البارت 41

للتواصل انستا zahraaahmedn99

علقوا بين الفقرات+ صوتوا للبارت+ تابعوا حسابي عيناي انتوا.

شاركوا القصه حتى نستمتع وي الهَيْصَم مع بعض

هَيْصَم

(الكاتبة زهراء احمد)

_______

حوري

قال انهُ عاشقٌ مغرم

سيطر على العقل واضرم نيران حب محرم

دنس قلب طاهرٌ بحب الله مفعم

وما أن امتلئ قلبه مني حتى ابتعد كما أتى وهم..

الخاطره بقلمي

زهراء احمد

: من تشوف نفسك على بعد خطوه من الموت الاحساس اللي ينولد داخلك مختلف تماماً متعرف شنو تتصرف لو وين تنطي وجهك، أمر رب العالمين وراح يتم برضاتك لو غصب، اما تموت انت او تفقد شخص عزيز عليك، كل هذا مفكرت بيه واذا متت ماعندي احد بهاي الدنيا يمكن الشخص الوحيد اللي راح ينقهر هو هَيْصَم لكن هو عكسي ،هوايه ناس راح تتأذه اذا صار بيه شي اني أولهم ردت يعيش ومفكرت بشي ثاني غير هذا فجأة خطرت على بالي خالتي الله يرحمها من كالت ابو الحسن حاضر الشدات بسرعه بقيت اردد ياعلي اكثر من مره من صدك حسيت بالاطمأنان وكأن الإمام عليه السلام موجود ويانه بالسياره،

عيني على المسلحين وعين على هَيْصَم اللي التوتر واضح على ملامحه، يسوق بشكل سريع حسيته يتسابق وي الموت وموبايله مهدأ ابد اما خالتي تردد بصوت عالي الغوث ياصاحب الزمان، الجو متوتر والرعب ملانه كلنه كل واحد بينه خايف على الثاني مخايف على نفسه، خطوة وحده بس وكلنه نموت، ماعرف شلون صارت سيارتهم كدام سيارتنه قطعوا الطريق من الامام طريق سريع ميكدر يسوي استداره لان بهاي الحاله ياذي السيارات اللي وراه، بلد تايهه لدرجه القتل علني والمجرم ميتحاسب ومحد يوجه اصبع الاتهام عليه وأرواح الناس تُسلب ببرودة دم لاحظت السيارات الباقيه تمشي ولا كأن شي صاير ستحقرتهم حيل وبنفس الوقت ملمتهم ناس بريئه بس يقتربون ينحكم عليهم بالموت،

الدعاء هو الوسيله الوحيده بهاي اللحظه، تشاهدت من شفتهم نزلوا من السياره جانوا اربعه ملثمين عيني اجت على هَيْصَم وشنو راح يسوي جحظت عيوني من شفته فتح الجكمجه وطلع من عدها مسدس فتح الباب ونزل، جانوا ضخمين حيل ومبينين عصابات بقوا واحد يضرب بالثاني بس هو وحده وهم اربعه اجت ضربه على راسه من واحد بيهم شهكت ونزلت دموعي، فقد توازنه وقبل ميوكع دخلوه السيارة وراحوا اني بكل هذا جنت احاول افتح الباب مالت السياره بس مقفول وخالتي من شافت ابنها هيج صار وياه فقدت، نزعت النقاب والعباية واجيت يمها جان اكو بطل مي موجود فتحته وغسلت وجهه وبديت اصحي بيها بس هي ولاحركه خليت أيدي على ركبتها اكو نبض أخذت موبايلي مبيه رقم احد حتى اتصل بيه فتحت جنطتها وطلعت موبايلها الحمد الله مجان بيه رمز فتحته بسرعه وجان اول رقم رقمه بسرعه تصلت بيه اول مفتح الخط حجيت بدون مقدمات.

فيروز: هَيْصَم نخطف واحنه على الطريق السريع لبغداد وخالتي تخربطت حيل اذا تكدر ادز احد اكون ممنونه.

لائِث: على كيفج مرت اخويه شوي شوي خليني افتهم شنو يعني هَيْصَم نخطف قبل نص ساعه اتصلت بيه وقوات الدعم راح توصلكم.

فيروز: اذا تبقى تحلل بهاي الطريقه نموت وانت بمكانك كتلك خالتي وضعها حيل صعب و هَيْصَم قافل باب السيارة وماخذ المفتاح وياه ما أكدر افتحها.

