استعاده الماضي

لا تنسون التصويت بنات

وكذلك التعليقات الحلوة نفسجن

{بسم الله الرحمن الرحيم }

{ريناد}

گعدت على صوت رسائل ومكالمات كلش هوايه رفعت المخده الزم الجهاز بايدي احاول اركز منو هالكد متصل عليه ليش كل هاي الاتصالات

فتحت التيلفون اشوف شنو هالاتصالات هاي من رقم غريب فتحت جهات الاتصال احاول اعرف منو بس ماكو

بس اتصالات فوك العشرين مكالمة بين كل ربع ساعه مكالمة شفت الرسائل باعداد ضخمه فوك الاربعين رساله

ردت افتح الجهاز ما كدرت فتحت اختي باب الغرفه گعدت يمي اشوفها متوترة

شنو شبيه رنا" شصاير

حجيت" واني مترددة مظهرها مو مال واحد طبيعي اكو شي صاير

شبيج اخويه ابويه بيهم شي شبيج ردي

صحت بيها بخوف اهز بجسمها ماكو صافنه عليها  خوفتني اكثر بسرعه نزلت من الجربايه

فتحت باب الغرفه ورحت انزل ركض لليجوه حيل خفت من ردت فعلها قلبي يدق بكل سرعته فتحت باب غرفه اخويه شفته نايم

يمة ارتاح قلبي اخذت نفس كعدت شويه احاول افهم باوعت للساعه هستوها بالسته الصبح فتحت عيوني

على وسعهن شنو ما نايمتلي غير ساعتين شكو لعد شبيها رنا"

رحت لغرفه بابا شفته نايم صعدت واني يادوب رجليه يصعدني لغرفتي حيلي وگع عبالي اهلي بيهم شي

فتحت باب الغرفه اشوفها بس ساكته يا الله احس قلبي وگع كعدت بصفها اشوفها ساكته

شبيج رنا" احجي مو والله حيلي راح شسويتي شبيج هيج ساكته

ما سويت شي لا تخافين

شبيج اخاف من شنو شنو مسويه رنا فدوة احجي كافي تعبت

لزمت ايدي اشوف وجهه اصفر تريد تحجي بس مترددة خوفتني اكثر

شبيج رنو احجي شصاير وياج

شوفي راح احجي بس ما تزعلين مني ولا راح تضوجين فدوة الج

احجي شبيج شصايررر شنو مسويه من وراي

شوفي لمن نمتي اخذت جهازجج ورحت اتصلت عليه وضليت ارزله واحجي عليه

وحضرته من كل مواقع التواصل وحضرت رقمه وگتله بعد ممنوع تراسل اختي الا من لمن تخطبها وتصير زوجها رسمي كافي صارلك 3سنوات تضحك عليها وشالع قلبها

سحبت ايدي منها بحيل ضليت صافنه على حجيها ما مستوعبه شنو حجت ضربت بحيل على راسي ملخت شعري بايدي

ولج ليش بس فهميني ليش هيح سويتي ولج انتِ شنو تعرفين عن خباثته علمود هيج تسوين

كافي اسكتي ريناد اسكتي مخوفج وماگل قلبج اكل كافي

صاحت بيه بصوت عالي خلتني صافنه عليها من الصدمه ما جاي اعرف شنو اتصرف هسه

انتِ ما شايفته اخر فترة شلون صاير مبين وراه شي مبين بس رغم انتظره اريد اعرف،شنو ناوي شبيه

الف مرة كتلج علاقتي لا تتدخلين بيها

بس اني تدخلت علمودج لانو خفت عليج والله علمودج

علمودي من كل وعقلج علمودي

صحت بيها بصوت عالي استغفر ربي

هسه انتِ عبالج هاي سالفتج هينه

هاهيه اعتبرينا رحنا بين الرجلين

بس ريناد اسمعيني شبيج

كافي اطلعي برة فدوة اطلعي برة ما اريد اسمعلج صوت

هاهية روحي منا خليني افكر شلون اخلص نفسي من هاي الورطه وياه

بس ريناد اسمعيني

كتلج كافي اطلعي برة لا تخليني اصيح منا ناس امشي برة

طلعت برة وهي تبجي كعدت احاول اعرف شنو اتصرف متاكده مراح يسوي شي بس هو يتخبل من هاي التصرفات

ما يحب احد يبلگه ابدا ولا يحب احد ينهي النقاش اوف شدعي عليج رنا" هسه راح تدخليني بسوالف بالموت طلعت منهن

