البارت 22

للتواصل انستا zahraaahmedn99

علقوا بين الفقرات+ صوتوا للبارت+ تابعوا حسابي عيناي انتوا.

شاركوا القصه مع اصدقائكم حتى نستمتع وي الهَيْصَم مع بعض.

هَيْصَم

(الكاتبة زهراء احمد)

_______

ماذا لو حضن كفي كفك واكفت اكفنا عن القتال؟؟

ضَرْضَم: سيدي الحگ.

هَيْصَم: خير شنو صاير؟!

ضَرْضَم: تعال وانت شوف بعينك.

فيروز: اقترب من عندي شفت بأيدة سوط جلد يحجي قريب من عندي،

بمعتقدج راح اخليها تعدي بسلام؟!

عابره عليه هوايه وجوه مثلج واكثر بنات غير مؤدبات بدون أهل كل شي اتوقع من عندج واليوم لازم تعترفين بجريمتج بدون مماطله وعلى ايدي راح اخذ الدليل.

فيروز: اني بنيه عشت كل حياتي ببيت مليان دلال مجنت اعرف شنو يعني ضرب او حزن عشت سعيدة بكل فصول حياتي وعلى رغم الحياة البسيطه بس راحة البال متفارقني ابد اكبر همي شنو اكل باجر على الغده او شلون انظف البيت وشگد الوقت اللي لازم اگعد بيه من النوم حتى الحگ اخلص كل شغلي وافاجئ بابا من يرجع من الدوام بين ليله وضحاها يتغير وضعي بالكامل والگي نفسي سجينه وانجلد مثل الحيوانات حتى اعترف على جريمه اني بريئه من عدها،

عاملني وكأني حيوان واني اقسم الحيوانات اليوم تعامل بطريقة رحيمه على اللي تعرضتله اني بهاي الساعه ماكو رقابه وماكو قانون بلد يسود بيه الظلم وبأي دستور اكو مادة تنص على ضرب المتهم حتى يعترف،

شايفين الألم من يحترگ اصبعكم بالگدر او من يطفر عليكم اشويه زيت من الطاوة او من ينضرب اصبع رجلك الصغير بالباب؟!

او الألم اللي يصير ابطنك فجأة هاي كلها لاتضاهي ضربه وحده تجي على جسمي من ضرباته جان وحش قاسي بدون رحمه حسيته لوهله مثل الجلادين بالقصص و الأفلام يضاهيهم خبث وحقاره ونذاله،

دم ملاني من انفي وحلگي وي كل ضربه يردد نفس الكلمه،

اعترفي،

وعلى شنو اعترف ماعرف يردون يلبسوني قضيه ما الي دخل بيها أو اصلاً اني من الأشخاص اللي تكره الأخبار لذلك ماعرف اذا العراق بيه هيج ناس سيئه هوايه يردون يدمرون بلدنه عن طريق هذا السم،

وحده اثنين ثلاثه توقفت عن العد وفقدت كامل حواسي انشلت اطرافي وبدت الدنيا تظلم بعيني بعد فتره سمعت قفل الباب وبطل اكو شي يلامس جسدي والمصيبه حتى لو نسألت منو سوه هيج ماعندي جواب لأن الدنيا ظلمه مشفت شكله،

تنفسي ضاق وجسمي تعب اكو سائل لزج ينزل من عندي وماعرف مصدره شنو حسيت انو خلص هاي سكرات الموت وعزرائيل راح يطلعني من هذا المكان المظلم وياخذني وياه لبابا،

جنت اتمنى بهاي اللحظات يدخل واسمع صوته ويجي يمنعه يضربني ويطلعني من هذا الوضع صرخت وصحت بصوت عالي بس وي كل صرخه جنت انضرب اقوة ماكو رحمه انسان متربي بغابة حيوانات ماكو شفقه ولا رأفه وكأن قاتله واحد من عائلته او عندي ثار وياه،

