بداية

"سِر نَحو ربكَ لا تَعُد نحوَ الورا

مَن عادَ نحوَ الخلفِ تاهَ وما درى"

"عاد لا تسحب عقب التخرج"

نطقها الواقف قدامي بينما ابتسمت بتسليك :ان شاء الله

عارف انه راح هو اللي بيسحب! لأن مو شيء جديد وشبه أعتدت على حالتي الغريبة ..نظرت له بضيق صح أني تعودت لكن لا زال يضايق! كيف شخص تعتبره صاحبك بالنهايه راح ينساك..توسعت عيوني بفزع بعد ما شفته يلوّح قدام وجهي ..نطق بعد ما انتبه اني انخرشت: وين راحت بك الأفكار؟ 

" مو بعيد..مع السلامه اشوفك بعدين"

قلتها وانا شايل شنطتي عشان ارجع للبيت 

اليوم احتفلنا بالتخرج والوضع طفش صار لي ثلاث سنين أحتفل بتخرجي من الثانوي! مو حالة ذي ..بكل مرة أقدم للجامعه يطردوني يقولون كمل آخر سنه ثانوي! عارف اللي ببالكم بتقولون ذا وش يرطن لكن صدقوني انا حالي حالكم ماني عارف وش علّتي! 

صح نسيت أعرفكم عن نفسي .. انا يوسف عمري اللي يعتقدونه الناس ١٨ لكن الصدق؟ انتوا عمري..امزح عمري ٢١ 

وصلت البيت..طلعت مفاتيحي عشان افتح الباب..فتحته ثم شغلت الأنوار ، انا اعيش لوحدي ، وين أهلي؟ صدقوني لو أعرف بقولكم!

 رميت شنطتي عالأرض باهمال ..غرفتي حوسه يحتاج لها ترتيب لكن مالي حيل..للأسف انا شخص فوضوي جدًا! رحت ابدل ملابسي انا اشتغل باريستا ..اخترت هالوظيفة لأني أحب القهوة..بعد مابدلت طلعت وركبت دبابي متوجه للشغل ..تنهدت بضيق بعد ماتذكرت أني لازم أقدم عالوظيفة من جديد! من سنتين اشتغل هنا وبكل سنه اقدم للوظيفة من جديد! الصدق يضحك وضعي! 

دخلت متوجه لأحد الموظفين قلت له يقالي استفسر منه والمشكلة انه كان خويي كل علومه عندي! هو غبي يكب العفش عندي دايم ودايم نفس العفش حفظته ..

"السلام عليكم اخوي..ابي اشتغل هنا"

جاوبني باحترام غير معهود منه : تفضل معي للمدير ..تابعته وسبقته بخطواته لأنه بطيء جدًا وانا عارف مكان المكتب ! نطق بصدمه :كيف عرفت مكانه؟

" حدسي قوي ومايخيب! توقعت مكتبه هنا وطلع صح"

 طقيت الباب بعد ماخلصت كلامي ثواني حتى وصل لي صوت المدير سامح لي بالدخول

نطق المدير موجه كلامه اللي بجنبي: تفضل محمد وش بغيت؟

جاوبه باحترام : تعرف عندنا نقص بالموظفين وهالولد يسأل اذا في وظايف هنا

ناظرني المدير بتفحص وقال: تعرف للشغله؟

ابتسمت له ياحبيبي القهوة لعبتي! نطقت بثقه: مُحترف بعد! 

