البارت 40

للتواصل انستا zahraaahmedn99

علقوا بين الفقرات+ صوتوا للبارت+ تابعوا حسابي عيناي انتوا.

شاركوا القصه حتى نستمتع وي الهَيْصَم مع بعض

هَيْصَم

(الكاتبة زهراء احمد)

_______

هَيْصَم

اقتربتي بخطوات متثاقله

نظرتي بتلك العينين الواسعة

أزلتي القيود وكسرتي القاعدة

لامست كفاكِ تلك الروح الباردة

فأظرمتي نار العشق الحارقة

في قلبٍ كانت أمالهُ محطمة

وأزهرتي الربيع في أوراقه المتناثره

واحتضنتي بقلبك جروحي الداميه

وأوقعتي قلباً لمحياكِ خاضعاً

وامام وجهكِ خاشعاً

وبنظرتكِ ضائعاً

ولعشقكِ طالباً

ولملامحكِ حافظاً

ولطقوسكِ مؤدياً

يا مرحباً بكِ في حبٌ لاينتهي

ونيران عشقاً كلما اوشكت على الأمتلاء طالبت بالمزيد.

فيروز

يامعذبي قاتلي ومنقذي

ياصوتي وعيني ومسمعي

ياملمسي ووسادتي وغفوتي

متكأي ومسندي

عمري المنقضي

ثوانيي وساعاتي وأشهري

حبي الأول ودقات قلبي وعشقي

ياحضني الدافئ في ليالي الباردة

ياراحتي بعد سنين متعبه

ياقحط معاناتي

وياصبر احلامي

وياوصال كلماتي

أقبل بك عشقاً دائماً بدوام تنفسي

في يقظتي ومنامي

صحوتي وغفلتي.

خاطرة بقلمي

زهراء احمد

: من تشوف النهاية خلص صارت أقرب من الهوه على انفك تفقد التواصل وي العالم الخارجي وتستسلم للأمر الواقع اهنا اني خارت كل قواي الجسدية واكتفيت اباوعله تمنيت التمس من عنده الرحمه بهاي اللحظه بس جان شخص بلا ضمير فعلاً، دفع الباب ودخل وكالعادة هو اللي لازم ينقذني بكل مشكله ،ضربه على راسه حتى يبتعد عني وصدك بتعد وكعت وصرت بحضن امي اللي اجت على الصوت مو بس هي ريفان وايفلين هم، اللي اخذ تركيزي شغلة وحده من كل اللي صار وهو ارفد شلون دمه حار ويضرب بنسر اللي راد يقتلني بدم بارد قبل شوية.

أرفد: طايح الحظ حتى الحيوانات الها طقوس بالقتل شلون تكدر تحكم على اختك الوحيدة بالإعدام وتنفذ بيها الحكم بدون محد يدري متخاف الله انت؟!

ومفكر اذا ماتت انسى واطلعك من السجن بقضية غسل عار!!

وحق الخلقك ادفنك وياها بنفس الدقيقه وحتى الفاتحه ما اقراها على كبرك.

نسر: قبل متحجي ويايه بهاي الطريقه شوف اختك المحترمه شنو موجود بطنها وابن منو؟

أرفد: عاجبك اموتك والله كول ماعندي مشكله، اختك ياعديم الغيرة متزوجه مجابت ابنها من الحرام ولتنسى شنو سويت انت ،جنت احجيلك قبل الدنيا دين ومثل مسويت طلع باختك.

نسر: اللي يسمعك يكول محبل عشرة هي وحده وتزوجتها كدام الناس كلها ماعقدت عليها بالمضموم الحب الحقيقي هو اللي يحارب علمود حبيبته بس هذا الساقط شنووو سوه نزل روسنا بالكاع تدري لو متدري؟

أرفد: والله اني راسي مرفوع بيها واللي يحجي عليها اشك حلكه على اساس الناس كلهم النبي محمد لو الإمام علي اقسملك واني على كد كلمتي كل واحد يبيع شرفيات براسك هو اكبر سرسري تشوفه بحياتك كلها لو كلنه مشينا وره حجي الناس مصار براسنا خير، القتل جريمه كبرى والروح اللي ينطيها الله مو من حق أي كائن على وجه الكره الأرضية ولاي سبب كان يسلبها، شما طولت حياتك مصيرك تصير بالقبر من يسألك رب العباد ليش قتلتها شنو يكون جوابك؟

ارتكبت الفاحشه وسويت وياها القصاص الشرعي؟

لو شنو العذر اللي راح تقدمه؟

جمله وخليها ابالك اقتنعت ماقتنعت يضربك ألم، اختك متزوجه وحتى لو حامل اللي ابطنها ابن شرعي ما ألك حق تمس اظفرها لان وقتها اموتك بأيدي وميرفلي جفن.

نسر: وانت ليش مأيدها على الخطأ؟!