حسيت براحه وسكون غريب بجسمي خدر فضيع بأطرافي مثل الشخص اللي يتبنج قبل العمليه سمعت سابقاً هاي اعراض نهاية الحياة وقرب وفاة الشخص وهذا اللي جنت متأملته بهاي اللحظة،

فتره مو قليله اكو شي بارد يمرر على وجهي أيد تلاعب وجناتي وصوت قريب من عندي يهمس بأذني ميزته عرفته هو يحجي ويايه بهدوء وكأن يريد يوصل صوته لروحي وفعلاً وصل لكن مگدرت اجاوبه او افتح اعيوني.

هَيْصَم: لَّباءَة تسمعيني؟

منو مذبل وردتي؟!

اطيح حظه الج اليوم والله، منو يگدر يلمسج واني عايش العن اليوم اللي صار بيه امحيه من الوجود، والله اله انزل بيهم عقوبه اخليهم ميعرفون راسهم من رجليهم،

افتحي عينج كافي دلع مابيه حيل كسرات جديدة ولج،

لَّباءَة ، لَّبوة ، لَّبوتي، ماي عيني ، اخيوط گلب هَيْصَم تسمعيني يروحي؟

ولك لااائِث.

لائِث: سيدي.

هَيْصَم: اريد اللي مسوي بيها هيج ينزرع يمي هسه من شوكت نضرب النساء بهاي الطريقة؟!

لائِث: عرفنا شفت كامرات المراقبه.

هَيْصَم: تحجي لو شلوون.

لائِث: عاصم.

هَيْصَم: هذا الطايح الحظ متاب ذلك اليوم يريد افصله من شغله لو انقله لغير محافظه.

لائِث: سيدي.

هَيْصَم: قندره مو سيدك لو عدكم ذرة احترام مسويتوا هيج وخالفتوا اوامري الف مره گلت النساء مينضربن مو من حق احد يمد ايده على مرأه مجرمه قاتله شنو مسوت القانون ياخذ مجراه،

ساعتين بعيدة عن عيني ارجع الگيها جثه نايمه على الأرض ساعتين لائِث،

من ارتكب بيكم جريمه والعن ابائكم اكو ملعون والدين يگلي ليش؟!

وبعدين الوردة الجميله اللي خليتها تحرسها وينهااا.

لائِث: يم الباب تسمعك.

هَيْصَم: فووتي.

جمان: سيدي.

هَيْصَم: شنو گلت؟

جمان: ما اترك الباب تحت اي ظرف كان حتى لو اكو قنبله.

هَيْصَم: وشنو سويتي انتِ؟

جمان: تركته.

هَيْصَم: شنو السبب؟

جمان: امي اتصلت بيه وغفلت عنه اشويه.

هَيْصَم: اشويه؟!

برأيج هاي الأثار اللي على جسمها ونومتها مثل الأموواات شويه؟!

جمان: اعتذر سيادتك.

هَيْصَم: صدگ والله؟

لائِث تسمع لو اني نطرشت؟

لائِث: اسمع سيدي.

هَيْصَم: عدم اطاعه أمر القائد مالتج وبسببج تعرضت السجينه لضرب مبرح افقدها وعيها وصار ساعتين ولحد الأن متفتح عينها راح يتم أمر نقلج وخبري اللي دربج انتِ مو كفوا تكونين بالخدمه العكسريه راح اتأكد اضيف هذا البند بورقه النقل مالتج حتى متتعرض متهمه ثانيه بسبب غبائج واهمالج لهيج حاله.

لائِث: ايعصب دائماً اصلاً هاي اكثر شغله اكرها بيه هي العصبيه لكن هاي اول مره يعصب ويهين مرأه على خطأها ممكن تگولون اللي سوا غلط وتجاوز هوايه وستغل منصبه بس الگلب اذا دگ لشخص يفقد تماماً الشعور بالصح والغلط ويكون كل تركيزة وي الشخص اللي يحبه وبهاي اللحظة تأكدت انو الهَيْصَم وگع بالحب للمره الثانيه بس خايف حيل من هاي الخطوة المقبل عليها سيادة النقيب هَيْصَم.