اتكى المدير على كفه وابتسم لثقتي وقال: ورني شطارتك

"بتذوق الذ قهوه الحين ..بس كيف تحبها؟ "

"على ذوقك"

طلعت بعد ما سمعت رده..دامها على ذوقي بتطلع الذ! تعرفون انا ماسوي الا الزين، بديت اشتغل قررت اسوي له كابتشينو ..انا احب القهوه السوداء واكره الحليب مع القهوه تخرب طعمها! مدري كيف يشربونها..بس اشتهيت ارسم ! قررت ارسم شخصيتي المفضلة ..ماراح اقول مين لأنه كنز بالنسبة لي وانا ما احب اشارك كنوزي احس اني اناني شوي بس من حقي! بديت اصلحها ووصلت لأصعب وأمتع خطوه وهي الرسم! قعدت ارسم بحذر من اني اخطي ..احس بديت اتوتر ، نظرات محمد توترني ماحب احد يناظرني وانا اشتغل! عطيته نظره واعتقد فهمني لأنه راح يكمل شغله..

ابتسمت برضى بعد ما انتهيت ..الرسمه افضل مما ظننت! بس دقيقه المدير شايب اخاف ينقد علي ..بالطقاق ماهمني وش عرفه بالفن! ارتجفت بصدمه بعد ما بزر صغير يأشر على القهوه ويقول لامه ابغاها! اعتقد جذبته الرسمه..نطقت والدته تطلب نفس القهوه..اعطيته اللي سويتها للتو لأني غيرت رأيي وابي اسوي قهوه سوداء للمدير ! معلومه جديدة عني انا مستحيل اثبت بقراراتي ودايم أغير على آخر لحظة! 

سويت القهوه واحس اشتهيتها عادي اشربها واسحب على المدير؟ هزيت راسي عشان اطرد الفكرة الغبية ذي مو وقته! توجهت لمكتبه عشان اعطيه قهوته انا واثق انها بتعجبه لأن بكل بساطه انا مسويها واذا ماعجبته فهو ما يفهم! طقيت الباب ودخلت بعد ما قالي اتفضل..اعطيته القهوه وقعدت اناظره متحمس للمدح! احب المدح واحب اللي يمدحوني ..شربها وانا مبتسم بثقه بس احس شكلي غبي لذا وقفت ابتسم لان من دخلت وانا ماغير اتبوسم..ارتشف شوي من القهوه واردف يقول :تقدر تبدأ بكرا او اليوم اذا تبي

" بكرا ان شاء الله"

مابي اشتغل اليوم ابي افل امها! بس افلها مع مين؟طلعت ونظرت بصدمه صاحبي اللي مودعه اليوم هنا ..ابتسم لي لما انتبه اني هنا! 

لحظه ما نساني؟ فرحت! أول مرة ماينساني شخص..بادلته الابتسامه وقلت بفرح:فاضي اليوم نفلها؟ فيني طاقه وابي اطلعها!

اومأ موافق..ابي استغل ذا اليوم لأني مو ضامن انه يتذكرني بعدين! طلعت وركبت دبابي وركب وراي قلت وانا اعطيه الخوذه مابيه يموت وابتلش فيه:وين تبي نروح؟ 

جاوبني وتوجهت المكان الي قاله..واخيرًا بعد اربع ساعات رجعت البيت انتهى يومي! نوعًا ما استمتعت ..ركبنا دبابات بحرية وبغيت أودّع لكن ربي ستر..فيني نوم ودايخ ما اشوف الدنيا انسدحت عالسرير عشان ارقد بس تذكرت اني ماصليت الوتر ..قمت فورًا لأن مهما كان مستحيل افوتها! وضيت وفرشت سجادتي وبديت اصلي إلى إن وصلت لأفضل جزء وهو الدعاء! هنا اقدر اطلع اللي بقلبي ! دايم اشكي همي وحزني لربي لأن محد يعرف عن معاناتي الا هو ! ومحد مصدقني الا الله لأنه يشوف الي امرّ فيه مو بسيط! ومتأكد ان ربي بيعوضني العوض الجميل بس لازم اصبر! انتهيت من صلاتي واخذت القران عشان اراجع حفظي ..أحاول احفظ القران عشان البس أبوي وأمي "اللي ما اعرفهم " تاج الوقار يازيني وياحظهم فيني ليت مني اثنين! بعد مايقارب الساعه خلصت والحين بخمد لأني حرفيًا ما اشوف الدنيا! بكرا وراي يوم حافل 

