ما بين عقل وقلب

.

---

الفصل العاشر: ما بين العقل والقلب

الأسابيع اللي بعدها عدّت ببطء غريب. سامح بيروح وييجي نفس الروتين، نفس الممرات، نفس الوجوه… إلا إن حاجة صغيرة بقت تغيّر شكل اليوم كله.

وجود ليلى.

هو نفسه مش فاهم، بس بقى يحس إنها موجودة حتى قبل ما يشوفها. صوتها وهي بتتكلم مع زمايلها، خطواتها وهي داخلة القاعة… كل التفاصيل الصغيرة دي بقت بتزعجه.

مش علشان بيكرهها، بالعكس. علشان وجودها بقى بيأثر عليه أكتر مما المفروض.

في جولة الجراحة، وقفوا عند سرير مريض صعب حالته. ليلى كانت أول واحدة تمد إيدها تساعد، وسامح سكت وهو شايفها بتتصرف بثقة وهدوء.

عقله بيقول له: دي طالبة زي أي طالبة.

بس قلبه بيرد عليه بهدوء ساخر: طب ليه عينك مش شايفة غيرها؟

بعد الجولة، وهي بتسأله عن ملاحظة في الحالة، قربت منه زيادة عن العادة. ريحة العطر الهادية اللي متعودة تحطه لمسها في لحظة خفيفة، خلت كل حاجة حواليه تتجمد.

رجع خطوتين لورا بسرعة، وقال بنبرة جامدة شوية:

– "خلي بالك يا ليلى، المسافة بيننا مش المفروض تتكسر، لا في المعمل ولا برّه."

كلامه كان حاد، بس عينيه قالت غير كده. هو كان بيحمى نفسه مش منها، من اللي جواه.

هي اتكسفت، قالت بهدوء:

– "أنا آسفة يا دكتور، مكنتش أقصد."

– "عارف… بس لازم نفتكر إحنا فين."

رجعت لي مكانها، وقلبها واجعها، وهو وقف في مكانه، مش عارف يلوم نفسه ولا يلومها.

في الليل، وهو راجع البيت، عقله مش ساكت.

كل يوم بيحاول يقنع نفسه إن دي مشاعر عابرة، إعجاب مهني مش أكتر. بس في لحظة الصمت، لما بيبص لنفسه في المراية، يعرف الحقيقة:

في حاجة اتحركت فعلاً.

بس هو مش عايز يفتح الباب، مش عايز يدخل دوامة هو عارف نهايتها.

كان عنده جرح قديم، واحد كسَر فيه قلبه زمان. ومن وقتها قرر إن الجراحين لازم يفضلوا عقلانيين، ما يدخلوش العواطف في حياتهم، لا في الشغل ولا في الحب.

لكن ليلى… ليلى كانت بتكسر القاعدة دي من غير ما تقول كلمة.

وفي المستشفى، اليوم اللي بعده، شافها قاعدة في الكافيتيريا تقلب في الورق بعينين تعبانة، شعرها مفكوك شوية، شكلها مرهق بس فيها براءة غريبة.

وقف بعيد، اتردد دقيقة، وبعدين مشي من غير ما يقول كلمة.

مش علشان ما كانش عايز، لكن علشان لو قرب أكتر، مش هيعرف يبعد تاني.

---