هَيْصَم: عاصم وين؟

لائِث: بالتحقيق سيادتك.

هَيْصَم: اتبعني اريد اشوف بأي حق يضربها بهذا الشكل فلم الرساله عندي،

هَمَّاس.

هَمَّاس: سيدي.

هَيْصَم: ابقى احرس الباب لتخلي احد يفوت.

دخل واعيونه تجدح غضب فتح الباب بقوة وحجه بعصبيه يحاول يسيطر عليها حتى ميرتكب بيه جريمه وهو كلما يشوفه يجي اباله منظرها وهي تنضرب،

هوايه سجناء ومتهمين وناس داخله طالعه فحتى لو صرخت اكيد محد حيسمعها وهذا اللي مخبله على رغم قربه من عدها مگدر ينقذها ويمنع انو تنضرب بهذا الشكل،

هَيْصَم: اي سيد عاصم ليش ضربتها؟!

اكو مادة بالقانون العراقي تسمحلك بهذا الفعل؟!

عاصم: احنه نتبع هاي الطريقه مع المجرمين وين المشكله هاي المره سيادتك؟!

هَيْصَم: يعني احنه وي كل متهم نضرب بهذا الشكل حتى يعترف على جريمه احتمال يكون بيها بريئ والأدله يمنه ناقصه يعني ممتأكدين اذا هو قام بهذا الفعل من صدگ او متورط بشكل او بآخر؟!

بعيداً عن القانون لو جان عندك كلب تضربه بهذا الشكل؟؟

لعبت نفسي من هذا الوضع واني اكره الأشخاص اللي ميتبعون القانون وعليه راح ينفتح وياك تحقيق بأسمها وانت تعرف القانون يجرمك على هذا الفعل،

مهنتي تمنعني اردها الك بنفس الطريقة مو الأخلاق لو اعرف ميضيع تعب عمري وافقد احترامي لنفسي جان خليتك بالفراش اسبوع كامل ولتفكر بعد العقوبه اللي راح تاخذها تگدر ترجع للعمل من جديد بهذا المركز اعتبر نفسك منقول من هاي اللحظة على ذكر اخطائك وتجاوزاتك للمركز اللي راح تباشر بيه العمل.

لائِث: هدأت؟

هَيْصَم: شنو تشوف؟؟

لائِث: اسد غاضب.

هَيْصَم: واذا ماتسكت اهجم عليك بعدين وين الدكتورة صار سنه من طلبتها؟

لائِث: تعرف الطريق ازدحام والشوارع مزدودة اكيد راح اطول.

هَيْصَم: اذا نبقى هيج حضر عقيقه على روحها.

لائِث: اسم الله مرت اخوي قويه متموت من ضربتين.

هَيْصَم: هو مبقي بيها عظم صاحي،

هوب هوب وين؟!

لائِث: شكو شبيك؟!

هَيْصَم: وين تريد تدخل؟

لائِث: نسيت راح ابقى منتظر بالباب هَمَّاس حياخذ البصمات للمختبر حتى يطابقهن.

هَيْصَم: هذا مو دليل كافي على برائتها نحتاج شي اقوى.

لائِث: مثل؟

هَيْصَم: اللي اعترف عليها يغير اقواله.

لائِث: بس هو بالمصح هسه.

هَيْصَم: وهذا يفيدنه اكثر رتبلي الوضع باجر نروح من الصبح.

لائِث: تتوقع يساعدنه حاولنه وياه الف مره وبقى رافض ومُصر على كلامه شنو الشي اللي يدفعه حتى يوگف ويانه اليوم؟!

هَيْصَم: اذا ممشى بالترغيب نمشي بالترهيب لَّباءَة لازم تطلع براءة لأن ما اضمن سلامتها اذا بقت اهنا وهي نظيفه وطاهره وميليق بيها مجتمع قذر مثل هذا.