لائِث: هَيْصَم مو غبي لهاي الدرجه دوري عدل الجكمجه تلكين المفتاح موجود.

فيروز: هياتها كدامي الجكمجه مابيها شي.

لائِث: لعد أخذه وياه.

فيروز: تضحك عليه انتَ؟

لائِث: اعصابج مرت اخوي وسولفيلي شلون نخطف طلعوا من الجامه مالت السيارة لو هو نزل سلم نفسه بكل رقي؟

فيروز: هو نزل.

لائِث: كم واحد جانوا؟

فيروز: اربعه.

لائِث: تذكرين رقم السيارة؟

فيروز: خاصه.

لائِث: دقايق واحنه يمكم لتخافين ان شاء الله ماكو شي.

فيروز: مخايفه اعرف هَيْصَم وشجاعته ميحتاج اطمأني على الأسد.

: غلقت الخط وبقيت احاول اكعدها وبالف ياعلي يلا فتحت عيونها المشكله ما أكدر افتح الجامه حتى تتنفس هوه طبيعي وعقلي وكلبي يم الهَيْصَم وهي تبجي وحالتها حاله احتاريت اصبرها لو اصبر نفسي بس اريد افهم لشوكت يبقى هذا العذاب مو والله راح اموت.

ضَرْضَم: شنو الموضوع؟

لائِث: هَيْصَم نخطف.

هَمْاس: كول غيرها يمعود هَيْصَم ينخطف بهاي السهوله!!

لائِث: النكته مو هنا.

هَمْهَام: احجي وخلصني شنو صاير بالضبط؟

لائِث: الأخ هو اللي نازل الهم.

ضَرْضَم: تضحك علينا انت؟!

لائِث: لا والله هاي الحقيقه.

هَمْاس: وهسه شنو الحل؟

لائِث: راح نساعد خالتي وعائلته ونبقى منتظرين.

هَمْهَام: بلكي صار عليه شو انتوا مخايفين ابد!!

لائِث: ليش نخاف واضح جداً هي خطه من عنده.

ضَرْضَم: مع هذا لازم نسير وي التيار مثل ميريد هو نسوي.

لائِث: راح اصيح بصوت عالي وانتوا الطموا.

هَمْاس: بدون شقه لائِث الوضع ممتحمل سخافتك.

لائِث: تره اشمرك من الجامه خليني محترمك.

هَمْهَام: وانت ليش هيج عصبي؟!

لائِث: لان المحترم اتصل بيه ودعني ونطاني وصيته خله جسمي كله يرجف تخيلت راح احضر عزاءه بعدين تطلع خطه افتهمنا يريد يوصل فكره للطرف الثاني انو راح يودع بس مو يخوفني هيج وهسه امه الله اعلم شنو حالها تركهن نص الشارع وراح.

ضَرْضَم: لهذا السبب كلنه لازم نسوي مثل ميريد مامعقوله يسوي كل هذا عبث اكيد اكو شي صاير بعدين لتنسى احنه عدنا علم بمكانهن وسيارته مراقبه من يمنه.

لائِث: خليه يرجع والله كريم نشوف تاليها وي الهَيْصَم وهاي المهمه الماعدها نيه تخلص وتريحنا.

: فتحت عيوني بمكان أظلم سمعت صوت حركه يم الباب سويت نفسي فاقد، قتربت الخطوات من يمي اكثر وايد لزمت وجهي الواضح جاي يلعب بعداد عمره ميعرف اني اكره اللمس من النساء مابالك بالرجال، فتح أيدي وسمعني صوته.

غضنفر: سيدي اعذرنا عن اللي صار لكن الوضع اطلب نسوي هيج.

هَيْصَم: اني اعرف بلي صار مع هذا اني شنو نبهت مو كلت اوصل اهلي للبيت بالأول بعدين تصير العملية؟

غضنفر: كلامك صح لكن الأمر اجه من فوك لازم نستعجل بكل الأحوال انت حياتك مهدده بالخطر لو ما اجينا ونقذناك جان هسه كلكم بالانعاش بالمستشفى اذا مو ميتين.

هَيْصَم: اكو سيارة تراقبهم؟

غضنفر: اكيد مراح نخلي اهلك بالخطر اكو حمايه الهم ولائِث والفريق مالتك قريب عليهن.

هَيْصَم: لشوكت ابقى اهنا؟

غضنفر: حتى نعرف منو اللي يهددك.

هَيْصَم: على اساس انت متعرفه.

