تَوْق

أرجو أنّ تصب عليّ الطمأنينة صبًا،

وأن تجبُر قلبي 

 بِكل دعاء لا يعلمهُ أحدٌ سواك

وألا تجعلني أسير في طريق

نهايتهِ خيبةً ليّ يا ربّ.

تنويه:لما تكون الجزئيه بين امير وهادي بتكون بلغة الأشاره دائمًا

     _____________________________

نزلت من السيارة واحس اني متوتر..شدعوه؟ لي سنين فيها بس مسوي وضعيه الطالب المنتقل

فجاءه طلع الحارس بوجهي وقاعد يعطيني نظرات ..شكله اخذ تهزيئه من المدير عقب ما طلعنا ذاك اليوم!

مشيت اتجاهه وقلت بتعذر" معليش ياعم اعتذر اذا سويت لك مشكلة بس والله اني دعيت لك كثير"

هدأت حده نظراتها وارتسمت ابتسامه لطيفة على وجهه وقال بلطف: ماعليه ياولدي اهم شي الوالده بخير؟

" لا تنساها من دعواتك!"

قلتها بنبره فيها غصه مع اني حاولت اخفيها!

مشيت متعديه ورحت متوجهه للسكن..اكيد انهم مجتمعين بشقه ادهم ويوسف بطب عليهم

رقيت الدرج لأن المصعد خربان..وقته هو؟ لازم ارقى ست ادوار!

سحبت شنطتي وقعدت ارقى الدرج وفجاءه طلع بوجهي تركي

" هلا والله!"

فز منخرش لأني صرخت فجاءه وجاء يسلم علي 

" جابك الله! بالله شل الشنطة عني"

ناظر لي وهو عاقد حواجبه: وشدخلني فيك؟ بعدين انت جيت بدون شنطة من وين جبت ذي

ضحكت بتورط" قمر حطت لي العفش كله هنا! مع اني قلت مايحتاج "

مشى متعديني وهو يقول: والله مشكلتك شلها انت 

"ماش مامنك فايده"

كملت ارقى لين وصلت الدور الثالث وذي المره انا اللي انخرشت بسبب ياسر اللي طلع بوجهي فجاءة

"الله يخرش عدوك"

تقدمت وانا اسلم عليه واول مابعدت قلت"بالله شيل ذي عني تعبت"

نطق بتورط: استاذ الفيزياء يبيني!

وراح بدون مايسمع ردي! وش الكذبه الواضحة ذي؟ اجل في استاذ يبي طالب بالليل؟

"مالت عليك"

قعدت ارقى وانا اسحب الشنطه..قلوبهم مافيها رحمه؟ راجع من سفر مفروض يتسابقون مين يخدمني!

قاطع هواجيسي مهند اللي حضني فجاءه وهو يسلم ويسأل عن امي ..وفجاءه سحب الشنطة

" مهند تدري اني احبك؟"

ابتسم وقال بثقه: ادري

ضحكت ثم بديت اتحلطم" تخيل لا تركي ولا ياسر جو يساعدوني كلهم صرفوني يرضيك؟"

نطق بعصبيه مُزيفة: اكيد ما يرضيني! اوريك فيهم

"مهند عادي توصلها لغرفتي؟ "

قلتها وانا امد المفتاح له

جاوبني : اكيد عادي بس وين بتروح؟

"بروح لأدهم ويوسف! واكيد آسر هناك صح؟"

اومأ وقال: ايه وبنتعشى هناك نفس دايم بس العيال عندهم شغلات يسوونها طلعوا وبيرجعون شوي

افترقنا هو كمل يرقى للدور الثامن وانا رايح لسادس واحس اني اوقح شخص بالدنيا مفروض ارقيّ معه

وصلت لشقتهم ودقيت الباب بعد ثواني قليله فتح آسر الباب اول ماشافني رحبّ فيني وقعد يسلم 

ناظرت حول الشقة بفضول"وين يوسف وادهم؟"

تنهد آسر وقال بضيق: متهاوشين وحالفين ما يجتمعون بشقه وحده! سألناهم ورافضين يقولون وش السبب..والحين رايحين للمسؤول عن السكن يقنعونه يفرقهم!