أرفد: مأيدت على شي يكفي تبريت من عدها وشلت أيدي من مسؤوليتها بس هذا ميعني ابداً اخليك تموتها داخل بيتي واني اتفرج والصبح أخذها ادفنها ولا كأن شي صار، سوالف الهمج بطلها احنه ناس واعين نسر.

نسر: لتعتبرني وياك من اليوم وصدكني لو يموتها ذلك الثور اللي فضلته على أهلها وسمعتهم بجنازتها ماروح وتنسى عدها اخو اسمه نسر بنات آخر زمن مخلصاتها حب وماحب وهي بيضه لنفسها مثل الأوادم متعرف تسوي.

أرفد: يومك ويوم محمد قبل يومها وخلي تتبره من عدها الدنيا كلها بس من يصير الموضوع يخص سلامتها ارتكب جريمة، مربيتها كل هاي السنين حتى تستفردون بيها وكل واحد بيكم يصير رجال براسي اطيح حظكم واشمركم وره الشمس وانسى أخلاقي والاحترام واراويكم الوجه الثاني للدكتور أرفد، حوري بنتي واللي يمسها يمسني وأريد رجال ينزل دمعه من عيونها مو قطرة دم.

: من اشوفه هيج يدافع عني ابجي اكثر وكلبي يموتني ألم مجان يستاهل اخليه بهيج موقف وعلى رغم اللي سويته بعده يدافعلي ويستقتل علمودي على رغم كلنه نعرف نسر وارفد علاقتهم مو فقط اخوه وإنما اصدقاء حتى سرهم واحد بس وكف ضده بسببي شسويت بنفسي اني وين وصلت لأي مرحله من الانحطاط؟

ناهده: يمه اسم الله ارفد الحكلي حوري ماعرف شبيها.

أرفد: اطلع بره ماريد اشوف وجهك وياويلك المح ظلك قريب من غرفتها، وخري شويه من يمها خليها تتنفس الحقير خانكها حيل اكيد تضررت، ريفان حبيبي جيبي جهاز الضغط والسكري.

ريفان: تمام.

ناهده: ها يمه شنو بيها؟

أرفد: شنو رايكم تطلعون بره وتخلوني اشوف شغلي بدون توتركم؟

ناهده: يمك ما اطلع اشتغل واني موجوده.

أرفد: مبيها شي مجرد هبوط ضغط باجر لازم أخذها للمستشفى حتى نسويلها فحص عام ونتأكد من سلامتها.

ناهده: اني البس نقاب واخذها لدكتور باطراف الحله حتى محد يعرف.

أرفد: اني اريد اعرف نسر من وين اله خبر؟!

ناهده: اخوك متعرفه اكيد مراقبها هو اصلاً من انت مموجود مسوي نفسه علينه فد مره.

أرفد: الله كريم لازم تنحل متبقى هيج.

طلع من الغرفه تبعته.

ريفان: شنو مقرر تسوي؟

أرفد: اعذريني لكن اخوج مو حمل مسؤوليه مستحيل اخلي اختي يمه فترة طويلة بس خلي تعدي هاي الفتره على خير وحتى لو يصير النفس اللي تموت بدونه اخليها تموت يمي وما تعيش يوم واحد يمه.

ريفان: محظوظين انت موجود بحياتنا ربي ميحرمني من عندك حبيبي.

أرفد: والله كل مره تثبتلي الدنيا انتِ حظي بهاي الحياة والشخص الوحيد اللي الكي راحتي يمه ، تعالي لحضني اريد احس نفسي عايش ري كلبي.

: مرات ترزقك الحياة شخص يكون تعويض عن كل الايام السودة اللي عشتها قبل وأشكر ربي الف مره على وجودك بحياتي هَيْصَم.

هَيْصَم: غزل تالي الليل وانتِ بعيده ومكابل بس المجرمين تردين تموتيني لَّباءَة؟

فيروز: اسم الله على كلبك حبيبي عمرك طويل ان شاء الله ونبقى سوه.

هَيْصَم: حبيبي!!

فيروز: ليش متفاجئ هيج؟!

هَيْصَم: خايف اطلع احلم ومن اكعد انصدم بواقع محلو.

فيروز: بالواقع والحلم انت حبيبي وقطعه من كلبي.

هَيْصَم: وين جانت هاي الرومانسية مضمومه؟

فيروز: مجنت زوجي قبل.

هَيْصَم: احبج لَّباءَة الهَيْصَم.

فيروز: احبك يروح لَّباءَة.

هَيْصَم: اريد اخذج للمول باجر عندج شي؟

فيروز: ماعندي شي بس ليش؟

هَيْصَم: نشتري اشياء للعقد عاجبني نسوي حفله.

فيروز: ميحتاج هاي اشياء شكليه متهمني هَيْصَم.