لائِث: تريد اسعافات اوليه؟

هَيْصَم: موجوده عندي بس لتخلي احد يفوت يمي واضح.

لائِث: تأمر سيدي.

ضوه قوي يضرب بعيوني غمضتهم بقوة وفتحتهم بهدوء اشويه، دايخه حيل وألم براسي لايطاق وجسمي مثل الشخص الواگع من مكان عالي يأذيني بالكامل سمعت صوت قريب من عندي اعيوني عليهم غواش وثگل بس حاولت اصيح بأسمه حتى اعرف اذا هو او لا،

فيروز: هَيْصَم.

سمعت جوابه وصوت خطواته يقترب من عندي،

هَيْصَم: يراحته،

شلون صرتي لَّبوة؟!

مگدرت اجاوب بقيت ساكته جسمي موتني ألم حسيت بأيد صارت جوه راسي ورفعتني فتحت اعيوني صارت بعينه نظرته تحجيلي كل شي قلق خوف وحتى ندم نظره مليانه مشاعر گدرت اقرأها ودخلت لأعماقي نزلت ادموعي لو جان موجود مصار بيه هيج،

لمني بحضنه تناسيت ألمي والحرام و العادات و الأخلاق وبقيت متمسكه بقميصه راسي على صدرة وأيدة يطبطب بيها على راسي ويحجي ويايه بحنيه،

شايفين الطفل اذا نضرب او تأذة دائماً يركض لوالده حتى يجي ياخذ حقه وبهاي اللحظة لگيت بهَيْصَم ذلك الوالد اللي راح ياخذ حقي ويمسح دمعتي وينطيني الأمان.

هَيْصَم: كافي يروحي لتبجين خلص انتهى الموضوع واللي سوه بيج هيج اتعاقب.

حجيت من بين شهگاتي.

فيروز: ضربني هَيْصَم بدون سبب والله حيل أذاني.

هَيْصَم: أكسر أيدة لخاطر اعيونج بس لتبجين مو ذوبتي گلبي.

فيروز: جسمي يأذيني هَيْصَم.

هَيْصَم: فدوة يروحلج هَيْصَم ورتبته بس كافي لتبجين اعيونج ورمن.

أيدة باردة خلاها على وجناتي ومسح ادموعي بقيت متمسكه بيه حسيت براحه وأمان مو طبيعي هدأت ورتاحيت حتى الألم بطلت احس بيه بقينه على هذا الوضع هيج حتى نطرق الباب ابتعدت عنه وباوعتله بنظرة ترجي من شافني هيج خايفه ابتسم مطمأني وگال.

هَيْصَم: ليش هاي النظرة؟!

فيروز: راح ترجعني للزنزانه؟؟

هَيْصَم: راح تبقين يمي اهنا لتخافين محد يگدر يقترب من عندج واني موجود.

فيروز: بس اقترب وضربني بوحشيه هم شوف شنو سوه بيه وانتَ موجود رادني اعترف على جريمة ما اللي علاقه بيها.

هَيْصَم: اتعاقب على اللي سواه ماكو داعي للخوف لَّباءَة.

شفته راح ناحية الباب وقفته.

فيروز: لتعيفني فدوة.

التفتلي نظرته بيها ألم على وضعي الحالي بس مبين هذا الشي بكلامه المليان لطافه.

هَيْصَم: متعودت عليج ضعيفه اريد استقوي بيج لتخليني انهز لَّباءَة.

نزلت ادموعي وحجيت بغصه.

فيروز: مو بأيدي خايفه.

هَيْصَم: بهذلتي گلبي شنو اسوي حتى متخافين؟!

فيروز: لتعيفني وحدي ماعندي ثقه بأحد اهنا غيرك.

هَيْصَم: ما اعيفج اهنا موجود يمج نامي و ارتاحي يلا.