غضنفر: جوعان تحب تاكل شي؟

هَيْصَم: غضنفر عشت ويايه سنين طويله ودربنه بنفس المكان ولازم تعرف اسلوبك هذا ميعجبني، لتحاول تستفزني حتى لو احنه اصدقاء يبقى الوقت مو مناسب لهيج تصرفات.

غضنفر: صدك نسيت اباركلك يارب السعادة الأبديه وياها.

هَيْصَم: اذا بقيت عايش.

غضنفر: وتصير اب لأشبال الهَيْصَم.

هَيْصَم: بعدك تذكر؟

غضنفر: إيام متنسي بوقتها جنت شخص مجروح وتعالجنه سوه.

هَيْصَم: طلع عندي هوايه اصدقاء حسبتهم بس فريقي.

غضنفر: اني هم جزء من الفريق لتنسى.

هَيْصَم: الفريق المغيب.

غضنفر: تذكر الوعد اللي وعدنا بيه انفسنا قبل تسع سنوات؟

هَيْصَم: مكدرت انسى شي من الماضي فلتكلي تذكر.

غضنفر: لازم تعرف ممنوع تموت قبل تحقيقه.

هَيْصَم: عزرائيل اذا اجه مراح يطلب أذني غضنفر.

غضنفر: ادفع صدقه سمعت أطول العمر.

هَيْصَم: اذا متت انت تأخذ ثاري.

غضنفر: مراح اخذ ثارك وحتى الفاتحه ما اقراها على كبرك خلي عندك علم وياويلك تجيني بالحلم اهجم عليك ابيكيسي.

هَيْصَم: عندي بيت اريد تسجله باسم وحده.

غضنفر: زوجتك؟

هَيْصَم: اي.

غضنفر: لهاي الدرجه الوضع خطر وصرت توزع الورث على اهلك؟

هَيْصَم: اكو صفه مشتركه بيني وبينها وهي عزت النفس اذا صار بيه شي مستحيل تبقى عايشه وي أهلي لذلك أريد أأمن مستقبلها في حال صار شي مستقبلاً.

غضنفر: بس هي عدها بيت.

هَيْصَم: هذا البيت مختلف اله نكهه خاصه.

غضنفر: نام سيادتك هاي العطله مراح تجيك يوميه.

هَيْصَم: شكرا للنصيحه لكن النوم عدوي بهيج وقت اتصلي بلائِث خلي نعرف وين صار.

: بقيت اترقب الطريق، انتبهت اكو سياره بعيدة عنه حيل واكفه على الترابي خفت ليكون هم أعداء الهَيْصَم ويردون يسوون شي بينا رجعت اتصلت بيه بس ميرد خالتي منا منهاره صعب اتحمل هيج وضع سيء كعدت وبقيت صافنه بالفراغ وين جنت وين صرت صدك رب العالمين يغير من حال لحال برمشة عين حياتي كلها مجنت متخيله اتزوج ضابط أو أي شخص ينتمي للسلك ومن اشوف اي شخص يستشهد ابقى ابجي على زوجته وعائلته على رغم مجنت اعرف احد بيهم مرت الدنيا وصرت فجأة زوجه لضابط وتعالي يافيروز عيشي مغامره على أرض الواقع بس مجانت ممتعه أبد مليئة بالخوف والرعب اسوء شي بالدنيا من تحس نفسك محاط بالموت من جميع الاتجاهات وفكره انو على اي دقيقه يدخل للبيت ملفوف بعلم تشل حالي وتخبلني رسمي،

الراتب بعمره مجان مهم اذا العمل محتومه نهايته شنو يفيدني راتبه اذا فقدت اماني وراحتي وياه لو شوفه وجهه وابتسامته اللي تنسيني همومي كلها وتحسسني بعدها الدنيا بخير الحب مرات مو مشاعر نحس بيها وإنما يجي على هيئة شخص يستأصلك من حزنك مثل مَيُستأصل المرض الخبيث، وياحسرتي اذا جان هذا الإنسان محاوطه ملك الموت من كل جانب، واني صافنه وصلت ثلاث سيارات وحده تشبه سيارة هَيْصَم والباقيات سيارات شرطه رجعت لمكاني بالسياره لان جنت بالصدر يم خالتي بسرعة لبست نقابي والعباية شفت نزل شخص من السيارات خالتي اول مشافته نزلت دموعها فتح الباب مالتها ونزلت حضنته وتبجي بقوه اني من شفتها هيج بجيت وياها موقف متتمنا لعدوك.