شفت رنا" دخلت للغرفه وسدت الباب

لازمه جهازها بايدها ملامح وجهها ما تتفسر

انطتني الجهاز بايدي اشرت الها منو بايدي ضلت ساكته ما جاوبتني بحرف واحد بس ساكته وجهها من العصبيه ما يتفسر

حطيت الجهاز على اذني اول ما سمعت صوته خفت سمعته يحجي بنبرته العاليه وياي متعالي نفس طبعه يلي اكرهه

يحجي بغرور

طارق: شلونج انسه ريناد خوب مو زعجنه حضرتج شكد اتصلت ليش ما تردين

شكد اكرهه واكره مسخرته واسلوبه

وياي

رديت عليه احاول اتلافئ الموضوع ما عندي اعصاب تتحمل غروره

ريناد: جنت نايمه واصلا ما اعرف بالسوته اختي شتريد هسه

سمعت يمة صوت مو طبيعي ومتاكده جاي يدخن هسه عود شكم مره گالي عفت التدخين لعبت نفسي منه

طارق: لا ريناد ما متوقعه منج ليش تجذبين عليه

ريناد:اجذب عليك بشنووووو

صحت بيه بنهايه كلامي

طارق: اي صيحي عفيه عليج حاطه خطه انتِ واختج علمود تنفصلين عني وعود حركات ما نعرفها. وتمشي عليه

ريناد:انت مستوعب شنو جاي تحجي شبيك طارق مصدك نفسك

طارق: اش ولا حرف ترجعين نفس البطله تشيلين كل الحضر لا حسابج يختلف عندي وانتِ تعرفين شلون احاسب

ريناد: شبيك انت صدك تحجي يعني مثلا خايفه منك لو اريد احضرك جان حضرتك من زمان شنو هاي التصرفات

طارق: اش ريناد اش سدي حلگج هذا راسي يوجعني شكم مرة گتلج لا تناقشيني لمن احاجيج شكد اكره النقاشات

ريناد:انت عود صدك تحجي نقاش شنو مجذب الجذبه ومصدك نفسك

طارق: هاي منو يجذب ريناد لا تخليني اضوج منج تعرفيني ما احب هذا  الاسلوب منج

ريناد: اسلوب شنو طارق اسلوب شنو ترة انت جاي تتهمني وفوكاهه تتامر بدال ما تسئل عني تلؤمني

طارق: شو اسكتي هاهيه اسكتي لعبيتها النفسي من الصبح حتى واهس للسهره ما عندي

ريناد:شنو طارق سهره شنو بالسته الصبح شبيك انت صاحي شارب شي

احجي وما اسمعله صوت سد الاتصال بوجهي روحي احسها طلعت من العصبيه

سهره شنو هذا شبيه رجعت اتصلت مرة ومرتين وثلاث مرات ماكو ابدا شمرت الجهاز على طول مدت ايدي لعبت نفسي منه

شفت رنا" ودت ابنها لغير غرفه واجت كعدت يمي جايبه وياهه اكل

رنا":شوفي حبيبتي اعرف تصرفي غلط  بس سويته علمود اشوفج حقيقته يلي انتِ تجملين بيها

ردت احجي قاطعتني وهي تسويلي لفه بالجبن علاقتها بالسوالف ويه الاكل

شوفي حبيبتي اني عشت قبلج قصه حب كامله تعرفين بيها جنتي بالاعدايه واني وزوجي نتراسل وبالجامعه تعرفنا اكثر وجنا وكت النقاشات او العركات يصير بينا تفاهم مو كلمن يفرض رأيه علئ الثاني

ريناد: بس هو مو هيج والله بس هالفتره هيج شهگت بصوت عالي اريد احجي ما اگدر من گد ما مهضومه من تصرفاته 

رنا":ريناد من اول ما عرفتيه هو هيج تجذبين نفسج مبين واحد مو راحه ابدا من شفت صوره هو والسيارات والسهرات مو راحه بس قبلت لخاطرج قبلت لانو اعزج وما اكدر اضوجج

ريناد:بس شوفي هو مجان هيج دائما جان حنون ويسئل ويسولف وحتى يراسل هالكم شهر تغير ويمكن ضروف عنده

رنا":ظروف،شنو ريناد شنو شو البيت موجود دراسه مكمل شغل عنده املاك من ابوه عنده شهاده ومكمل كلشي سيارته وحدها تحجي عن امكانيته ظروف شنو