فتحت عيوني لحظه توني راقد ليش قمت الحين! نظرت للساعه وطلع باقي على اذان الفجر اقل من ربع ساعه قمت عشان اتروش بعد مانتهيت لبست ثوبي وقعدت اضبط شعري ناظرت لنفسي بتأمل الحلو حلو لو توه قام من النوم! ارسلت بوسه لنفسي لأن محد يستحق هالبوسه الا انا..تعطرت من عطري المفضل وطلعت من شقتي رايح للمسجد القريب وبيدي القران عشان اراجع حفظي ..فيه بالمسجد قران لكن هذا يعزّ علي كثير لأنه من الشخص اللي انقذني مع انه نساني الحين بس مابي احرمه من الأجر

دخلت للمسجد وانتبهت لمُنقذي! العم صالح وفعلًا أخذ من اسمه نصيب هو صالح فعلًا !غيرني للأفضل واعطاني سبب للعيش! ابتسمت له ورحت ابي اسولف معه ناسي انه مايتذكرني!

"شخبارك ياعم؟"

قلتها وانا ابوس راسه..جاوبني بصوته المريح :بخير يا وليدي..انت جديد هنا بالحيّ أول مره اشوفك؟

تصنمت ..كيف نسيت اني منسيّ؟ 

"ايه توني ناقل ..انا يوسف "

قلتها بعد ما ابتعدت عنه شوي.. بس كيف ينسى ؟ هو اللي سماني..ابتسمت بعد ماتذكرت ليه اختار هالأسم بالذات! مانسى كلمته لما قال أني جميل واسم يوسف أكثر اسم يوصف الجمال! وقتها ثقتي وصلت الغلاف الجوي بعد ما كنت كاره نفسي! ودعته وقررت اروح البوفية ..رحت مشي لأنه مو بعيد والجو فيه هواء لطيف مايتفوت ..وصلت اخيرًا واخذت طلبي المعتاد وتوجهت للبيت 

بعد ماخلصت فطور انسدحت وحطيت منبه لصلاة الظهر عشان ماتفوتني ..نمت لين جت الساعة وحده ونص وتوني اصحى! قمت مخروش وفيني ضيقة الدنيا لأن الصلاة جماعه فاتتني..قعدت استغفر ربي وقمت فورًا اصلي الظهر بعدها بدلت ملابسي وقررت اروح للبحر بعدها اروح للدوام ..ركبت دبابي متوجهه للبحر بعد ماوصلت وقفته وكمل الباقي مشي ..شفت شايب يبيع شاي بالجمر واحس اشتهيته ! شريت لي واحد ورحت جلست قريب عند البحر وبديت اهوجس..مين يهوجس الظهر والشمس صاكته؟ انا 

قاعد احاول اربط الأمور ببعض وش السبب اللي خلاّني كذا؟ حياتي ما اتذكر منها الا ايامي مع العم صالح! حرفيًا عمري ابتدا من يوم شفته! هو اللي اهتم فيني وربّاني وعلمني الصلاة ..ممتن له كثير ..ما انسى خيبتي وصدمتي بذاك اليوم لمّا رحت له متحمس وناظرني مصدوم يقولي من انت؟ رحت لعياله وطلعوا ناسيني! وانا كنت أربعة وعشرين ساعة معهم آخر شي نسوني؟ومن بعدها بديت اتعود ..اني أكون شخص منسيّ دام العم صالح نساني مين بيتذكرني؟ من بعدها عرفت ان كل ما تمر سنة كل اللي اعرفهم انمحي من ذاكرتهم بشكل غريب! 