هَيْصَم: بس أني تهمني لتنسين هذا هم عرسي وحاب أفرح بيج.

فيروز: اذا هيج مو مشكله.

هَيْصَم: صايره تقتنعين بسرعه على عكس العادة!!

فيروز: محجيت شي ضد قناعاتي.

هَيْصَم: عندج شروط لَّباءَة؟

فيروز: كتلك من البدايه العلاقه اللي تكون مشروطه مراح تنجح لذلك ماعندي اي شروط.

هَيْصَم: هذا حقج لازم تنطين شروط ما أريد اضلمج ويايه حبيبي.

فيروز: هذا الموضوع نتناقش بيه وجه لوجه مترهم موبايل وتصال.

هَيْصَم: مثل متردين يروح الهَيْصَم.

: بقينا نسولف بمواضيع مختلفه حتى نعست وغلقته ثاني يوم الصبح وكالعادة الروتين نفسه وخالتي بعد اللي صار معافتني وماعرف ليش هَيْصَم ميقبل اعيش وي خواته فهي بسبب اعناد سيد افندي متركتني وحدي، خلص اليوم بشكل طبيعي حتى صارت الساعه اربعه اتصل بيه هو قبل نص وخبرني انو راح يجي وصار لازم البس نقاب وعبايه ميقبل اطلع هيج وعلى رغم اختنك ومعاجبني الموضوع من الأساس بس مع ذلك اسكت لان اعرف اني وياه مراقبين وخاصتا بعد اللي صار صرت ما اعترض على اي شي يكوله شفت السالفه حقيقه مو بس تخويف اليه، الوضع كلش يلعب النفس ولايطاق من تعيش بالخوف والرعب طول الوقت ومتعرف النهايه شوكت ويخلص كل هذا وترجع حياتك طبيعية، ماعرف شنو يستفادون من يراقبوني بهذا الشكل وكأني شخص مهم!!

هَيْصَم: خلصتوا؟

كلاثم: اي أمي خلصنه.

هَيْصَم: راح اتعبج ويايه اليوم حجيه.

كلاثم: تدلل انت وبنتي شنو عندي غيركم.

هَيْصَم: وتعذرنا لَّباءَة ميصير تنزل من السيارة راح تختار اللي يعجبها وهو يوصل يمها.

فيروز: مو مشكله من الأساس اصلاَ ماكو داعي لكل هذا لو ما انت اصريت على الموضوع.

هَيْصَم: اذا بقيتي ممكن يصير اي شي واحنه مموجودين بالأضافة اذا نزلتي من السياره ممكن يكون خطر عليج وعليه ماكو حل غير هذا.

كلاثم: اني عندي فكره شنو رأيك تخليها يم البنات هم تتعرف عليهن وتغير جو.

هَيْصَم: لا خليها ويانه افضل.

كلاثم: غير اعرف ليش كل هذا العناد عندك؟

هَيْصَم: سلامتها يوم وسلامة خواتي لحد الأن منعرف منو الشخص اللي اجه للبيت شلون ترديني أأمن عليها بعيدة عني؟

كلاثم: بس انت مأمن عليها واني موجوده شنو الفرق؟

هَيْصَم: اكو حمايه محاوطه البيت بالأضافة غيرت كل الأقفال وسويتها الكترونيه محد يكدر يدخل غيري لهذا السبب مأمن عليكم داخل البيت مو خارجه، لائِث راح يكون موجود وياج واني راح ابقى يمها من نوصل اتصلي فيديو حتى تختار شنو يعجبها.

كلاثم: يارب تنتهي هاي الازمه وتعدي على خير ويحفظكم ربي حبايبي.

هَيْصَم: ويحفظج النه ياغاليه.

: طلعنه من البيت وصعدنه بالسيارة ختنكت ونزعت النقاب بسرعه اول مشافني ابتسم جبرني ابتسم اني هم، بعض الأحيان اخلاق المقابل تغير المود، وصلنه ونزلت خالتي اتصلت بيه فيديو ومحبيت ازعجها واني اعرف هي رجليها تأذيها مترهم اخليها تفتر هوايه بسببي اختاريت حي الله شغله حتى منتبهت على التصميم غلقت الموبايل ورفعت راسي لكيته صافن بوجهي نزل عليه الخجل فجأة درت وجهي للشارع وصفنت بحياتي الجايه قاطعني وهو يكول.

هَيْصَم: اذا ختاريت تصاميم ذهب على ذوقي يزعجج هذا الموضوع؟

فيروز: ماكو داعي تكلف على نفسك هَيْصَم.

هَيْصَم: مجاوبتي على السؤال يزعجج اختار اني لو تحبين نختار سوه هسه؟

فيروز: بعقلك تصميم معين؟

هَيْصَم: اي وعاجبني اسويه مفاجأه الج يوم الحفله لكن مع هذا اذا مجان عاجبج نغير كل الموضوع ونشتري هسه على ذوقج.