كلاثم: راح ابني أخذوا كدام عيوني ولك لائِث اخوك نخطف شلون بيه؟

لائِث: اخذي نفس ليصير بيج شي ويكتلني من يرجع مصار بيه شي والله خليج واثقه بيه هو بمكان آمن.

كلاثم: شلون يعني بمكان آمن وهو نخطف كدامي تضحك عليه انت؟!

لائِث: خلي نصعد بالسياره وسولفلج ميصير نبقى هنا اكثر يلا اصعدي.

السلام عليكم خيتي.

فيروز: وعليكم السلام.

لائِث: ياريت الموضوع ميطلع لغير مكان ولو اني اعرف بيجن متحجن لكن التحذير واجب، كل اللي صار جان خطه علمود ننقذه لان بالفترة الماضيه هوايه تعرض للتهديد من جماعات مجهوله وعلى أساس يصير بعد ميوصلجن لكن شاء القدر وشفتن كل شي للأسف.

كلاثم: وليش مكال من قبل على الاقل ميوصي وصية واحد يريد يموت.

لائِث: ابنج يحب الدراما.

كلاثم: حاسه تكذب عليه و هَيْصَم بي شي احجي الصدك تره والله اذا صار شي بعدين ازعل عليك.

لائِث: والله مبيه شي ليش متقبلين تصدكين؟!

كلاثم: لان هاي اول مره يسويها ويوصي وصيته كلبي ممرتاح ابد اعرف ابني هسه مو بخير.

لائِث: اتفائلي بالخير ام الهَيْصَم ميصير هيج تفكرين وهو مبيه شي وعايش الحمد الله.

كلاثم: لشوكت راح يبقى مختفي؟

لائِث: الله اعلم ماعرف.

وصلنه للبيت وقبل مننزل حاجته خالتي.

كلاثم: ما وصيك خلي اتصل بيك ولتجاوبني ساعتها ثق بالله اجي للمركز وكول تحرش ابنتي وابهذلك.

لائِث: والعباس اكول سوت هيج حتى اتزوج بنتها.

كلاثم: تربيه سزز تسوي هيج وي امك!!

لائِث: الله وياج خالتي ابنج منتظرني اخذله غده جوعان خطيه.

كلاثم: وصله كلامي ياويله اذا شفته قريب البيت واني اراويه على الرعب اللي عشنا بسببه.

لائِث: انيمه يمي وبلا منيتكم.

: نزلنه من السياره ودخلنه للبيت رحت بسرعة للحمام دخلت جوه الدوش بملابسي ونزلت دموعي المفروض اليوم يكون اسعد إيام حياتي ونحتفل بعقدنا بس حتى الفرحه البسيطه هوايه عليه شنو سويت حتى استاهل هيج عذاب؟

لكل انسان طاقه محدوده واني حسيت خلصت طاقتي بعد ما أكدر اتحمل راح يصير نص سنه واني عايشه برعب وخوف بدون ذنب والمشكله ما أكدر اتركه ولا أكدر اتحمل اعيش اكثر بهذا الوضع ياربي حلها من عندك لان صبري نفذ كلش.

ريفان: انت تخبلتي شنو تسوين؟!

حوري: ما أريده ابوه مو خوش انسان وأمه ماعدها اخلاق لمنو طالع للدنيا اذا من هسه شاكين انو هو مو ابن شرعي؟

أيفلين: حرام تقتلين نفس شلون ينطيج كلبج تأذين ابنج قطعه من روحج هذا!!

حوري: ابن حرام ما أريده لحد تصر عليه كلت يموت يعني يموت حتى اطلك من عنده واذا ميقبلون يفصلوني عنه والله العظيم انتحر بدون حياة مليانه ندم ومذله.

ريفان: تردين تموتين أرفد؟

حوري: بالعكس اللي اريد اسوي يريح أرفد وميخليه يحس بذنب.

