المصير المكتوب مرتين 🕰️✍️💔

الفصل الأول ✨

في الكافيتريا ☕

​عمر: وحشتيني.

حبيبه: كل ده يا عمر؟ بقالي كتير مستنياك.

عمر: بس أنا متأخرتش بقى! انتي عايزة تعملي مشكلة ولا إيه؟

حبيبه: أنا برضه اللي عايزة أعمل مشكلة؟

عمر: خلاص بقى فكك.

حبيبه: تمام.

عمر: طب إيه بقى؟

حبيبه: إيه؟

عمر: على فكرة أنا قلت لك "وحشتيني".

حبيبه: سمعتك.

عمر: إيه الرخامة دي يا بت انتي!

حبيبه: كنت فين إمبارح؟

عمر: إيه رأيك نطلب حاجة نشربها؟ تحبي تشربي إيه؟

حبيبه: بأقول لك كنت فين إمبارح؟

عمر: هأكون فين يعني؟ أنا إمبارح كنت في البيت أصلاً مطلعتش منه.

حبيبه: كدّاب يا عمر.

عمر: لا أبداً، حتى اسألي كريم كان عندي إمبارح.

حبيبه: مش هأسأل حد.

عمر: تمام، براحتك.

حبيبه: احلف كده.

عمر: هو فيه إيه يا حبيبه؟ هو انتي عايزة تتخنقي يعني؟

حبيبه: لا مش عايزة أتخنق ولا حاجة.

عمر: أمال إيه بقى؟

حبيبه: بص بقى، لو فضلت كده كتير ومتعَدلتش يا عمر، يبقى نِنهي كل حاجة.

عمر: قولي بقى إنك عايزة نسيب بعض، عشان كده جبتيني النهارده.

حبيبه: لا أنا مجبتكش عشان كده.

عمر: لا هي عشان كده.

حبيبه: تمام، فكّر على مزاجك. بس اعمل حسابك يا أنا يا السكة اللي أنت ماشي فيها........ خلصت كلامها وقامت ماشية.

عمر: حبيبه! حبيبه استني......(في نفسه) يا ربي أعمل إيه مع المصيبة دي دلوقتي؟ وحياة أمي لأوريك!

------

​في بيت عمر

​أم عمر: مالك يا حبيبي في إيه؟

عمر: مفيش. كريم لسه جوة؟

أم عمر: آه.

عمر: تمام، أنا داخل أشوفه.

-----

​..... في الأوضة.....

عمر: أمال إيه "نايم" دي؟

كريم: إيه مالك يا عم؟

عمر: اتخنقت منك. هو إيه بيتي فندق وأنا معرفش؟

كريم: أنا قاعد عند خالتي أنت مالك؟..... في إيه؟ حصل حاجة بينك أنتِ وحبيبه ولا إيه؟

عمر: وأنت بتسأل ليه؟ وبعدين أنت عرفت إزاي إني شوفت حبيبه؟

كريم: أحم... أصلاً أنت مش بتبقى كده غير لما بتشوف حبيبه.

عمر: تعرف أنا هاموت وأعرف مين الحيوان اللي قال لحبيبه؟

كريم بتوتر: أحم.... على إيه؟ أنا مش فاهم حاجة.

عمر: أنت هتستعبط يلاااا!...... قام مسك فيه من هدومه.

كريم: اهدى طيب، والله أنا عملت كده عشان خايف عليك.

عمر: خايف عليا تروح قايل لحبيبه؟ انت اتجننت؟ أدينا هنسيب بعض بسببك.

كريم: اهدى طيب وسيب كده واقعد خلينا نتكلم.

عمر: أديني اتنيلت قعدت.

كريم: قولي بقى هتعمل إيه دلوقتي؟

عمر: هأعمل إيه يعني؟ مش هأعمل حاجة.

كريم: يعني كده خلاص هتسيب حبيبه؟

عمر: مستحيل ده يحصل. أنا ما أقدرش من غيرها.

كريم: طب حلو! ده معناه كده إنك هتبطل السكة اللي ماشي فيها؟

عمر: لا برضه.

كريم: وده إزاي بقى؟ حبيبه مش هتقبل حاجة زي كده، وهتقولك يا أنا يا الشغل ده.

عمر: سهلة جداً، هأقول لها: انتي.

كريم: يعني هتضحك عليها؟ وهو كده براءة صح

عمر: عايزني أعمل إيه يعني؟

كريم: تبطّل.

عمر: مش هأعرف. هو أنت فاكر الموضوع سهل؟ ما أنا عملتها قبل كده، وفي الآخر كنت هأخسر أغلى اتنين في حياتي، وأنا مش هأسمح لحد ييجي جنبهم طول ما أنا عايش.