فيروز: مشتري انت؟

هَيْصَم: طلبت تصميم معين وكاعد يجهزون بيه لكن هذا ما اله علاقه باختيارج اذا تحبين ننزل هسه ونختار على حسب ذوقج.

فيروز: ماكو داعي بما انت اختاريت خلص.

هَيْصَم: مترهم هيج لازم تلبسين مثل متحبين انتِ يلا نزلي خلي نشتري.

فيروز: هَيْصَم شنو الموضوع، انت من الأساس مردت انزل شنو صار هسه؟!

هَيْصَم: غيرت رأيي لازم ننزل.

فيروز: اكو شي صاير كول لتخليني أمام الأمر الواقع بعدين.

هَيْصَم: ماكو شي والله شبيج مجرد اريدج تختارين معجبني الوضع انتِ كاعده وامي تختارلج اللي تردين تلبسيه.

فيروز: مرتاحه هيج شنو ملبست يكفي انت موجود.

هَيْصَم: ليش تعاندين؟!

فيروز: حتى تكول الحقيقه ليش تريدني انزل؟

هَيْصَم: لان لازم تنزلين.

فيروز: جواب مو مقنع.

هَيْصَم: السيارة مراقبه لازم ننزل لان ممكن يهجمون علينه بعبوة ناسفه او بسلاح متعرفين شنو يطلع من ايدهم.

فيروز: وليش كلت هسه؟

هَيْصَم: لان نتبهت عليها هسه.

فيروز: وخالتي؟

هَيْصَم: لائِث وياها هو يرجعها للبيت.

فيروز: تعرفه منو؟

هَيْصَم: أعداء الهَيْصَم هوايه نسيت احسبهم.

فيروز: ليش كل هذا يصير وياك؟

هَيْصَم: هذا اللي يشتغل بالسلك تكون حياته مهدده بجميع الأوقات.

فيروز: الى متى؟

هَيْصَم: حتى نستشهد.

فيروز: ليش متترك هذا العمل إذا هيج خطر على حياتك؟

هَيْصَم: لو كل شخص يشتغل بهذا المجال قرر يترك علمود سلامته منو يبقى للعراق؟

فيروز: وحياتكم هيج رخيصه يعني؟!

هَيْصَم: العراقين كلهم حياتهم رخيصه متشوفين الموت شلون صاير بالشوارع على اتفه الأشياء، وهسه يلا تحركي قبل ميصير شي ونبقى واحد يلطم على الثاني.

: نزلنه من السيارة لزم أيدي جان اكو ازدحام دخلنه بنصه وبقينا نمشي مسافه كلبي مطمأن على رغم الوضع كلش خطر خاصتا وانت تشوف نفسك على بُعد خطوة وحده من نهايتك المفروض اترك ايده واكعد ابجي بس وجوده منطيني الأمان هذا الشعور اللي احسه فقط من اخلي عيني بعينه، توقفت يمنه تكسي فتحلي الباب وصعدت وهو صعد بالصدر وبقى يسولف وياه.

هَيْصَم: خليهم يراقبون سيارته ونعرف منو هو.

ضَرْضَم: من شوكت حسيت بيه مراقبك سيدي؟

هَيْصَم: من وصلنه للمول بقه متوقف وره السياره بدون حركه عرفت مراقبيني.

ضَرْضَم: شاك بأحد سيادتك؟

هَيْصَم: هو نفس الشخص اللي دخل للبيت واني مموجود ماكو واحد غيره.

ضَرْضَم: الأسود؟

هَيْصَم: هذا جبان على انو يسوي هيج شي اللي يدخل لبيتي لازم عنده جرأة وشجاعة وهوايه خبال لان على رغم معرفته بالعواقب مع ذلك دخل.

ضَرْضَم: ترك رسالة؟

هَيْصَم: مجان هدفه ينطيني علم انو دخل للبيت وإنما شي ثاني.

ضَرْضَم: الخطف.

هَيْصَم: او القتل.

ضَرْضَم: الوضع صار خطر سيادتك لازم تاخذ إجراء قبل ميصير شي مو زين.

هَيْصَم: متخذ إجراء لتفكر راسم خطه الجني الأزرك متخطر على باله اخليهم كلهم يوصلون إعدام بس محتاج شوية وقت.

ضَرْضَم: احنه كلنه وياك سيدي.

هَيْصَم: عندي ثقه بيكم ضَرْضَم.

ضَرْضَم: هَمْاس يتصل سيادتك.

هَمْاس: سيدي عرفت الرقم مال السيارة وكدرنه نراقبها من عنده.

هَيْصَم: عاشت ايدكم اطلعوا دوريه وعتقلوه مسافه الطريق واني يمكم.

هَمْاس: أمرك سيدي.

هَيْصَم: الو.