ريفان: والله العظيم تخبلتي انتِ مو بعقلج ابد، اني اخته ماسلمت من عنده ومع هذا تعايشت وي الموضوع وصار شي طبيعي أرفد مقرر يطلكج بكل الأحوال لان هو من الأساس مجان قابل على العلاقه اللي بينكم بس اللي وكف كدام عينه هو ابنج لا أكثر لتموتينه وتضيعين تعب أرفد وياج سوه كل هذا حتى تعيشون، وصيري ضد الدنيا كلها المهم يعيش بصحه وعافيه شوفي اني على رغم مريضه بالقلب والكل تعرف نجاتي صعبه مع هذا الكل حارب ويايه حتى اعيش والحمد الله رب العالمين نقذني من موت محتم، احنه كلنا وياج وحتى نسر يجي يوم ويسامحج ارجعي لعقلج ولتسوين شي يغضب الله يبقى اللي صار بينج وبين محمد يحكمه العقد الشرعي ورب الكعبه راضي عليه على شنو تردين تموتين ابنج بعد؟

أيفلين: اذا همج نسر واللي سواه اني اضمنلج مراح يقترب من عندج مره ثانيه المهم تحافظين على نفسج انتِ والطفل.

حوري: ارفد وين اريد احجي وياه؟

ريفان: بالغرفة راح ينزل بعد شويه تكدرين ترحين يمه.

: صعدت واني كل اعتقادي يساعدني بهذا الموضوع، فتحت الباب بعد مطرقته وسمحلي ادخل اول مشافني ابتسم بوجهي وحجه ويايه بحنيه مثل مجان قبل رجع ارفد الشخص اللي رباني لكن اني اللي تغيرت هوايه وحنيته صارت سهام تخترق كلبي ودمرني حيل شنو سوه اليه وشنو جازيته، نزلت دموعي واقتربت من عنده بخطوات متثاقله نزلت راسي وكلت بغصه.

حوري: محتاجه مساعدتك اذا تكدر.

أرفد: اسمع، شنو أكدر اسوي واخلي ضحكت بنيتي ترجع مره ثانيه؟

حوري: ماريد الطفل وطلكني من محمد راح ابقى اذكر معروفك طول العمر.

أرفد: راح تسبيني طول العمر.

: رفعت راسي اله ابتسم بوجهي بس نظرته زرفت كلبي اشرلي بأيده على المكان اللي بصفه رحت يمه كعدت خله ايده على كتفي وكال بنبرته المعتاده.

أرفد: ماعندي مشكله اوكع ابنج لكن مراح تحسبين إيام لعيد ميلاده؟

لو بعد كم سنه مراح تفكرين لو ابني جان عايش شتريتله ملابس للمدرسه وفرحت بأول يوم اله دوام؟

هوايه ناس تتحسر على الطفل وانتِ تتخلين عن هديه الاهيه بس لان متردين ابوه!!

يمكن هاي الروح اللي مترديها هسه تكون سبب لسعادتج بالمستقبل مثل مصارت سبب لنجاتج، اني من الأساس جنت اعرف بيج حامل وهذا السبب اللي خلاني اتعاطف وياج، مشكلتي احب الأطفال وللأسف رب العرش كتبلي ما اصير أب بالوقت الحالي لذلك على مقدار ضوجتي من عندج على فرحتي راح يجي ضيف جديد للعائلة وعليه لتتخلين عن ابنج لأي سبب كان واني متأكد بس يمر كم اسبوع ويصير عمره اربع أشهر وتحسين بحركته داخل احشائج تندمين لان فكرتي تتخلين عنه يوماً ما، وهسه أمسحي دموعج وقويلي نفسج وبيني للكل منو هي حوري بنت أرفد ،لتخلين مجرد غلط صار وياج يدمر حياتج بالكامل اخذي من عنده الدرس والموعضه للمستقبل ولتخليه يأثر على حياتج بشكل سلبي كل شي صار انتهى وراح واني وياج ومستحيل اتركج وصدكيني محمد محال تبقين على اسمه مجرد يمر على زواجكم فتره وتولدين بسلامه اطلكج ومثل مربيتج اربي ابن بنتي واكون اله اب وخال هم لكن كل هذا مشروط بضحكتج وتنسيلي الضعف وتصيرين قويه الحياة بيها هوايه مشاكل وهموم اذا وكفنا على كل هم ومشكله فتره طويله تخلص حياتنا بدون فائدة ياريت وصلت الفكره بنتي.

: ابتسمت بوجهه ومسحت دموعي طول عمره ارفد راحه نفسيه اليه حضني لصدره وبقيت اشويه يمه بعدين طلعت لكن اكون صريحه اكو شي بداخلي ما أكدر امحيه بسهوله اللي صار حركلي روحي ودمرني فعلياً.

كلاثم: ماما فيروز كومي يلا ناكل سوه صار يومين وانت معتزله وحدج ميصير هيج وانت تعرفين عدل مبيه شي وهياتني امه وياج مخايفه عليه ومطمأنه.