هزيت راسي استمع لكلامها كله صح عيوني صارن حمر من البجي اسمع الها واحس النفس خانقني

شوفي رنود كلنا نحبج اهنا بس ما حكمنه عليج ولا بيوم قررنه نجبرج بشي ابدا انتِ الصغيره مال البيت المدلله كلها تموت عليج على شنو رايحه تركضين ويه واحد ما يستاهل اظفر منج متكبر غيور مو راحه ابدا

شوفي قبل فتره سئلت كميل زوجي وبوكتها حجينا عن كذا موضوع فحجئ جمله ضلت براسي لهاي ساعتج

گال الولد ما يقيده شي ابدا ويلي يحبها ما راح يقيديها بيوم الغيره تختلف عن التحكم او غيره واكو مرض نفسي اليوم اغار عليج بس ما احرمج من حياتج بدافع الغيره فابدا لا تفكرين بيوم انو هاي الغيره بالعكس هذا مرض نفسي لازم يتعالج منه الشخص 

شوفي الولد لو راد شي اليوم يحصله رنود انتِ مو ناقصه او رخيصه علمود تضلين ويه واحد رخيص ولج وين اكو سهره بالسته الصبح غير ويه ال****

ليش تخلين نفسج ويه هيج واحد ولج لا تبجين بس اكفلي لا تبجين والله ما يستاهل دمعه منج خلي يولي هذا الحيوان ما يستاهلج تستاهلين الاحسن منه

ريناد:بس اني اريده والله اريده بنيت وياه طموحات واحلام وحياه اعرف كل كلامج صح كل حرف حجيتيه اعرف،بيه بس ما اكدر تعرفين شعور الحب تعرفين شكد حبيته اول حب بحياتي كلها انتِ تعرفين شنو جاي احس الله لا يشوفج احساسي بيوم

اجت يمي حضنتني بحيل شفنا الساعه صارت بالثمانيه الصبح رحت اغسل وجهي وابدل اليوم عرس اخويه لازم افرح شويه كافي تفكير هوايه جاي تتعبين بنفسج ما يستاهلج

التهيت ارتب بنفسي والخطار من الصبح كلها صارت يمنه يلي يطبخ الغده مال الزلم سويناه ببيتنا بين ما كملنه المعازيم كلها اهنا فرحانه بس اني امثل الفرح بداخلي بركان مشتعل بداخلي دمعتي بطارف عيني

الناس عبالها ابجي بعرس اخويه من كد ما فرحانه بس اني ابجي من القهر من گد ما روحي تعبانه كل مواقفه السيئه استرجعتها كلشي سواه وياي ونسيته باقل موقف وياه استرجع كلشي

كعدت على الكرسي اشوف الناس مخبوصه والزفه راح تطلع عفت العبايه مالتي رحت لاختها ترتبها ما اعرف ارتبها اني

ورة يوم كلش طويل رجعت للبيت تعبانه احس نفسي منهاره كلشي ما جاي اگدر اسوي معنوياتي كلها تحت الصفر باضعاف

بدلت ملابسي تلفلفت بالبطانيه ونمت ما كعدت غير لسته الصبح فتحت جهازي،شفت ولا رساله منه كلشي ماكو

ابتسمت بخيبه امل مثلا شنو متوقعه قابل راح يتغير طارق هو نفسه طارق سواء،عجبج او لا هو نفسه الاناني

صرت اعزل بغرفتي احاول اشغل نفسي بفكره شي بس ما اكدر حاسه بخيبت امل كلش جبيره حيل متردده اخذ هيج قرار اخاف يمكن لاول مرة اخاف بس خفت

المواجه ويه طارق بهيج موضوع وبنقاش مستحيل يكدر يتقبله متاكده راح اعاني كومه بس ماعندي غير هذا الاختيار

وره تفكير كلش طويل ومراجعه لكل احداث حياتي هاهيه انتهيت من كلشي انتهيت كافي لازم اكون قويه اواجهه بقراري هذا واتحمل عواقب افعالي واختياراتي

كلشي صار بمحض ارادتي وراح يروح بارادتي فتحت جهازي راسلت اختي كتبت الها قراري وشرحت الها مواقفي ومشاعري بقت. يمها هي تقره كلامي وتردلي خبر يله اتصرف

احس براحه كلش جبيره لمجرد قراري انهي هاي العلاقه خلاني مرتاحه لعد شكد جنت متعذه بهاي العلاقه وياه