فتح الباب وطلع واني رجعت لمكاني انتبهت للمكان اللي اني بيه غرفه جبيرة يتوسطها بالنهايه مكتب و كرسي من الجلد لونه اسود مثل المكتب قريت اسمه ( المدير/ النقيب هَيْصَم) اكو رف مال ملفات هوايه، واني مخليني على قنفه سودة رجعت راسي وبقيت صافنه بالسگف واني افكر بحياتي ماعرف شلون غفيت.

لائِث: بدون متعصب برأيك مناسب بقائها بغرفتك اذا عرفوا بقية المنتسبين متصير مشكله ويشتكون عليك بعيداً عن هي منو لتنسى هي مجرمه بنظر القانون واحاسيسك مو مهمه هَيْصَم.

هَيْصَم: اولاً هي مو مجرمه ثانياً الرجال والبي خير خلي يجي ويواجهني،

اني وانت نعرف هنا يتعاملون بالواسطه وكم متهم طلع من السجن لأن عنده راس جبير ومنگدر ناخذ بيه اجراء قانوني وين المشكله اذا خالفت القانون اني هاي المره وسويت مثل البقيه وبعدين محد يعرف اذا انت و الفريق سكتوا ومحد حجه اخذت كافة الأحتياطات محد حيعرف بالموضوع او حتى يشك بيه.

لائِث: خايف عليك تنضر بسبب هذا الوضع.

هَيْصَم: واني خايف عليها.

لائِث: تگول ما احبها بس تصرفاتك تبين العكس تضحك علينه لو على نفسك هَيْصَم؟!

هَيْصَم: شنو هو الحب بنظرك؟؟

لائِث: اهتمام و احترام وشويه رومانسية.

هَيْصَم: اني عندي هي بالكون ما اگدر اشوفها تتأذه او تنجرح، ابتسامتها كفيله تريح اعصابي وجودها يخلي گلبي يدگ بقوة مثل الشخص اللي بسباق واذا گتلي انت تحبها انزل بيك عقوبه.

لائِث: والعباس انت ماتحبها ميت بيها يول.

هَيْصَم: گول شي جديد.

لائِث: واخيراً اعترفت.

هَيْصَم: اضحك على عقلك اني گلت الف مره وارجع اكرر اني ما احبها ابداً.

لائِث: فهمت اتموت عليها كافي تلح.

هَيْصَم: خابر الدكتورة گلها ابقي عالجي المتضاهرين لتجي ولتخلي احد يفوت للغرفه اذا صار شي اتصل بيه او تعال انتَ اذا صار شي سيء او اجه الآمر ودخل فجأة موتك على أيدي.

لائِث: مرته انتَ ويجي علمودك بنص الليل؟!

هَيْصَم: ميانتك صايره ماصخه حيل عندك علم؟

لائِث: اطلعك من المود اللي انت بيه مو زين؟!

هَيْصَم: روح من يمي وشوف شغلك.

لائِث: منو اللي يلزم التحقيق؟

هَيْصَم: انت موجود.

لائِث: صديقك اني راح تجي عليك نظره.

هَيْصَم: قابل ابنيه وطالعه بنص الليل.

لائِث: تعرف حبهم بدون ما احجي.

هَيْصَم: عجبهم او ماعجبهم ميصير غير اللي يريدة هَيْصَم واللي معاجبه يگدر يقدم نقل يخفف اصلاً.

لائِث: اذا طلعت براءة وين تاخذها؟

هَيْصَم: اسويها مرتي واعزمك على العرس.

لائِث: ارگص جوبي وداعتك هذا اليوم المنتظرة من تفتح صفحه جديدة وتنسى الماضي.

هَيْصَم: متگدر تنسيني الف وحده لكن تگدر تشافي الجروح.

لائِث: اذا متحبها لتنطيها وعود كاذبه.

هَيْصَم: اني من هذا النوع؟!

لائِث: انت گلت تريد تزوجها.