فيروز: ومنو اللي تبقى طول الليل تبجي اذا مطمأنه؟

كلاثم: مع هذا لازم تصيرين قويه مو تضربين عن الأكل.

فيروز: تعبانه خاله تعبانه حيل، حجيت هيج ونزلت دموعي والله صعب ماكو احد يكدر يتحمل فكره حبيبه بخطر وميعرف عنه شي، ادمرت نفسيتي فد مره وعتزلت وحدي بالغرفه مالته، بقيت اشم عطر ملابسه لو اشوف صوره على الأنستا اللي جان ناشرهم، من اشوف وجهه وشواربه وغمازته وهو مبتسم اموت قهر اكثر والله ميستاهل يصير بيه شي، ليش احنه العراقين الموت ورانه بكل خطوه وكأن مايعرف واحد غيرنه؟

ليش الفكره مزروعه بعقولنا المنتمي للسلك لازم يكون عنده تواصل قوي وي عزرائيل باي لحظه يجي يقبض روحه بينما فعلاً هي هيج الجندي اليوم عدنا من يودع اهله ويطلع تحس خلاص احتمال وارد جداً يرجع ملفوف بعلم ومنو تكدر تتحمل هذا الألم من يصير الشخص اللي تحبه مجرد جثه تندفن تحت الارض،

ضحكته، سوالفه، نظراته، حنيته، كل شي بيه جان يعجبني ويجذبني يصير مجرد ذكرى، هاي الافكار تشبع بيها مخي وصارت تاكل وتشرب ويايه يوم يومين حتى صار اسبوع كامل وهو بعيد وماكو اي خبر عليه حتى لائِث بطل يتصل من كد متلح عليه خالتي اللي صارت كلش حزينه وكلما اجي يمها مشغله يمه ذكريني من كد معشنا بحزن هاي الأيام نسيت شنو يعني راحه نفسيه وطمأنينة، غابت الشمس وصار الليل الوقت اللي العشاق يشتاقون لاحبابهم بيه وتبقى تنتظر طول الليل اتصال أو رساله من عنده واني اعاين للنجوم من الشباك وكل فكري هسه يجي ويدخل عليه، خاب ظني مثل العادة صارت الساعة 2 بالليل وماكو اي خبر عليه خليت راسي على المخده مالته ونزلت دموعي وسرح عقلي بعيد بافكاره، تخيلت نفسي متزوجته وصار عدنه أطفال ونلعب وياهم واذا طلع للشغل نبقى منتظرين رجعته للبيت بلهفه، شنو يصير هسه لو يدخل من الباب ويفرح كلبي بشوفته؟

نمت واني بانتظار جيته بفارغ الصبر وعيني مبعدتها عن الباب ومابين صحوة وغفوه حسيت أيد تلامس وجناتي نزعجت من عدها ورجعت نمت شويه وحسيت بشي يجكجك بوجهي فتحت عيوني شفته كدامي عينه بعيني او وجهه قريب وجهي حيل ميفصلنه الا بعض سانتيمات،

شعور غريب معرفت شلون اعبر عليه فرحه، توتر، حب، كلهن جتمعن داخلي حسيت نفسي عايشه من صدك مديت ايدي وحضنته من ركبته حيل اريد احتفظ بيه داخلي وماخليه يبتعد الرعب اللي عشته بغيابه حسسني باهميته وغلاته عندي وعرفت اني لاشيء بدون الهَيْصَم.

هَيْصَم: مشتاقلج يروح الهَيْصَم، انتِ اكثر شي خطر على بالي طول الفتره الماضيه من بعد امي.

فيروز: لتروح وتعيفني وحدي هيج، والله ما اتحمل بُعدك هَيْصَم.

هَيْصَم: مراح ابتعد مره ثانيه وعد كل اللي صار هاي المره غصب عني وان شاء الله ميتكرر.

فيروز: عرفت منو هو؟

هَيْصَم: اي وعتقلنا وهسه هو بالسجن.

فيروز: شتاقيتلك كلش هوايه خلصت الليالي واني انتظر تفتح الباب وتدخل وتكحل عيوني بشوفتك بس جانت مجرد احلام وكل يوم انام ميته قهر.

هَيْصَم: معاش اللي يخليج تنامين مقهوره هذا اني رجعت وان شاء الله اعوضج عن كل يوم ضجتي بيه بسببي.

فيروز: مضجت بسببك وإنما عليك جنت خايفه يصير بيك شي واتيتم للمره الثانيه.