لائِث: شتاقيتلك تدري؟

هَيْصَم: ادري، وين وصلت؟

لائِث: الراس الشارع شويه ونزل محتاج شي حبيبي؟

هَيْصَم: اترك الشقه على صفحه وجاوب مثل الأوادم.

لائِث: امك شويه وتشمرني من الجامه لان مخليتها تشتري شي.

هَيْصَم: كل هذا مو مهم المهم سلامتهن لاحكين على كل شي بعدين.

لائِث: مسافة خمس دقايق او اوصل للبيت وانت؟

هَيْصَم: بعد متوصل روح وره هَمْاس واني جاي وراكم.

لائِث: لهاي الدرجه الوضع خطر هَيْصَم؟

هَيْصَم: اذا بقيت تسأل هاي الأسئلة انموت كلنه وممسوين شي شوكت تبطل هذا الأسلوب لائِث مو راح انجلط بسببك.

لائِث: اسم الله عليك حبيب.

: وصلنه للبيت نزلنه اني وياه أجيت ادخل وقفني.

هَيْصَم: انتبهي على نفسج ولتفكرين هوايه ميصير شي غير اللي كاتبه رب العالمين كوني مطمأنه.

فيروز: ان شاءالله مكاتب غير كل خير.

هَيْصَم: ان شاءالله.

: هو راح واني دخلت للبيت وخلص اليوم بشكل طبيعي بس عقلي مبطل تفكير بكلامهم منو هذا المستقتل حتى يموتنه؟!

هَيْصَم: اي يحلو غرد ليش جنت تراقبني؟

جبل: مجنت مراقبك سيدي واكف كدام المول انتظر عائلتي لا أكثر هذا هم عليه عقوبه؟!

هَيْصَم: بس عائلتك مجانت موجودة بالمول تنتظر منو داخل السيارة؟

جبل: انت مراقبني؟

شلون عرفت عائلتي مو داخل المول؟!

هَيْصَم: انت كلت هسه، لتتوتر اخذ نفس عميق وازفره بعدين جاوب بكل راحتك ليش جنت مراقبني؟

جبل: كتلك جنت منتظر عائلتي داخل المول وانت حر بتصديقي او لا.

هَيْصَم: تمام براحتك انت تحب تحجي تحت التعذيب، دائمآ تختارون الطريق السيء على رغم انتم تعرفون راح تعترفون بالنهايه هذا الشي منتهين من عنده بس مراح اخليها بنفسك.

جبل: من حقي اطالب بمحامي هذا الدستور شرعه.

هَيْصَم: طلبت حقك اصلاً بكل الأحوال راح يجيك محامي خارج عن القانون مصيره يكعد بهذا المكان اللي انت كاعد عليه هسه وتم محاكمته بنفس الطريقه.

لائِث: سيادتك المزعج وصل يريد يدخل.

هَيْصَم: حياه الله خلي ينورنا صار فتره طويله مشايفه.

محمد: السلام عليكم سيادة النقيب هَيْصَم المحترم.

هَيْصَم: وعليكم السلام حضرة المحامي.

محمد: ولو ماكلت محترم بس مو مشكله تمون، اي شنو التهمه؟

هَيْصَم: راد يقتلني اني وزوجتي.

محمد: استغفر الله الا القوارير هسه هو مو مشكله بس مرته ليش؟!

هَيْصَم: شنو رأيك تلزم الصمت وتخلينا نسمع سيد جبل شنو يحجي.

محمد: شنو هذا الاسم حسيت نفسي بالهيبه.

هَيْصَم: راح اطلعك من الغرفه لتفكر اني عاصم محمد احترم نفسك والمكان اللي انت بيه والشخص اللي تحجي وياه تره لصبري حد وتعرف الهَيْصَم اذا كال كلمه ينفذها لو على موته.

محمد: انت تعرف النهايه سيادتك ليش تعب نفسك بهذا الموضوع؟!

هَيْصَم: نورني شنو هي النهايه؟

محمد: يطلع بكفاله وهذا التحقيق كله ميفيد.

هَيْصَم: والله ماعندي هيج توقع هاي المره لان هدد سلامة ضابط بالجيش العراقي يعني موكلك اليوم حصتي.

محمد: الأسوّد دائماً تفكر بالحصص.

هَيْصَم: غلطان الأسوّد تاخذ الفريسه اما الثعالب تجي تاكل وراها وأعتقد اذا انت ذكي كفايه اكيد فهمت المقصد حضرة المحامي.

محمد: بكل الأحوال يطلع كفاله.

هَيْصَم: ومنو كال ما أريد يطلع؟!

محمد: اذا هيج ليش تحقق وياه؟

هَيْصَم: احب اتعرف على ناس جدد ونطلع على تفكيرهم الاجرامي.

محمد: وبرأيك راح تعرف مخططاته من مجرد تحقيق؟!