هَيْصَم: اي وشنو بيها اذا سويتها؟!

لائِث: أدمر حياتها يعني؟!

هَيْصَم: انت هوايه متأثر بالأفلام واني تعبان وما ألي خلگ اخذ وانطي وياك لكن خلي شغله ابالك هَيْصَم ميسوي شي ممدروس ومو اني اللي ادمر حياة الناس ما بالك لَّباءَة.

لائِث: اذا متحب لتجازف بهيج موضوع مصيري.

هَيْصَم: شو انت تخترع اجوبه من وحدك شنو الموضوع؟!

لائِث: هسه اني اللي اخترعت مواضيع لو انت اللي گلت!!

هَيْصَم: شوف شغلك ابني وخليني اشوف شغلي يلا.

لائِث: شنو شغلك بشرفك؟؟

هَيْصَم: تريد اشرحلك بالقلم العريض لو مختصر مفيد؟؟

لائِث: لا رؤوس اقلام خير الكلام ماقل ودل.

هَيْصَم: اذا متمشي من يمي تنزل بيك عقوبه اخليك تنسجن بيها اسبوع مع تدريب مكثف.

لائِث: التدريب لعبتي تعرف مو صعبه عليه سيادتك.

هَيْصَم: لائِث.

لائِث: خلص لتباوع بهاي النظرة راح اكمل شغلي بس منو يبقى واگف بالباب يحرس عصافير الحب؟؟

هَيْصَم: العن اليوم اللي اتعرفت بيه عليك.

لائِث: عفاا من لگه احبابه نسى اصاحبه بعتني بهاي السهوله؟!

هَيْصَم: وابيع عشيرتي بالكامل بقيت عليك.

لائِث: رسيني على بر بشرفك تحبها لو لا؟؟

هَيْصَم: يگولون الحليم تكفيه الأشاره واني ما احب اشرح زايد.

حسيت بأيد على وجهي تتحرك صعوداً ونزولاً توقفت قريب شفايفي فتحت اعيوني بسرعة واجيت اصرخ وقفني وهو يخلي أصبعه يمنعني حجيت بعد مبعده،

فيروز: هَيْصَم شنو تسوي؟!

هَيْصَم: شنو اسوي؟!

فيروز: لتجاوبني بسؤال.

هَيْصَم: اطمأن عليج مو اكثر.

فيروز: راح ترجعني للزنزانه؟

هَيْصَم: لا اليوم تبقين اهنا وباجر الصبح ترجعين.

فيروز: لشوكت ابقى بهذا الوضع؟

هَيْصَم: ماعرف حتى نتأكد من برائتج.

فيروز: واذا مثبتتها؟!

هَيْصَم: مستحيل راح نتأكد كل اللي يهمني متوصلين للمحكمه لأن بوقتها تصير القضيه اصعب.

فيروز: مراح تتركني مو؟

هَيْصَم: انتِ شنو رأيج؟

فيروز: هذا السؤال الك هَيْصَم.

هَيْصَم: اليوم ماكو سيد افندي لهاي الدرجه ما ألج خلگ ويأسانه؟

فيروز: شنو رأيك انت؟

هَيْصَم: حقج بس اني انطيتج وعد ترجعين لبيتج وحياتج عن قريب كوني واثقه.

فيروز: ليش نضربت؟

هَيْصَم: بالعادة يسوون هيج وي المتهمين حتى يعترفون على جرائمهم وللأسف انت ايضاً صار وياج هيج.

فيروز: بس اني مو مجرمه.

هَيْصَم: الجميع يگول هيج بالبدايه لكن مع التعذيب يعترفون.

فيروز: بس هذا ظلم منو يگول يعترف بالحقيقه ممكن يحجي بسبب الخوف.

هَيْصَم: صح لذلك اني اما اتبع الضرب وضده ولهذا عاقبت اللي ضربج.

