بعيد عن المدينة. المكان مظلم وريحته تراب وقديم. كان باين عليه الغضب والتوتر.

​قدامه، واقف رامي، بنفس الابتسامة المريبة اللي بتخفي وراها تهديد.

​عمر: عايز إيه يا رامي؟ قلتلك أنا ماليش دعوة بالشغل ده تاني، وداخل أظبط أموري عشان هأخرج.

​رامي ضحك ضحكة باردة: "أنت شغال مع المافيا يا عمر، وإحنا مش بنلعب هنا. هو دخول الحمام زي خروجه؟ أنت واحد مننا خلاص، ومحدش بيسيب المافيا دي بمزاجه."

​عمر رفع صوته: "أنا مش واحد منكم! أنا عمر، وأنا اللي بقرر أمشي أمتى."

​رامي ميل رأسه بهدوء وقرب منه خطوة: "مين قال إننا هنسيبك تمشي؟ المهمة الجديدة دي صعبة، ومفيش غيرك يقدر عليها. هتجيب لنا البضاعة من المينا الجديدة، وإلا..."

​عمر (بنفاذ صبر): "وإلا إيه؟ هددتني قبل كده ومش خايف. أنا خلاص قفلت سكة الشغل ده."

​رامي وضع يده في جيبه وطلع صورتين. رمى واحدة على الأرض قدام عمر، والثانية مسكها في إيده.

​رامي: "اللي على الأرض دي صورة حبيبتك حبيبه... عارف مكان بيتها، وعارف إن قلبها متعلق بيك لحد الجنون. أنا عارف إنك مش خايف على نفسك. بس مستعد تخسر اللي بتحبهم؟"

​عمر اتجمد مكانه، وبص على صورة حبيبه المرمية على الأرض، الدم غلي في عروقه.

​عمر: "إياك تقرب منها! لو فكرت تلمسها بس..."

​رامي قاطعه وابتسم بخبث وهو بيبص على الصورة الثانية في إيده: "طب والصورة دي؟ دي بتاعت والدتك، ست طيبة باين عليها. تفتكر لو حطلها حد حاجة في الأكل أو العربية... هيكون شكلها إيه؟"

​عمر ما بقاش شايف قدامه، مسك رامي من هدومه بقوة جنونية: "أنت مجنون! انتم عارفين إني مش بألعب معاكوا، إبعدوا عن أهلي!"

​رامي بكل هدوء زق عمر، وابتسامته ما اختفتش: "اسمع يا عمر. المهمة دي تتنفذ الليلة، وتنسى حاجة اسمها خروج من المافيا. لو البضاعة ما وصلتش بكرة الصبح... مش هتلاقي لا حبيبه ولا أمك في مكانهم. فكر كويس."

​رامي ساب المخزن بسرعة، وعمر فضل واقف مكانه، ماسك الصورتين اللي وقعوا منه، التحدي اللي كان في عينه اتحول لخوف ووجع حقيقي.

______

الليل دخل بقسوة على حبيبه. كانت الساعة 12 بالليل، وهي لسه قاعدة على سريرها، والموبايل في إيديها.

​"آخر ظهور من 12 ساعة."

​قلبها كان بيدق بسرعة متعبة، بتفكر في كل كلمة قالتها سارة، وفي كل مرة كدب فيها عمر. هي حاولت تطمئن نفسها: يمكن تليفونه فصل شحن؟ يمكن نايم؟

​لكنها عارفة عمر. عارفة إنه ما بينامش من غير ما يطمنها.

​قررت تتصل.

​الهاتف رن مرة... مرتين... ثم جاء صوت آلي: "الهاتف الذي طلبته مغلق أو غير متاح حالياً."

​"مغلق؟" همست خوف. عمر عمره ما بيقفل موبايله.

​اتصلت تاني... وتالت... ونفس الصوت.

​دموعها بدأت تنزل، دموع خوف حقيقي المرة دي، مش دموع زعل عادية. قامت فتحت الشباك وبصت على الشارع المظلم.

​حبيبه (همست بوجع): "يا عمر، أنت وعدتني... يا رب يكون كويس، يا رب ما تكونش السكة دي كسبت المرة دي."

​فتحت دفترها وكتبت بيديها المرتعشتين: "فاضل 15 يوم على وعده... بس ليه الإحساس ده بيقولي إن الوعد اتكسر قبل ما يبدأ؟"

​نهاية البارت الرابع....

....... يتبع🦋

بـقـلـم الكاتبة: حـبـيـبـه مـحـمـد✍🏻♥