" اعوذ بالله غبت يومين وصارت مصايب! عز الله عين ما صلت على النبي خربت صداقتهم!"

ضحك آسر بقوه وقال : اي صداقه الله يصلحك؟ من اول يوم جاء يوسف وعلاقتهم سيئة!

" مابعد الكره الا محبة"

قلتها بثقه

آسر ضحك وقال: اتمنى!

قاطع كلامنا دقّ الباب رحت افتحه الا هو مهند ..اول ما شفته قعدت اتشكره لين طفش وقال : ياخي حسستني اني مسوي انجاز! ترا كله شنطة

ضحكت بدون مارد عليه 

دق الباب مره ثانية ورحت افتحه وما كانوا الا ادهم ويوسف..قعدوا يتدفدفون من يدخل اول ..كانت هوشتهم نظرات بس بدون كلام 

اول مره ادري ان يوسف كذا..متعود على ادهم بس خذلك طلع منه اثنين !

جلست انا ومهند وآسر وهم للحينهم مادخلوا ..فجاءه احد دفهم من ورا وطاحوا

الكل دخل بنوبه ضحك هستيرية الا هم كانوا عاقدين حواجبهم ويوسف كاتم ضحكته بس عشان الهيبه!

تكلم تركي اللي دفهم: ساعه اقولكم ابعدو بدخل

كمل : جهزوا السفرة اصيل بيجي الحين

راح مهند للمطبخ واستحيت على نفسي وقلت "اجلس بس ريّح ! تركي يجهزها"

نطق تركي باعتراض: وليش ماتجهزها انت؟

" انا راجع من السفر ومافيني حيل"

قعدنا نتهاوش مين يجيب السفرة لين قام مهند وجابها بنفسه، بعد دقائق دخل ياسر وخلفه اصيل الي كان يحمل كراتين البيتزا

"هلا بالحامل والمحمول!"

قلتها مُرحب ب اصيل 

نطق ياسر بزعل مُتنصع: وانا محد رحبّ فيني!

" انت الأساس والله"

قلتها تسليك بس ياسر من النوع اللي يرضى بسرعه...ابتسم وقال:ادري!

لفيت على يوسف وادهم عشان اناديهم وكان ادهم يشمق ليوسف والثاني يبتسم عشان يستفزه! 

"ياخي اعقلوا بزارين انتو؟ ويوسف لا تحط عقلك بعقله؟"

توسعت عيون ادهم من اللي قلته وقال بانفعال: لا تحط عقلك بعقله! وش شايفني بزر يوم تقول كذا؟

يوسف كان يرفع حواجبه عساس يقهره 

نطقت بتورط" اقصد ان عقله صغير وانت ما شاء الله اكبر من عمرك!

ضحكوا على تبريري الغبي بس وش اسوي ذا اول شيء جاء ببالي

آخر شيء هاوشهم مهند وسكتوا وجلسوا يتعشون ..بقت آخر قطعة ومسكوها بنفس الوقت..يالله الحين مستحيل يفكونها

قال مهند وهو يحاول يحل المشكلة التافهه: يالله اقطعها نص بينكم

نطقوا بنفس الوقت:لا

"يالليل"

قلتها وانا انسدح بعد تخمه العشاء 

خلصنا عشاء والكل منشغل بشيء وانا ماعندي شغله قلت اتفرج على اللي عندي واشوف من بياخذ آخر قطعه!

ماكانوا يسحبونها من بعض لا..كانوا ماسكينها بس! خايفين تنقطع وتتقسم!

وفجاءه تركوها بنفس الوقت، نطق يوسف: خذها

مدها ادهم له وهو يقول: والله ما ياكلها الا انت

غريبين ذولا ..غصب يطلعون من اي شيء مشكلة!