فيروز: اتسوي هيج مع الجميع لو بس اني؟

هَيْصَم: شوفي اكو قاعده بالحياة كل مجرم يترك وراه دليل بس انتِ مو مجرمه مو لأن اعرفج وانما لوجودج يمي فتره طويله بعدها رحتي لخالتج شهرين معناها قضيتج ملفقه.

فيروز: وليش منطيت هاي الأدلة؟!

هَيْصَم: لأن بوقتها اصير اني المتهم واعتقل ک معاون الج بالجريمه.

فيروز: ليش كل هذا يصير ويانه هَيْصَم؟

هَيْصَم: لأن القضيه اللي مستلمها صعبه و مهمه وبنفس الوقت خطره مو عصابه هينه وانما تجار مخدرات واعضاء بشريه وحتى نساء مرتكبين جرائم عديدة.

فيروز: وليش لسه محد اعتقلهم؟!

هَيْصَم: خليه ارهابيه شخص يدعم شخص مثل المي كلما غصتي بيه اتفاجأتي بعمقه.

فيروز: والا متى؟

هَيْصَم: حتى النهايه يا اني يا هم.

فيروز: تگدر تعتقلهم كلهم؟!

هَيْصَم: احنه منگدر نسيطر بالكامل على هيج جرائم لكن بالأمكان نخفف من عدها هدفي هي العصابه الحاليه وشخص يوصلنه لشخص ثاني اكبر من عنده مثل السلسله.

حوري: صار ساعه اتصل بيك ليش متجاوبني؟!

محمد: مشغول سرگي گلبي.

حوري: بشنو؟!

محمد: شغل يحلوه شغل.

حوري: وي منو؟؟

محمد: جبار ابو المولدة عطلت فجأة ومن باب الأنسانيه ساعدته بتصليحها.

حوري: تضحك عليه انتَ؟!

محمد: مرت ابن خالتج واگعه بمشكله واني ادور على ثغره بالقانون تگدر تنقذها.

حوري: منو ابن خالتي ومنو هي مرته؟!

محمد: اليوم انتِ شاربه مرگة ثول؟!

حوري: ليش تحجي وياي هيج؟!

محمد: اتركيني من العالم وسولفيلي شلونج اليوم؟

حوري: الحمد الله تمام.

محمد: هو هذا اللي الله گدرج عليه؟!

حوري: شنو تريد مثلاً؟!

محمد: حبيبي، حياتي ،مشتاقتلك، اموت عليك شبيج مسويه عليه جفاف والله لو مو اني انضح وفاء جان خنتج من زمان.

حوري: استحي.

محمد: ايباخ تستحي اخت أرفد.

حوري: شنو دخل أرفد بنص الكلام؟!

محمد: اموت عليه مو بأيدي.

حوري: اذا تحجي هيج والله ازعل.

محمد: كل شي ولا زعلج تعرفين ما اتحمل ابتعد عنج يومين.

حوري: مليق.

محمد: اوي داده.

حوري: صدگ محمد اترك الشقه عندي موضوع مهم وياك.

محمد: نفضحتي.

حوري: شلون عرفت؟!

محمد: يعني صدگ؟

حوري: اي والله.

محمد: أرفد لو نسر؟

حوري: ريفان.

محمد: اريد ازوركم واعرف امج بشنو متنسيه بيج؟

حوري: ليش تحجي وياي هيج؟

محمد: ولج ريفان يمشي المي من جوه رجليها شلون تخليها تعرف بيج بسهوله تعرفين هي سرها عند أرفد تحبه اكثر من عندي.

حوري: خوفتني يعني هسه تگوله؟؟

محمد: كل شي توقعي تسوي انت متعرفين شگد هي تحبه وتثق بيه لدرجه يگدر يقتل اهلها بالكامل وتبقى مصدگه بيه ومتخونه باعت اخوها على موده انت منو ومتبيعج؟؟

حوري: بس هي حبابه مشفت من عدها شي مو زين.

محمد: من السكوتي موتي ومن الطئطئه فوتي يئمر.