رفع راسه اليه نظرته مليانه حب ولمعه بيها مختلفه سحرتني كال بنبره هادئة.

هَيْصَم: تعتبريني ابوج وردايتي؟

فيروز: نفس الحنيه والحب، تخاف عليه مثل مجان يسوي، الله أخذه بنفس الوقت انطاني انتَ وما اريد اخسرك.

هَيْصَم: احبج بكل قواميس العالم لدرجه اريد اضمج بنص ضلوعي واحتفظ بيج يم كلبي ويحفظج القفص الصدري من كل مكروه.

فيروز: من وين تعلمت هذا الغزل؟

هَيْصَم: دخلت دورة يم غضنفر.

فيروز: منو هذا اول مره اسمع اسمه؟

هَيْصَم: واحد من الفريق وصديق عزيز هم بعدين تعرفيه.

فيروز: عندك أصدقاء هوايه مو مثل مكتلي قبل.

هَيْصَم: اكو أصدقاء واكو اخوه واكو انتِ كلب الهَيْصم مليان ناس حلوه.

فيروز: يعني تحبني مثل اصدقائك؟

هَيْصَم: تغارين من عدهم لَّباءَة!!

فيروز: لا ليش اغار هم مجرد أصدقاء مو أكثر.

هَيْصَم: عبالي تغارين كلت بهاي الحاله نترك الأصدقاء ونبقى يم النعمه الاهيه.

فيروز: نعمه الاهيه اني بنظرك؟

هَيْصَم: واحله نعمه هم لدرجه من اشوفج تنفتح نفسي للأكل.

فيروز: على سيرة الاكل ضعفان حيل مجانوا ينطوك اكل حبيبي؟

هَيْصَم: جعل محد غيرج يكول حبيبي.

فيروز: لتغير الموضوع ليش ضعفان هيج؟

هَيْصَم: لنفس السبب اللي خلاج تضعفين وخدودج ذبلانه.

فيروز: مجنت اشتهي اكل وانت بعيد عني.

هَيْصَم: واذا متاكلين شلون اكدر أكل؟

فيروز: وانت شلون تعرف مجنت اكل؟

هَيْصَم: الكلوب سواجي.

فيروز: خلي نكوم نسوي ريوك واكعد خالتي من يوم اللي رحت وتأخرت حالتها حاله.

هَيْصَم: اعرف شفتها وسلمت عليها قبل ما اجي يمج.

فيروز: يعني هي تعرف انت يمي هسه؟

هَيْصَم: اي اصلاً هي كالت روح يم مريتك جانت خايفه عليك حيل وحتى من تنام تهلوس بأسمك متخليني انام مثل الأوادم.

فيروز: والله انام اهنا مو يمها لان هي تبقى تبجي وتدعي ومن اشوفها هيج حيل اتأذه فأخليها على راحتها.

هَيْصَم:

لو كان لي قلبان لعشتُ بواحدٍ

وتركت قلباً في هواك متيمُ

فيروز: صاير تتغزل بالشعر سيد افندي!!

هَيْصَم: من كد مشتاقيت لعيونج صرت اسمع قصائد غزليه حتى اروي شوقي الأنثى الأسد.

فيروز: ويرتوي؟

هَيْصَم: لا وعيونج اشتاق اكثر وابقى اعصب على غضنفر حتى كلمه ميكدر يحجي ويايه.

فيروز: انت هم الرئيس مالته؟

هَيْصَم: فرقنا رتب مو اكثر.

فيروز: مو درستوا سوه ليش اكو فرق بالرتب؟

هَيْصَم: منو كال درسنا سوه؟

فيروز: انت كلت درستوا سوه بنفس الجامعة.

هَيْصَم: جنت اقصد لائِث لان هو صديق الطفوله على رغم هو أصغر من عندي بسنتين بس سواها الحظ وجمعنا بنفس الصف والمراحل الدراسيه.

فيروز: ليش انت راسب كم مره بصفك؟

هَيْصَم: راسب شنو ولج!!

اني جنت اشطر واحد بكل السنين الدراسيه بس مرت علينا سنين صعبه حرب وحصار او والدي جان من ضمن اللي يحاربون وقتها فمن يروح للمعركه ابقى اني يم امي اشتغل واعتني بعائلتي بغيابه فمدرست سنتين لهذا السبب اني وياه جنه سوه.