صرت اعزل البيت ما خليت شي ما عزلته كل شويه اشوف الساعه اريدها تصير بالثنتين الظهر ماكو هستوها،بالعشره الصبح

سمعت صوت اشعار اجاني فتحت الجهاز بسرعه خاب املي من شفت الرسائل من اختي جان عندي امل كلش صغير بس امل ما خله عندي

قريت كلامها جانت كلش فرحانه بقراري وجاي تشجعني بيه وتگول ما سويتي غير الصح بس اني اعرفه شنو حيل خايفه ومتردده اعيفه

يمكن شعور الخوف بعمري ما حسيت بيه گد ما حسيت بيه واني ويه طارق كل ثانيه وياه خوف ما ينحزر هذا الرجال ابدا

شفت اخوي يتصل عليه يتطمن ويسئل عن ابوي وصحته حجيت" وياه وطمنتنه عننا كلنه

گال هالاسبوع ويرجع للبيت وصاني كومه انتبه على نفسي واقفل الباب مال البيت وممنوع اطلع وحدي ومن هيج وصايه

سديت التيلفون طلعت مسلسل اتابع بس تفكيري مو يم المسلسل تفكيري يمه شنو جاي يسوي هسه وينه ليش هالكد مختفي اوف يربي شوكت ارتاح

توضيت وگعدت اصلي صلاه استخاره اريد قلبي يرتاح ماكو احس نار ومشتعله بنص قلبي ما جاي تطفي كعدت قريت قران شويه ارتاحيت خايفه احس هاي الخطوه راح تكون كلش جبيره اني مو مستعده الها ابدا

توكلت على ربنا وكتبت اله برساله كومت حجي ورسائل وكلام طويل حجيت" بيها عن كل مشاعري ختمت الرساله

اني حاولت وياك كومه بس هاهيه لهنا

وكلشي بينه انتهي طارق مع السلامه

ربي شكد جنت مهمومه بس من كتبت كلشي بداخلي ارتاحيت احس بشعور براحه ممزوج بخوف ما اعرف ليش خايفه بالرغم متاكده مراح يهتم وبالعكس عنده اصلا احتمال هو ينهي علاقتنه

ضليت انتضره يشوف ماكو مر يوم ويومين وثلاث ايام ومر اسبوع كامل

وهو هيج ماكو ولا رساله منه حتى ما شايف كلامي بالرغم ينشر ستوري ومنشط حسابه بس ماكو ابدا تحس ولا كأنو دازتله شي ضليت انتضر روحي ماكو

رجع اخويه قبل يومين وهالاسبوع عشته كله وحالتي حيل صعبت تمرضت كومه ونمت بالمشفئ يومين حتى اخويه رجع من سفرته ويه زوجته علمودي حجئ" وياي راد سئلني شبيج گتله اكيد من العرس تمرضت

بس مبين مو مقتنع ابدا بكلامي مرت ايام وره هذا الاسبوع شويه خفت حرارتي الليل كله ما انامه اضل،بس افكر بيه تعذبت شكد احاول اطلعه من راسي بس ما اكدر اضل ابجي للصبح والنهار كله نايمه

ضليت بس ساكته اعتزلت الناس كلها عفت اهلي صديقاتي ناسي وكلشي حتى زوجه اخوي يادوب احجي وياهه كلمه وامشي

سمعت صوت احد يدگ بالباب مال غرفتي عدلت ملابسي وشعري

ادخل منتظر الغرفه غرفتك ادخل حبيبي

طب للغرفه يشوفها يتفحص كل المكان بعيونه مبين القلق على ملامحه شفته اجه كعد بصفي

منتظر: شبيج حبيبتي رنود صاير شي احد زاعجج بكلمه اكو شي صاير وياج ما حاجيته النه

ريناد: لا شبيك منتظر بس هالفتره شويه تعبت من العرس والتجهيزات وهيج

باوعلي،بشك بس رجع ابتسم يحاول يبين هو ما خايف،بس الخوف بعيونه

منتظر: رنود متاكده ماكو شي تعرفيني وياج بكلشي احجيلي اسمعج. احنة متعودين كلشي نحجي لبعض

ريناد:لا منتظر يا شبيك ترة مابيه شي ليش هيج خايف تطمن هاهيه من باجر راح ارجعلك ريناد القديمه بس لا تخاف

منتظر: متاكده رنود ترة وضعج ما عاجبني وتدرين بيه اكره الاسرار فاذا اكو شي احب اسمعه منج اول