هَيْصَم: اني اللي أحقق اهنا لتنسى شغلك محمد.

محمد: على كل حال موكلي ممجبور يحجي شي حتى تنطي دليل بمحاولة القتل ألك ولزوجتك.

هَيْصَم: ضَرْضَممم.

ضَرْضَم: سيدي.

هَيْصَم: انطي التسجيل مالت الكاميرا لحضره المحامي حتى يعرف احنه ناس نشتغل بذمه وضمير.

محمد: وقوف سيارته أمام المول ميعني أبداً يريد يقتلك او مراقبك.

هَيْصَم: وحساسي؟

محمد: ومن شوكت الشرطه تمشي على احساسها؟

هَيْصَم: من اليوم عندك اعتراض؟

محمد: هذا الشي خارج عن القانون تتحاسب عليه، تدري لو لا؟

هَيْصَم: واني شرطي خارج عن القانون تدري لو لا؟

محمد: حتى كلماتك تتحاسب عليها متخاف أرفع بيك دعوة؟!

: ضحك بصوت عالي وبانت غمازته اني اشوفه من وره الجامه واعرف بعد هاي الضحكه راح يطلع وجهه الثاني خاصتا اذا جان بالتحقيق.

هَيْصَم: تعجبني ثقتك حيل بس للأسف اني ماعندي وقت لتفاهتك لذلك خلص وقتك اهنا تعال باجر، لائِثثث.

لائِث: سيدي.

هَيْصَم: اخذ جبل وعتنيلي بيه اما المحامي ان شاء الله نشوفك غير مرة.

: خلص اسبوع كامل وقله اشوف هَيْصَم يتواجد بالبيت وحتى اتصالاته كلش قليله، كعدت من النوم واني كلش ضايجه لان ماعرف عنه اي خبر البارحه اتصلت بيه الف مره وميجاوب جانت الساعه سته الصبح كمت من مكاني ورحت توضيت وصليت ورجعت اتصل بيه من كد معصبت خطر على بالي اكسر الموبايل بالحايط بس تراجعت من تذكرت شلون اتصل بيه، كلبي وعقلي توقفوا تماماً عن التفكير فقط شي واحد اخذ كل شي بيه وهو هسه يتصلون بيه ويكلولي البقيه بحياتج تعوذت من ابليس ورجعت اتصل بيه نزلت دموعي ونفعلت حيل طلعت من الغرفه ورحت لغرفته اول مفتحت الباب نصدمت بيه نايم على الجربايه جحظت عيوني يعني اني صار ساعه اتصل بيه تاليها يطلع اهنا ومينطيني خبر هوايه اشياء خطرت على بالي اسويها مثل اجيب كلاص مي واشمره على وجهه لو اعضه بإذنه وحتى افززه من النوم واخوفه من الصبح، بس من صفنت بملامحة نسيت كل شي جنت افكر بيه، اقتربت من عنده وبقيت صافنه بوجهه عجبني أقرب أيدي من وجهه، جنت متمنيه من زمان الزم شواربه والصراحه مَخليتها بنفسي قربت أيدي وصرت امررها على وجهه سحبت شواربه خباثه وابتسمت من عقد حاجبه عرفته راح يكعد لان نومه كلش خفيف بس الواضح تعبان حيل رجع نام مره ثانيه ضجت اكثر حتى بالوقت اللي يكون متواجد بيه بالبيت ما أكدر اشبع من عنده واشوفه مو حياة هاي، رجعت سحبت شواربه مره ثانيه رفع ايده وضرب أيدي خفيف فتح عيونه على كيف وحجه وبحة النعاس مبينه بصوته.

هَيْصَم: خليني انام عندي موعد الساعه ثمانية.

فيروز: يعني هم تريد تطلع؟

هَيْصَم: اي وانتِ تجين ويايه.

فيروز: وليش اجي وياك اني شكو؟!

هَيْصَم: حتى تصيرين مرتي قانوناً يحلوه، أجلنه هوايه وصار الوقت يتم العقد.

فيروز: والفحص والإجراءات كل شي مسوينه احنه؟

هَيْصَم: كمل كل شي بس توقيعي وتوقيعج على رغم هم راح يصير تحت حراسه امنيه هم ماكو حفله اليوم لَّبوتي.

فيروز: ماكو مشكله اني من الأساس كتلك متهمني الشكليات المهم وجودك بحياتي حبيبي.

هَيْصَم: شنو رايج نسوي العرس الخميس؟

فيروز: ليش مو اليوم مو احسن.

هَيْصَم: والله ماعندي مشكلة حتى لو تردين هسه، زوجج حاضر بجميع الأوقات.

فيروز: اريد انزف من بيت أبويه هَيْصَم.

هَيْصَم: تدللين طلبتي حقج.