طلعت بوكي بتأكد من شيء بالرغم من اني فعليًا متأكد منه ..طلعت بطاقة الهوية تغيرت سنة الميلاد! امس كان مكتوب ٢٠٠٥ والحين٢٠٠٦! كل ذا عشان اظل ١٨ وانا اساسًا مفروض مواليد٢٠٠٣..ضحكت بسخرية مسوي مصدوم وانا متعود اصلًا! توجهت انظاري لأسمي المكتوب "يوسف صالح" لأني مجهول هوية وما اعرف اسم الأب كان لازم احط اسم للأب واصريت يكون صالح لأنه شرف لي أسمي يلحق اسمه!

قمت راجع للبيت أتروش على السريع لأن احس ريحتي ريحه شمس بعدها بروح للدوام 

بدلت ملابسي للطقم حق الشغل ..صراحه رهيب! احس اني جاي من التسعينات بنطلون بني فاتح وقميص ابيض عليه على جنب شعار الكوفي ضبطت شعري وانا اتأمل نفسي شعري يحتاج له قص وترتيب 

طلعت وركبت دبابي لأن مسافه طويلة ماقدر اروح لها مشي بعد ماوصلت دخلت للكوفي وشفت خويي لا يكون ذا بيتكي كل يوم هنا ويفتح المواجع؟ تقدمت بفضول مع اني متأكد انه نساني

"وين الناس من زمان عنك؟"

كذاب توّي شايفه امس..ناظرني وهو عاقد حواجبه مستغرب مني! بعد ردة فعله ذي تأكدت انه نساني! اعتذرت منه وقلت معليش مشبهك بخويي! وبكذا نسجل معلومة جديدة اكشفتها عن حالتي الغريبة ان الأشخاص ما ينسوني الا اذا مر يوم من شوفتي لهم! 

رحت عشان ابدا شغلي ومرت ساعتين دون ما اوقف وبديت احس بدوخه لاني ماتغديت ..جلست واخذت لي كروسان وقهوه سوداء لأن حرفيًا رأسي مصدع! وانا اكل باستمتاع انتبهت لشله عيال قاعدين يضايقون بنت! 

" ساره امي تنتظرك ترجعين البيت تساعدينها"

قلتها وانا ادعي يارب تفهم قصدي!مابي ادخل مضاربات لأني بالشغل ولا والله لو اني برا كان كفختهم لين يعضّون الأرض! اومأت لي وطلعت فورًا من الكوفي ..همس واحد منهم :ديوث

نظرت له بغضب :خير ؟

تكلم واحد واضح انه راعي مشاكل : لو ماتبي أحد يتعرض لأختك خلها تنثبر بالبيت ولا تنتظر لين تجيكم بكرا حامل؟ 

الكلب قاعد يقذف من ورا التريلات! تقدمت له وانا ناوي اتضارب معه استفزني! 

"لا تذكر اختي بلسانك!"

قلتها بصوت شبه مرتفع بس دقيقه انا ليش عشت جوّ انها أختي صدق؟ كملت كلامي " دامها بحشمتها وسترها مالك حق تتكلم! "ياخي والله اني درر! 

جاء المدير لي يهزأني لأني رفعت صوتي عالزبون! دقيقة ملخبط هو الغلطان مو انا! توسعت عيوني بصدمة لما طردني دون مايسمع تبريري! ثواني حتى جت البنت وهي تقول:ياعم هم كانوا يضايقوني وهم ساعدني ماغلط !

ناظرني المدير بنظرات ندم بس عقب وش! طلعت لأن كرامتي أعلى من اني اكمل بمكان انطردت منه وظلم بعد!

انتهى

هذي حياة بطلنا المعتادة ، في اشياء ما وضحتها كثير ..وسالفه انه مايتغير عمره وان الناس ينسونه هي الشيء الوحيد الخيالي اما بقية الاحداث تعتبر واقعية( ما اقصد حدثت بالواقع ) ومبدئيًا انا واقعة بحب شخصيه البطل🫦