فيروز: وليش الرتب مالتكم مختلفه؟

هَيْصَم: لائِث عصبي حيل وميكتم غضبه لهذا السبب عقوباته هوايه لذلك هو اقل من عندي برتبه وحده مو اكثر.

فيروز: هم تشتغل بالواسطات؟

هَيْصَم: والله مستخدمت الواسطه وي احد بس بعض الأمور تكون مجبور بيها اذا خصت الفريق والمهمه.

فيروز: فريقك منو يحدده؟

هَيْصَم: اني اللي احدد أعضاء فريقي لان كلهم ثقه واعرفهم حق المعرفه.

فيروز: شنو المهمه مالتك؟

هَيْصَم: هوايه سالتي كومي ناكل ميت جوع وهسه امي تعاقبني وتحرمني من عندج انطتني مهله ربع ساعه كالت بس بوسه اهنا وبوسه اهنا وسوالفج نستني البوستين.

فيروز: أخذهم هسه.

هَيْصَم: بس هسه اريد تلاثه.

فيروز: الربا حرام.

هَيْصَم: بيع وشراء هذا مو حرام.

فيروز: والله هسه تجي خالتي خليها بعدين فدوة.

هَيْصَم: والله مشكلتج انتِ تحرشتي جنت رجال مسالم وانتِ ذكرتيني.

فيروز: لتخليها براسي انت اللي كلت اني محجيت شي.

هَيْصَم: وهسه؟

فيروز: انت مو جوعان خلينا ناكل وترك سالفة البوس بعدين.

هَيْصَم: اذا تركتها يزيد الربح وانتِ بكيفج.

فيروز: عندي مقترح شنو رأيك اني ابوسك وتخليني اطلع؟

هَيْصَم: تضحكين عليه لَّباءَة!!

فيروز: لا والله جديات.

هَيْصَم: يلا راويني.

فيروز: غمض عينك استحي وانت تباوعلي هيج.

هَيْصَم: والله انتِ والخجل أعداء من شوكت صرتي صديقته لهاي الدرجه؟!

فيروز: مشكلتك اذا متريد تغمض عينك اطلع بدون ما اسوي اي شي.

هَيْصَم: غمضت أمري لله.

رفعت رجليه واني كاتمه ضحكتي قربت شفايفي من جبينه وقبلته بتعدت واني اضحك وهو فتح عينه خازرني نظرتله بثقه وحجيت.

فيروز: فيروز اني سيد افندي أو مثل متكول أنثى الأسد يعني مو بهاي السهوله انطيك قبلاتي.

أجيت اطلع سحبني من أيدي وثبتني على الحايط وكال بمكر.

هَيْصَم: الحقوق تؤخذ ولا تعطى يا انثى الأسد.

عبث بملامحي وقبلني بأريحية معارضت لان جنت مشتاقتله حيل مثله واضعاف يمكن، يكولون انو النساء اذا حبت تكون مشاعرها اقوة وأصدق من الرجل لان تحس بيه هو كل شي الها، الاب، والاخ، والصديق، والحبيب، تنطي من الاهتمام والحب لدرجه تهمل نفسها بين طياته لهذا السبب النساء تراقب زوجها مو شك وإنما من فرط المشاعر اللي تحسها ناحيته تحس بيه ملك خاص مو من حق أي وحده تاخذه من عدها لأي سبب، صحيح احنه مكارات ودهائنا عظيم لكن بنفس الوقت بداخلنه حنية العالم بأكمله ولهذا السبب الرسول الاعظم قال (رفقاً بالقوارير) لان من صدك داخلنه هش وبسرعه ينكسر لكن احنه قويات لدرجه محد يلاحظ الضعف والألم داخلنه، البعض من يدخل وي بنيه بعلاقه حب وكل عقله يضحك عليها ويستغل مشاعرها حتى ياخذ اللي يريده ميعرف هو شنو حطم من انسان بريئ وغيره لواحد ثاني وحش تماماً، الحب شي طاهر ومقدس، مشاعر جياشه تتولد عند الانسان لذلك حاول قدر الأمكان تحترم الأنثى اللي نطتك كلبها.

: فستان ابيض وزهور حمراء، بخور وشموع وزفاف سيقام على جنازة وليست عروس فهل سينصفها القدر ام يكون مصيرها حطام بسبب ذنب اسمهُ الحب..

يتبع..

البارت اكثر من 3600 كلمه.

تصبحون على الف خير وعافيه شمعاتي.

حسابي الأنستا.

@zahraaahmedn99