فيروز: راح تسويها علمودي؟

هَيْصَم: عيوني الج لَّباءَة واعتبر نفسي مقصر على اللي اسويه على مقدار الراحه والسعادة اللي مليتي بيها حياتي من دخلتيلها.

فيروز: لهاي الدرجه تحبني؟

هَيْصَم: الذنب الوحيد اللي ما أريد اتوب من عنده حبج غلط بس اني اشوفه رب الصح برأيج هذا حب لو خبال لَّباءَة الهَيْصَم؟

فيروز: ربي عوضني بيك يا أحلى شي صار بحياتي كلها.

هَيْصَم: والله انتِ العوض اللي دزه رب العالمين اليه، حروب جانت عايشه بداخلي وصراعات كلها نتهت بوجودج عرفت شنو يعني حياة وحدة ولازم تعيشها حبج نقذ روح الهَيْصَم من موت محتم.

فيروز: اريد اعالج جروحك وابدل حزنك سعادة وانسيك كل عذاب عشته قبل، تسمحلي؟

هَيْصَم: اصلاً اني من شفتج تعالجت كل الجروح بس الماضي صعب ينسي اني ما انكر العشرة لَّبوة.

فيروز: لأي درجه حبيتها؟

هَيْصَم: منو كال حب؟!

فيروز: عيونك تلمع من تذكرها.

هَيْصَم: متضوجين اذا فتحت كلبي وعبرت عن حبي الها؟

فيروز: بكل الأحوال هي ماضي يخص حياتك ليش حتى اضوج؟

هَيْصَم: لعد اسمعي، اول حب بحياتي بوقتها جنت مراهق عمري 17 سنه جانت بنت جوارينه اسمها نجاة ملاك يمشي على الأرض اعيونها بسواد الليل أو وجهه مثل الشمس نعجبت بيها من اول نظره ساكنين جدد وهي جانت طالبه متوسطه بذلك الوقت أذكر ثالث متوسط واني خامس اعدادي بقت علاقتنا هيج سنتين اني دخلت جامعه وهي وصلت خامس، اعيونه تشرح حبنا من تمر من يمي كل عضو بجسمي يفز حب الها، ابتسامتها كفيله تخليني اركص فرح طول اليوم حتى وصلت حدها ويايه وكلت مابيها مجال لازم اعترف حددت وقت وكفتلها قريب المدرسه وتبعتها وصلت قريب عليها وشمرت ورقه بعد متأكدت محد شافني حتى متصير عليها سمعة مو زينه وهي شريفه لدرجه المنطقه كلها تحلف بأسمها، اني مو من الناس اللي ادور علاقات وهاي الأمور جانت نيتي وياها شريفه جداً لذلك كتبتلها اني معجب بيج واحبج بس انطيني اشاره واجي اخطبج اني وعشيرتي بكل حب.

: اخذ نفس عميق وزفره ودار وجهه للشباك على رغم من كال اعترفتلها اكو شي داخلي نزعج بس مع ذلك صبرت نفسي تبقى ماضي على رغم هذا الشي ممبين عليه ابد واضح انو لسه اكو شي داخله الها، الفضول يقره الف حتى لو قهرني لكن لازم اعرف ماضيه هو شنو لذلك سألته.

فيروز: شنو جان جوابها؟

هَيْصَم: الساعه سبعه راح نتأخر كومي غيري ملابسج وخلي نتريك.

: عرفت مراح يجاوب لذلك غلست عن الموضوع يجي يوم واعرف السر كامل ماكو شي يبقى مخبه طول العمر نهضت من مكاني واجيت اطلع سحبني من أيدي وكعت على صدره رفع حنكي باصابيع ايده وكال وهو مبتسم بوجهي.

هَيْصَم: حبيتج من اعماقي وكلبي مابيه وحده غير لَّبوتي لتفكرين ابد حجي قبل شويه معناه بعدني احبها بس كل شخص مايكدر ينسى ماضيه ويتجاوز الأشياء اللي صارت قبل خاصتاً اذا تركت أثر بالروح.

فيروز: واني متفهمه جداً لذلك محجيت شي اعرف لكل شخص ماضي عنده وبالعكس اني فرحانه لان بقيت وفي لعلاقة حب صارت من سنين طويله وقله الأشخاص اللي يكونون مثلك هيج.

هَيْصَم: تقبلين اقبلج قبله اسلاميه؟

: قبل ما اجاوبه قبلني، بداخل هَيْصَم مراهق نحرم من سعادته مثلي تماماً حسيت اني وهو واحد يكمل الثاني بألمنه ويمكن لهذا السبب رب العالمين جمعنا سوه ويارب تكمل سعادتنا ونتعوض على الايام اللي مرت علينا.

خلصنه كل شي وغيرت ملابسي وطلعنه اني و هَيْصَم وخالتي بقى طول الطريق مشغل قرآن وادعيه حتى خالتي تفاجأت من عنده.