كريم: عمر ما تخفش، كل حاجة وليها حل، ومحدش هيقدر ييجي جنبهم أكيد. وبعدين أنت كده ممكن يحصل لك حاجة، ووقتها هتسيب أمك لمين؟ طب حبيبه هتعمل إيه من غيرك؟

عمر: أنت ليه مفكر كل حاجة بالبساطة دي؟ المشكلة بقى إني دخلت فيها برجلي ومش هأعرف أخرج زي ما دخلت.

​عمر قعد على طرف السرير وهو ماسك دماغه بإيده: الموضوع مش بسيط يا كريم… أنا مش بألعب، أنا عارف أنا ماشي فين… والرجوع منه مش بالساهل.

​كريم قرب منه وقال بهدوء: بس يا عمر أنت اللي هتخسر… مش أي حد تاني. حبيبه بتحبك، وأمك مالهاش غيرك. الناس اللي حواليك مش فارق معاهم لو وقعت، هما عايزين مصلحتهم وبس.

​عمر رفع عينه له بنظرة كلها تحدي: أنا عمر يا كريم… عمري ما حد قدر يسيطر عليا ولا هيسيبني أمشي زي العيل الصغير. اللي دخلته برجلي هأكمل فيه برجلي. لكن برضه مش هأفرط في حبيبه. فاهم؟

​كريم تنهد: يعني عايز تمسك العصاية من النص؟

​عمر: بالظبط.

​كريم: ده مش هينفع، يا عمر… أنت عارف كده.

​قبل ما يكملوا الكلام، صوت أم عمر جه من برة وهي بتخبط على الباب: يلا يا ولاد العشا جاهز… تعالوا بسرعة قبل ما يبرد.

​عمر وقف وقال: قوم… خلينا ننزل، مش ناقصني وجع دماغ من ماما كمان.

​نزلوا الاتنين على السفرة. أم عمر كانت قاعدة وبتحط الأكل:

​أم عمر: تعال يا عمر، تعال يا كريم… كلوا بالهنا والشفا.

​عمر حاول يضحك ويغيّر الجو: تسلم إيدك يا أمي… ريحة الأكل تجنن.

​أمه بصت له بتركيز: أنت كويس يا ابني؟ شكلك تعبان ومتوتر.

​عمر: لا يا أمي… مفيش، شوية صداع بس.

​قعدوا ياكلوا، لكن عقل عمر ما كانش هنا… كل لقمة بتنزل تقيلة كأنها حجر. صورة حبيبه وهي بتسيبه في الكافيتريا مش راضية تسيب دماغه.

​بعد العشا، طلع أوضته تاني، مسك تليفونه، فتح الشات بتاع حبيبه…

كتب: "معلش… أنا آسف. ممكن نتقابل بكرة؟"

فضل يبص على الشاشة منتظر الرد، قلبه بيدق بسرعة.

​لكن عدت دقيقة… اتنين… عشرة.

مفيش رد.

​رمى الموبايل على السرير وهو متضايق: يعني كده يا حبيبه؟… هتسيبيني؟ لا والله… انتي بتلعبي مع مين؟

​وقف قدام المراية، بص في عينه وقال لنفسه: أنا عمر… أنا اللي محدش يقدر ياخد مني اللي بأحبه. بس المرة دي لازم ألاقي حل… يا أنا يا الدنيا كلها.

-----

​في بيت حبيبه

​كانت قاعدة في أوضتها، ماسكة الموبايل وباصة في الشاشة اللي ظهر فيها اسم "عمر".

رسالة قصيرة قدامها: "معلش… أنا آسف. ممكن نتقابل بكرة؟"

​دمعة صغيرة نزلت من عينها وهي بتهمس: قد إيه بأحبك يا عمر… بس أنا مش قادرة أعيش الخوف ده كل يوم. يا أنا… يا السكة اللي في دماغك.

​دخلت أختها سارة وهي شايلة كوباية عصير.

​سارة: مالك يا حبيبه؟ وشك مش عاجبني.

​حبيبه: مفيش يا حبيبتي… شوية صداع بس.

​مسحت دموعها بسرعة وحطت الموبايل بعيد، لكن قلبها بيرتعش.

بصت من الشباك للشارع المظلم وقالت في سرها: يا ترى يا عمر… هتختارني أنا؟ ولا السكة اللي ماشية فيها دماغك دي؟

​"كل حكاية بتبدأ بنقطة.. بس حكايتنا النقطة بتاعتها كانت النهاية. ⏳✨

​نهاية البارت الأول....

يُتبع🦋

بـقـلـم الكاتبة: حـبـيـبـه مـحـمـد✍🏻♥