المصير المكتوب مرتين 🕰️✍️💔

البارت الثالث ✨

يوم جديد.. وضحكتك احلى من الشمس"

​الصبح كان بيبدأ بهدوء، بس جوه قلب حبيبه كان في دق خفيف كأنه موسيقى.

الساعة كانت 6 ونص، وهي صحيت بدري لأول مرة من فترة، مش قادرة تمنع نفسها من الابتسامة وهي بتفتكر إنها هتشوف عمر النهارده.

قامت من السرير، دخلت الحمام، وبعدها بدأت تجهز نفسها.

​وقفت قدام الدولاب، بتحاول تختار لبس بسيط بس حلو.

مسكت فستان كريمي ناعم عليه ورد صغير، لما لبسته حست كأن النهار بقى أنور.

جمعت شعرها نص لمة، وحطت لمسة بسيطة من الروج.

بصت في المراية وقالت بخجل:

"هو أكيد هيبص عليا كده ويقول إيه الجمال ده؟"

-----

​وفي نفس الوقت، عمر كان واقف قدام المراية في أوضته، لابس قميص أبيض وبنطلون جينز غامق، بيرش برفانه المفضل.

ابتسم وقال لنفسه:

"أول مرة هنخرج كده بعد كل اللي حصل... لازم يكون يوم حلو، ليها وليا."

​فتح الموبايل، وبعت لها:

عمر: "صحيتي يا كسولة؟"

حبيبه: "صحيت من بدري 😌"

عمر: "ما شاء الله، مين دي؟ ولا انتي صحيتي عشان تشوفيني؟ 😏"

حبيبه: "ما تفرحش في نفسك أوي 😂"

عمر: "يلا، أنا نازل أهو. قدامي نص ساعة وهأكون عندك."

------

​نزلت حبيبه، والدنيا كانت لسه بتفوق. الهوا الصبح ريحته مختلفة، خفيفة ومليانة طاقة.

وصل عمر بعربيته، ولما شافها واقفة مستنياه، الوقت وقف لحظة.

ابتسامتها كانت كفاية تخليه ينسى كل التعب اللي جواه.

​عمر فتح لها الباب وهو بيقول بخفة:

"مين دي الجميلة دي؟ أكيد مش حبيبتي."

حبيبه ضحكت وقالت: "ابقى شوف لك دكتور، بتتهيألك حاجات كتير اليومين دول 😌"

عمر بابتسامة واسعة: "أنا مش محتاج دكتور، محتاجك انتي وبس."

-----

​أول مكان راحوه كان الممشى الطويل على النيل.

كانوا ماشيين جنب بعض، والشمس لسه طالعة بلونها الدهبي.

حبيبه كانت ماسكة كوباية عصير، وهو بيبص لها كل شوية من غير ما يقصد.

حبيبه بخجل: "مالك بتبص لي كده ليه؟"

عمر: "بستمتع بالمنظر."

حبيبه: "المنظر يعني أنا؟"

عمر: "هو فيه أجمل منك هنا؟"

حبيبه ​ضحكت بخجل، وكملوا مشيهم وسط الناس.

وبعدين قال لها عمر:

"تعالي نروح الملاهي شوية، نفسي أشوفك وانتي بتضحكي من قلبك."

حبيبه قالت: "أنا مبخافش، بس لو مرجيحة وقعت بيا... هيبقى ذنبك."

عمر ضحك وقال: "ما تخافيش لو وقعت، هأقع وراكي."

------

​في الملاهي 🎡

​ركبوا المرجيحة الكبيرة، وحبيبه كانت بتصرخ وتضحك في نفس الوقت، شعرها بيطير والضحكة طالعة من قلبها.

عمر كان بيبص لها وهو بيضحك:

"ياااه، كنت محتاج أشوف الضحكة دي."

حبيبه وهي لسه بتتنفس بصعوبة: "ضحكة خوف مش فرح."

عمر: "حتى خوفك حلو."