كلاثم: هَيْصَم ابني صاير شي؟

هَيْصَم: لا ليش؟

كلاثم: ليش مشغل قرآن؟

هَيْصَم: ليش اني بوذي !!

كلاثم: لتخلي بالي ينشغل عليك وضعك معاجبني بعدين ليش هذا الاستعجال بالعقد؟!

هَيْصَم: مو جنتي تردين نتزوج شنو صار هسه ليش غيرتي رأيج؟!

كلاثم: بالعكس كلش فرحانه بيكم ويارب يديم سعادتكم ويجمعكم على خير بس مع هذا اريد اعرف سبب ستعجالك.

هَيْصَم: خاف اموت اريد اضمن سلامتها من بعدي.

كلاثم: اسم الله عليك شنو هذا الكلام.

هَيْصَم: شوفي راح تكلبيها عزاء عقدت شيخ غير أعقد محكمه ياعيني انتِ.

كلاثم: ليش منطيتنا خبر لعد؟!

هَيْصَم: مجان عندي وقت وبما انو اليوم فرغت شويه كلت استغل الفرصه ونعقد وهذا كل مافي الأمر.

كلاثم: اذا هيج رب العالمين يوفقكم شنو اريد اكثر من هيج.

: هم يحجون واني دموعي تنزل عرفت كلامه مو شقه وصدك خايف عليه معناها حياته مهدده يارب والحل ما أكدر اتحمل كل هذا الخوف عليه واني ماعرف بأي لحظه يجيني ملفوف بعلم ربي لتخليني اعيش هذا الشعور والله ما اتحمل هيج امتحان يكفي اللي خسرته لتضيف هَيْصَم للقائمة بمحمد وال محمد، وصلنه للمحكمه ونزلنا مستغرق الموضوع فتره طويله كملنه العقد وطلعنه مشفت بعيونه فرحه حسيته قلق وخفت راح يصير شي موزين جان يوم من اسوء إيام حياتي على الخوف اللي حسيته عليه اني اموت فدوة بس هو يصير بي شي مستحيل اتحمل، هلهلت خالتي والدمعه بعينها حضنتنا ثنينه لكن مبقينا هيج بسرعه رجعنا للسياره لان هَيْصَم مقبل نبقى واكفين أكثر، لاحظت التوتر على ملامحه كل شويه وموبايله متصل عليه شخص اخير شي متحمل وفتحه وصاح بصوت عالي.

هَيْصَم: راح ابتلي بيك والخالق كم مره كلت لتتصل بيه حتى اني اتصل بيك؟

لائِث: سيارتك مراقبه هَيْصَم اخذ حذرك.

هَيْصَم: اعرف بالسم مراقبه خليني اوصل اهلي للبيت وبعدين اجي للمركز نتفاهم بالموضوع.

لائِث: انتبه على نفسك راح ادز حمايه ألك اخذ حذرك هَيْصَم لتنسى عندك عائلة ومهمه بركبتك كلنه نضيع اذا صار بيك شي واني اولهم.

: سكت شويه ورجع كال بنبره هادئة حسيتها نبرة وداع.

هَيْصَم: ابريني الذمه اذا زعجتك فد يوم تعرف اني اعتبرك اخ مو بس صديق اذا صار بيه شي اهلي بركبتك ودفني يم الغالين لتخليني بعيد عنهم واذا تكدر تزورني بين فتره وفتره لتقصر اريد اسمع صوتك على كبري، مهمتنا لهنا وتنتهي دير بالك على نفسك وحفظ كلامي عدل بكلب الهَيْصَم انتوا اكثر فريق أمنت عليه وحبيته وعتبرتكم عائلتي المقربه باريكم الذمه كلكم واتمنى انتم هم تسامحوني.

: غلق الخط ورفع نظره اليه وكال بنفس النبرة.

هَيْصَم: يمكن رب العالمين مكاتب النه حياة سعيدة بالدنيا بس الاخره تجمعنا اكيد راح انتظرج اهناك بعد عمر طويل يشريان الهَيْصَم وروحه، وانتِ يوم سامحيني وبريني الذمه تعرفين شكد غاليه عليه انتِ، اذا صار بيه شي اتصلي باخوي الصغير يرجع للبيت وياخذ مكاني ويحميكم.

: صار هذا اليوم عزاء علينا بجينا اني وخالتي بصوت عالي فجأة لاحظت سيارة سودة مضلله تقربت من عدنه نفتحت الجامه وطلعوا مسلحين لازمين مسدسات عرفت انو مو بس الهَيْصَم مهدد بالخطر اليوم احنه هم وياه..

يتبع

البارت اقل بشويه من 3900.

تأخير اليوم كله بسبب النت جميلاتي.

تصبحون على الف خير شمعاتي.

حسابي الأنستا.

@zahraaahmedn99