قعدوا يتعازمون عليها وفجاءه سحبها تركي واكلها وهو يقول: ما صارت ترا كلها بيتزا!

صرخ ادهم: خير كانت بخاطري!

فجاءه شرق تركي وقعد يكحكح ، قام مهند وعطاه مويا يشرب 

ومدّ اصيل مويه ادهم وقال: خذ غساله

اما يوسف الي تكلم بخرشه: الحمدلله اني ما اكلتها

ضحك تركي وهو يرجع مويه ادهم بدون ما يشربها:ماله دخل..انا جتني الضحكه وغصيت!

رد ادهم عليهم بعصبيه:شدعوه حسستوني ان عيني حاره!

تكلم يوسف اللي كان يشيل السفره: شرايكم تروحون تنامون؟

"افا طرده يعني؟"

ضحك وقال:تقدر تقول

    _________________________________

طردتهم متعمد عشان ابي اتفاهم مع ادهم!

ماحب احد ينام وهو زعلان مني..جلست قباله وقلت" ادهم "

هز رأسه بمعنى كمل

تنهدت بعمق وقلت" الحين ليش مصرّ تسمع التسجيل؟"

ردّ وهو ينظر بحده: ابي اسمعه

" ادري انك تبي! بس ليه؟"

عدّل جلسته وقال: اسمعني زين.. المدير يصير ابو بارق

قاطعته بفضول"مين بارق ذا بعد؟"

ردّ علي:رئيس الشله ذيك

ضحكت باستهزاء" اما رئيس..عصابه وانا مدري؟"

ضحك ادهم بسخريه: عصابه مُصغره حدهم المدرسة..المهم انهم اخطر ناس بالمدرسة وشكله بيحطك براسه!

صمت للحظه وهو ينظر للأسفل 

ثم كمل: آخر طالب تنمر عليه انتحر!

توسعت عيوني بصدمه وقلت "كيف ووين الناس وليش ما تعاقب!"

نطق ادهم بقهر: ابوه غطى عنه!

سكت لثوانً وكمل: عشان كذا نبي اي دليل عشان يتوقف ومايصير المدير لأنه من جاء والمدرسة وضعها سيء والتنمر زايد!

 " يالله! كان قلتي لي من البدايه"

قلتها مُعاتب 

تابعت كلامي بفضول" ووش السبب اللي خلاه ينتحر؟"

ردّ علي بضيق: طلعوا عنه اشائعات انه شاذ! والكلب مسوي صور فوتشوب****

توسعت عيوني بصدمه من اللي قاله! 

"كيف؟" 

قلتها بارتجاف 

تابع كلامه بقهر: وتخيل ان الصور وصلت لأهله! وتبروا منه ومحد صدقه..بعد ما انتحر بانت الحقيقة واعترف اللي سوا الصور ..عقب وش!

مسكت رأسي بضيق من هول اللي سمعته..ماتوقعت هالشيء يكون موجود فعلًا! انا عرفت عن هالفئة من البشر من عمي صالح..بس توقعت انهم ما عادهم موجودين!

تكلم ادهم بهدوء: فهمتني؟ الحين خلني اسمع التسجيل عشان نقدر نشتكي عليه

"وكيف بنشتكي؟"

جاوبني: بكلم عمي..اصلًا هو قايل لي حاول تطلع اي دليل يمدينا نستفيد منه!

طلعت جوالي من جيبي ودخلت عالألبوم وقبل ما اشغله قلت" توعدني ما تسألني اي سؤال عن اللي بالتسجيل؟"

اومأ بتردد: اوعدك

تنهدت وشغلته وبداخلي شعور غريب! اذكر أول شخص عرف اني مجهول هويه نبذني ومن بعده صرت استحاله اعلم احد هذا الشيء خوفًا من نظرته لي تتغير! وأمر بكل ذا لذنب مو ذنبي..كيف عرفوا اني ابن حرام ؟ يمكن اصلًا امي وابوي متزوجين اصلًا..يمكني ضعت؟ او انخطفت؟ 

بالنهايه مستحيل احد يتخلى عن ضناه

التسجيل كان مدته أربع دقائق..كنت اراقب تعابير ادهم اللي كانت تتغير تدريجيًا للغضب، وبعد ما انتهى المقطع ناظرني وقال بصوت حاد: ارسله لي الان!