​نزلوا من المرجيحة، وراحوا ياكلوا آيس كريم، عمر اختار لها الشكولاتة لأنها بتحبها، واشترى لها وردة حمرا صغيرة من البائع اللي في الملاهي.

عمر: "دي مش وردة، دي تذكرة ليومنا الحلو."

حبيبه بخجل: "ده أول ورد تجيبه لي."

عمر: "بس مش آخر واحد."

------

​راحوا بعدها المول، يتمشوا شوية، ويضحكوا على لبس غريب شافوه في الفاترينة، وبعدها دخلوا كافيه صغير فيه موسيقى هادية.

طلبوا عصير وفطير، وقعدوا يتكلموا عن حاجات بسيطة جداً - عن ذكرياتهم، عن خوفهم من المستقبل، وعن قد إيه كل واحد فيهم اتغير.

​ عمر وهو بيبص لها:

"عارفة يا حبيبه... من غيرك، الدنيا شكلها باهت."

حبيبه بهدوء: "بس أنت وعدتني إنك هتغيرها، فاكر؟"

عمر: "فاكر، ولسه على وعدي."

​الوقت عدى بسرعة، والشمس بدأت تغيب.

-----

راحوا في الآخر على الكافيتريا اللي متعودين يروحوها، المكان اللي بدأ منه كل حاجة.

قعدوا على نفس الترابيزة، نفس الكراسي، حتى الجرسون هو هو.

بصت له وقالت بابتسامة:

"غريبة الدنيا، بنرجع دايماً لنفس المكان."

عمر: "يمكن علشان هنا أول مرة حسيت إنك ليا."

حبيبه اتكسفت وقالت: "لسه مصدق الكلام ده؟"

عمر: "ده الأمل الوحيد اللي مش عايز أفقده."

​قعدوا يتكلموا ساعات، لحد ما الليل دخل بهدوء، والمكان بقى شبه فاضي.

سكتوا شوية، وكل واحد فيهم كان عايز اللحظة دي ما تخلصش أبداً.

​رجعها عمر لنفس المكان، وقف قدام الباب وقال بابتسامة:

"يوم حلو مش كفاية عليه كلمة حلو."

حبيبه بخجل: "عشان كنت معايا."

عمر: "ولسه هنعيش أيام أحلى."

ودّعها ومشي.

-----

​بعد نص ساعة، وهي في أوضتها، الموبايل رن.

عمر: "وصلتي؟"

حبيبه: "آه، وصلت الحمد لله، وأنت؟"

عمر: "لسه داخل البيت دلوقتي."

حبيبه: "خلاص ريّح بقى، اليوم كان طويل."

عمر: "طويل؟ ده أحلى يوم في حياتي."

حبيبه ضحكت وقالت: "كفاية كلام حلو بقى."

عمر: "تعرفي إنك وحشتيني أوووي... ولسه سايبك من نص ساعة؟"

حبيبه (بخجل): "غريب إزاي بوحشك وإحنا لسه سايبين بعض من شوية."

عمر: "يمكن علشان وجودك بيهديني."

حبيبه سكتت شوية وقالت: "طيب نام دلوقتي، بكرة يوم جديد."

عمر رد بابتسامة باينة في صوته: "نامي انتي الأول، أنا مش هأقفل غير لما أتأكد إنك نايمة."

حبيبه بخجل: "طب أنا خلاص هغمّض عيني."

عمر: "تصبحي على خير يا أجمل حاجة في يومي."

حبيبه: "وأنا من غيرك اليوم ما لوش طعم... تصبح على خير يا حبيبي."

​قفلوا الموبايل، وكل واحد فيهم نام وابتسامة صغيرة على وشه، كأن الليل نفسه بيحسدهم على السلام اللي بينهم.

​نهاية البارت الثالث....

.... يُتبع🦋

بـقـلـم الكاتبة: حـبـيـبـه مـحـمـد✍🏻♥