ريناد: لا حبيبي انت روح وكلشي ماكو يله امشي لزوجتك عيب عايف البنيه وجاي يمي

منتظر: هو لسه قلبي ما مرتاح بس يله راح اخذ كلامج بس تذكري شتردين تحجين اسمعج

ريناد: ما تقصر حبيبي تكدر تروح هسه

وسلملي على زوجتك الحلوة

باس راسي وراح طلع من الغرفه وكفت كدام المرايه شفت هالاتي شكد سود شعري مخربط غرفتي ما معزله

صرت اعزل بالغرفه واردد براسي هو لو يستاهل ازعل عليه فلا انقهر وره ما كملت عنايه نمت من وكت

كعدت الصبح اسولف واضحك ويه اهلي وشفتهم شكد فرحانين برجعتي وياهم ضحكي وسوالفي وياهم هاي سعاده

رجعت لغرفتي بملامح خاويه مابيها روح

فليت شعري ادلك فروة راسي فتحت التيلفون شفت تم الارسال منذ ثلاث اسابيع

اخذت نفس عميق احاول ما افكر بيه ما اراقب حسابه بس ما اكدر دائما مزروع بنص افكاري تعوذت من ابليس

رحت حاجيت اختي جانت قلقانه على وضعي بس تمثل السعاده كدامي حجيت" وياها اتصال لمده من الوكت

تعبت رحت انام احس انتهت طاقتي جسمي كله احس متكسر ما عندي رغبه لا اكل ولا اشرب ولا اسولف مرت اشهر وره هاي الرساله قبل لا احذف حساباتي واغير كلشي شفت تمت المشاهده منذ اسبوع ومرسول اكثر من عشرين ايموجي ضحك

قلبي وجعني من ردت فعله حذفت كل حساباتي وغيرت رقمي بمساعدت اختي ماكو غير هاي الطريقه علمود هاهيه اتقبل طلعته من حياتي رجعت شويه شويه احاول اعود نفسي عليه بس ما اكدر بنهايه اليوم تخلص طاقتي واشتاقله كومه اكعد بس ابجي لحد ما انام واني دموعي على خدي

كعدت الفجر على صوت اتصال من رقم غريب فز قلبي احسه راح يطلع من قفصي الصدري من گد ما ينبض

اخذت الجهاز ايدي ترجف ما اعرف ارد

فتحت الاتصال وره تردد كلش جبير سمعت صوته يلي يجيب اليه الرعب

طارق: هلا بيج ريناد شلونج شنو اخبارج

وين مختفيه شو ماكو

ريناد:انت قريت كلامي يلي دازته الك لو لا

حجيت" الكلام واني ما مركزه احس الكلمات بالگوة تطلع من حلگي ما اگدر انطقهن

طارق: ها يعني ما جنتي تشاقين بكلامج هذا

ريناد:لا طارق كلشي بينه انتهي

طارق: عود انتِ صدك تحجين شكم مرة كتلج اني احب انهي العلاقات مو انتِ

صاح بيه بعلو صوته بنهايه كلامه خله طبلت اذاني تنزرف من وره علو صوته

تمالكت اعصابي احاول ما ابجي اني هسه مو بوكت اسمعه ابدا مو بوكت يجي بيه هسه

ريناد: اي هذا يلي عندي وخلص

سديت الاتصال بوجهه رجع اتصل هوايه ماكو سديت جهازي ورحت اشغل نفسي بشي جسمي لسه يرجف من وراه

شكد غبيه اني شلون ما حرگت خطي نسيت عنده الف خط ويگدر بكيفه يتصل لازم اسويلي سالفه احرگ بيها خطي

قبل لا اطلع من الغرفه سمعت اشعار رسائله متاكده هاي اختي اول ما فتحتها دخلت للرساله

رقم غريب،دازلي صور استغربت خاف غلطانين بالرقم اول ما فتحت الصوره وگع الجهاز من ايدي رجليه ما صارن يشيلني

اريد الزم الجهاز بايدي ما اگدر من الشي الجاي اشوفه اصابعي صارن يرجفن وخفقان بقلبي لزمت الجهاز احاول اركز بالصوره عدتها الف مرة اقرة الكلام المكتوب

هذا عنوان بيتكم وهاي صوره اخوج هسه نشوف منو يسد الاتصال بوجه الثاني انسه ريناد

•••••••••••••••••••••••••••••••••••••••

استودعتكم الله

رابط قناه التلي،بالوصف

بوت التواصل: @TAT_77_bot