ناظرته بشك انه ما سألني "ما ودك تعرف؟"

مدري وش وضعي توني قايل له لا تسأل!

تنهد وردّ بهدوء: وعدتك ما أسال..وبـ اي وقت تبي تتكلم بسمع لك!

ابتسمت بامتنان له وارسلت له المقطع 

اول ما وصلت له الرساله، قال: لا تشيل هم! موضوع التبن ذا عندي

" ياخي ما ادري كيف اشكرك!"

قلتها وانا اتقدم ابي احب راسه..تراجع للوراء وقال :شدعوه

كمل كلامه وبصوته نبره ندم:اعتبرها طريقتي بالأعتذار!

ابتسمت دون مارد ورحت اخذ قرآني وطلعت عشان اقرأ وردي اليومي

       ____________________________

اتصلت على عمي مُتجاهل تأخر الوقت..رد علي بصوت ثقيل ..شكله كان نايم وازعجته!

"لقيت دليل يفيدنا بخصوص المدير التبن!"

ردّ فورًا:ارسله الأن

اغلقت الأتصال وارسلت الدليل له

بعدها طلعت للمقلط ولقيت يوسف يقرأ قران..جلست جنبه وقلت بعد مانهى الآيه"انت حافظ القران؟"

جاوبني مبتسم:الحمدلله

"ودي احفظه! تساعدني؟"

قلتها بحماس واضح 

اتسعت ابتسامته واجابني: ابشر! ماطلبت شيء..

قعدنا نقرأ سوا وكان يفسر لي الآيات اللي غير مفهومه لي 

حاليًا يوسف قدوتي..اتمنى اكون نفسه بكل شيء

انا قررت اثق فيه ومتاكد ماراح اندم..لأنه يجتهد دائما يكون قريب من الله

واي شخص يجتهد عشان يبي علاقه عميقه مع الله اكيد بيكون شخص جيد لغيره!

ذي قناعتي وانا واثق تمامًا من صحتها..

       ______________________________

متكور حول نفسي والهواجيس لعبت فيني..معقول بيجيبهم؟ ويخيرني بينهم؟ 

طيب مين بختار؟

يوسف؟

اياد؟

 ما اقدر اضحيّ بواحد عشان الثاني..كلهم قريبين لقلبي!

رفعت رأسي بنظرات كارهه للي جالس قدامي 

نطقت بارتجاف"اقدر اكون بدالهم؟"

عقدّ حاجبه بعدم فهم لكلامي..تكلمت بصوت يكاد يُسمع" اموت انا ويعيشون هم!"

احتدت ملامحه وصرخ بسبب غضبه من كلامي..ارعبني لدرجه غطيت اذني وغمضت عيوني لعلي اخفف من خوفي! نطق بنبره عالية: ما هموني ..اقتلهم اثنينهم وتبقى انت!

هزيت رأسي برفض للي قاله وجسمي يرتجف وماني قادر اتحكم بنفسي..مسكني عِصام وهو يحاول يوقفني من النوبة اللي دخلت فيها..ماغابت عني نظرته الساخرة وابتسامته..وكانه مستمتع وهو يشوفني كذا؟

نطق باستهزاء: ليش تهتم فيهم؟ انت تعاني هنا وهم مستمتعين بحياتهم ولا فكروا فيك! تحسب فيه احد ينتظرك برا ؟ او يدور عنك؟ اصحى من احلامك ترا انت مالك اهميه بالحياة!..دورك بالحياة انك تكون هنا لين اقتلك

انهى جملته بعد ما دفعني بقوه عالأرض ..تركني مصدوم من اللي قاله

معقول تركوني؟

شعرت لوهله بالكُره لهم ..هزيت رأسي برفض لذي المشاعر ما ابيها تتحكم فيني عِصام اكيد يبيني اكرهم..مستحيل اوصله لغايته

مستحيل يتركوني ..لأنهم وعدوني!

     ____________________________

منسدح على سريري وانا اتذكر تفاصيل ذاك اليوم..كنا متعايشين مع فكره ان اياد توفي، بعد ما طعنته عشان نفتك من غثاه

بذيك الفترة لاحظت ان عمي عبدالله كان يتردد للمستشفى كثير ..ماكنت ادري انه انقذه

ويوم عرفت؟ اختفى الولد فجاءه

دورت عنه بكل مكان وكأن الأرض انشقت وبلعته..اللي مايعرفه جدي وعماني اني قد طعنته!

عرفوا انه عايش من ولد عمي اللي شاف اسمه بملفات المستشفى وكانت آخر زياره له بعد اليوم اللي كنا نظن انه مات فيه

والجثه؟ بعد ماطعنته حرقت البيت وبعد ماتفحم قلت لهم ان البيت احترق واياد كان فيه! 

مالقينا جثته وافترضنا انها تفحمت 

ماسويت هالشيء الا لسبب..كان اياسي يحبه اكثر مني! يسولف معه وانا مثل الجدار..عشان كذا طعنته

سويت اللي علي وحذرته قبل عشان يبعد عن اياسي.. بس هو السبب باللي صار..لو انه سامع كلامي ما كان صار كل ذا!

بالنهايه بلاقيه..وبلبيّ رغبه جدي!

حتى ولو ما كانت رغبته موت اياد ..الا بسبب عاداتهم الغبية 

بالنهايه راح اتخلص منه لأسبابي الخاصة

       ___________________________

جالس افطر وعيوني تفتح وتغمض ..للحين ما شبعت نوم، رش هادي علي مويا وقال بإشاره: صحصح

اخذت كوب المويا اللي جنبي وكبيته كامل عليه وانا ارفع حواجبي بإستفزاز له 

احتدت ملامحه يقاله معصب بس ماش مو لايق عليه العصبيه!..تكلم بإشاره: الحين من وين لي ثوب؟

رفعت اكتافي بمدري..شمق لي وراح لدولابه يطلع له ثوب..ماكبيت عليه الا وانا متأكد ان عنده غيره! 

بس هو يحب يهولّ الأمور

طلع ثوبه وفجاءه رماه علي! قال بعصبيه: الثوب فيه مويا كيف البسه؟

"وشدخلني؟"

قلتها وانا ارميه عليه بينما هو اخذه ولبس الثوب 

طلعنا من الغرفة متوجهين للفصل وانا ادعي ربي يعديّ هاليوم على خير!

ما امداني ادعي الا بارق طالع بوجهي ..كان يتكلم بس مدري وش يقول! ويحرك يده بشكل غير مفهوم على اساس يتكلم بالأشارة..وبين كل حركه وحركه يصبع!

هالحمار يحسبني مانتبهت؟ 

جيت بتضارب معه وفجاءه وقفني هادي وهو ماسك بيدي ومشى متعدي بارق

هادي مو ضعيف شخصيه..بالعكس شخصيته اقوى مني بكثير! مُتزن وما يغلط بحق احد وصبور

هو ساكت عن بارق بس لأنه بيوم كان صديقه

وصلنا الفصل وجلست بمكاني..آخر شي بالزاويه وجنبي هادي اللي كان يقرأ روايه

حطيت راسي على الطاوله..بنام لي دقايق عشان اخزن طاقتي لليوم

مامداني اغمض عيني الا هزني هادي رفعت راسي وشفت استاذ الرياضيات توه داخل..اول حصه رياضيات؟

رجعت احط راسي على الطاوله لأني بكل الاحوال ماراح افهم

فجاءه نغزني هادي من جنبي..اكره هالحركه!رفعت راسي بشوف وش يبي

قال: لا ترقد!

"وانت وش عليك مني؟"

اشر للأمام وناظرت للأستاذ وشفته يتكلم وينظر لي، الحمدلله اني ماسمع راسي صدع وانا اشوفه يتكلم كيف لو سمعت؟

التفت لهادي وقلت له"  ماني فاهم بكل الأحوال بعدين تشرح لي"

ناظر للأستاذ وقاله اللي قلته..او يمكن غير؟ لأنه قاعد يتبوسم ومبسوط مع اني شبه انتقدته

بس فكّه الحمدلله!

تنهدت بارتياح بعد ما شفت الطلاب يطلعون واخيرًا انتهت الحصة ! مابغى ..لفيت بكلم هادي ولقيته مو موجود

عقدت حاجبي باستغراب مو من عادته يطلع من الفصل دون مايقولي طلعت من الفصل ادوره 

لقيت بارق قدام وجهي مبتسم..مايبتسم الا ووراه بلاء

نظرت حولي بتوتر بس مو موجود، بديت اتوتر لأن وجود بارق هنا وشلته الغبيه مو موجودين اكيد مخليهم يتعرضون لهادي

صرت اركض حول المدرسة تحت انظار الطلاب المستغربة بس بالنهايه كيف بيفهموني؟ ما اقدر اصرخ او انادي بـ اسمه!

اثناء بحثي لمحت واحد من اخويا بارق طالع من المخزن..ركضت للمخزن وكلي خوف يكون صابه شيء

فتحت الباب وشفته كان..جالس؟ ومافيه شيء 

الحمدلله!

نظرت له بقلق وقلت "وين رحت؟"

جاوبني بهدوء:شوفني قدامك

"ادري ياحمار بس ليش تطلع من الفصل بدون ماتقولي؟ تعرف اني ماقدر اسأل احد عنك!"

وقف هادي وقف عندي وقعد يسحب خدودي وتكلم وهو مبتسم: مسوي خايف علي يعني؟

وخرت يده عني وقلت"خير شافيني بزر؟ تراني اكبر منك"

ضحك بقوه وقال:ذليتني بالخمس دقايق ذي

"صدق علمني ليش كنت هنا؟ شفت بارق يتبوسم وقلت اكيد انه مسويلك شيء"

مشى متعديني بعد ما قال:مافي شيء ماعليك!

      _____________________________

أحس بالندم والتردد للي بسويه، احتمالية كبيره ان امير يزعل مني لو عرف بس عادي بالنهايه انا مايهمني احد سواه..وابيه يكون مرتاح وسعيد بحياته يكفي السنين اللي كان بعيد عنا فيها

من يوم رجع قبل ثلاث سنوات وانا احس روحي رجعت بجيته!

مستحيل اسمح لأحد يأذيه ولو كان على حساب غيره

وانا ماشي وجنبي امير ..مسك امير بطنه بسبب جوعه..ابتسمت له وقلت له نجلس ناكل..توجهنا للكافتيريا وجلس امير بإحد الكراسي وانا رحت اطلب ..اثناء ما انتظر الطلب لمحت بارق اللي كان جالس بالكراسي المُقابله لأمير و ينظر لي و اؤمات له ردًا عليه وهو ابتسم برضى وصار ينظر لجهه ثانيه

كان بارق ينظر ..ليوسف وشلته!

تجاهلته واخذت الطلب بعد ماجهز وجلست امام امير وصرنا ناكل بصمت

بعد ما خلصنا صرنا نمشي حول الساحه واسولف مع امير..احاول بكل مقدرتي اني اعوض عن السنين اللي ماكنا سوا فيها

وقت ما رجع كنت مصدوم انه ما عاد يسمع..حزنت عليه

كانوا كل اقاربي ينظرون له بشفقه لأنه الشخص الوحيد منا مايسمع..كان يكتب لي انه يكره هالنظرات ويكره اصحابها

من بعدها صرت احاول ما اشفق عليه خوفًا من انه يكرهني! 

تعلمت لغة الأشاره عشانه وعشان اكون قريب منه..مو بس انا حتى ابوي واختي

امي ؟ ماتت بسبب حالتها الصحية! من بعد اختفاء امير كانت صحتها تسوء كل يوم ونفسيتها سيئة لين ماتت!

وانا امشي وقعت انظاري على يوسف اللي انتبه لي فورًا اني اناظره و أشار لي عشان اجيه ..التفت لأمير وقلت له ينتظر شوي ..جلس بأحد الكراسي اللي بالساحه وانا توجهت ليوسف

اللي قال اول ما ماوصلت:ليش تسمع كلام بارق؟

"لأنه صديقي؟"

قلتها دون تردد وانا انظر لبارق وشلته اللي كنت بيوم من الأيام بينهم!بط الحمدلله ربي بيّن لي حقيقتهم

تكلم واحد من اخوياه: بس انت قلتي لي انه كان مهددك؟

"وانت اي شيء ينقال لك تصدقه؟"

تكلم يوسف بعد ما تنهد:خلاص توكل

رجعت لأمير بس كان يمشي بسرعه باتجاهي..بس ليش ملامحه مصدومه لذي الدرجه؟

جيت بوقفه اشوف وش فيه بس مشى متعديني ولا كان يناظرني حتى!

    ________________________________

بعد ماجلست ناظرت حولي بملل اقيم جمال الطلاب ..دققت اكثر للجهه اللي كان هادي متوجه لها ..قعدت اقيمهم حتى شفت شخص اعرفه 

كيف ما اميزّه وهو كان مثل الأب لي؟

يوسف!

تسارعت نبضات قلبي وانا احس بأن ذكريات ذيك السنين من فرح وحزن انهلّت علي بشكل مُفاجىء! 

وقفت ببطء وصرت امشيء ببطء وبشكل ملحوظ كنت ازيد سرعتي ابي اوصل له

اخاف يختفي مره ثانيه وما الاقيه!

وقف يوسف فجاءه وكان رايح..اصبر دقيقه!

بذي اللحظة كرهت نفسي واشفقت عليها ..تمنيت اني اقدر اتكلم عشان اناديه بـ اسمه!

صرت اركض حتى امسكت يده ..هو فزّ بقوه ونظر لي وهو مستغرب

نطقت بصعوبه كبيره وانا حاس لساني ثقيل" يوسف!"

 شفته يحرك فمه ردًا لي بس ما اقدر.. كيف اعرف وش قلت؟ 

انت تعرف اني ما اسمع ليش تتكلم؟

ماحسيت الا بدموعي تنهمر بقوه دون توقف..تغيرت ملامح يوسف من الأستغراب للتوتر والقلق بسبب بُكائي المُفاجىء!

صرت اضرب اذني بقوه لعلّ معجزة تصير واصير اسمع واعرف وش قال بس مافيه فايده!

انتهى

تقييمكم للأحداث؟❤️‍🔥

اعترف اني اجرمت بحق امير بذا البارت☹️😓

-هوشه يوسف وادهم ؟

-جاسر وتنمره؟

-تحسون ممكن عصام يأثر فعلًا ب اياس ويصير يكره يوسف وادهم؟ 

-هوس عصام ب اياس^الله يعين اياس عليه حرفيًا حتى انا انغثيت مو عصام🤣^

-ادهم ومساعدته ليوسف؟

-توقعاتكم لهادي وسبب غموضه بذا البارت ودفاعه عن جاسر؟

-امير ويوسف؟

البارت ذا اعترف مو مره طويل بس وقفت عند الجزئيه الحماس🫢

توقعاتكم للبارت القادم!

اكتبوا ماتؤجرون عليه🌷

شروط البارت القادم

30 votes

80 comments

ماحطيت الشروط الا لقله التفاعل مقارنة بعدد القراءات، لكن بينزل البارت كل اسبوع واذا مر اسبوع وماوصل العدد ماراح ينزل بس بيكون جاهز اي لحظه يكتمل الشرط بينزل

والله مو عاجبني اني اسوي شووط بس مضطره🥲