حوري: معقولة تسويها وتگله والله يذبحني.

محمد: ميگدر انت صرتي بأسمي وملك لمحمد والله اسود عيشتهم بس بفكرون يقتربون من عندج.

حوري: شوكت مقرر تخطبني؟

محمد: شفتي اشلون حاد اسنانه عليه من حجيت بالموضوع عن طريق المزح ردت اعرف رأيه اذا سويتها وتقدمت بس طلع ميبس راس اكثر من قبل.

حوري: يعني علاقتنه مثل فلسطين على رغم هي ملكنه بس يبقون مسيطرين عليها.

محمد: لتخافين فلسطين صارت ملك الشعب متگدر اسرائيل تسوي شي ابداً.

حوري: خايفه ميتحقق شي من هذا الكلام ويبقى زواجنه حلم ينتهي بالفشل.

محمد: اي وبعرسج انشر مقطع على التيك توك اخذها لماسهر بالركن تالي الليل ولو اني سهران وياج على المجاني بس هي نفس المعنى.

حوري: من وين تجيب هذا الكلام انتَ؟!

محمد: من تعيشين بنص الهتليه تعرفين.

حوري: وانت ليش گاعد بنص الهتليه؟!

محمد: نفس اللي گعد أرفد يم المرضى.

حوري: اذا كل مره تخلي أرفد بنص حديثنه والله اغلق الموبايل وما احجي وياك بعد.

محمد: لتهددين لا ارفع عليج قضيه.

حوري: شورطني وي محامي.

محمد: من يخلص اكل يگول رفعت الجلسه.

حوري: من وين جبتها هاي؟!

محمد: من اشتاق لخوانج اقرأ نكت وهاي من ضمنهن.

حوري: محمددد.

محمد: هاي المره سمعج نسر مو ريفان.

حوري: نايمين واني ساده الباب.

محمد: صدگ شلونها؟!

حوري: بخير مبيها شي.

محمد: وگلبها؟

حوري: مبيها شي والله اصلا بدت دوام وسمعت راح يحضرن لعرس أيفلين.

محمد: اذا ماتن گلولي على الأقل احضر الدفنه.

حوري: اسم الله ليش تحجي هيج؟!

محمد: اخوانج سووها بلا ملح يعقدون ويتزوجون بكيفهم واني آخر من يعلم.

حوري: بس اهدأ ميحتاج تعصب هيج بما انو عاقدين اكيد يتزوجون شنو يصير غير هيج مثلاً؟!

محمد: بس اني اخوهن اسألي اي واحد خبل راح يگلج الحق وياي وين لاگيها ميسألون اهلهن ويحددون موعد من كيفهم.

حوري: عمي موافق يعني اهلك عدهم علم.

محمد: هو منو مطيح حظي ومكبر راسهم غير عمج؟!

حوري: هسه معصب عليه اني شكو؟!

محمد: روحي بعدين احجي وياج.

حوري: محمد.

محمد: بعدين نسولف عندي شغل مهم.

النقيب هَيْصَم اريد ادخل واشوف احد المرضى اللي اجه لهنا قبل ثلاث ايام.

اتفضل من هذا المكان.

هَيْصَم: بهاي الغرفه؟

اي نعم.

هَيْصَم: لائِث انتظرني اهنا.

لائِث: اذا احتاجيت شي اني موجود.

فتح الباب ودخل.

هَيْصَم: السلام عليكم.

مُنقذ: وعليكم السلام.

هَيْصَم: اريد احجي وياك بموضوع مهم واتمنى تجاوب على اسألتي.

مُنقذ: اكيد تفضل.

هَيْصَم: بالتحقيق اتهمت ابنيه هي اللي تسلمك المخدرات كل شهر اشوكت جانت آخر مره شفتها بيها؟

مُنقذ: من شهر تقريباً آخر مره اشتريت بيها حبوب.

هَيْصَم: شلون بالعادة يكون التسليم؟

مُنقذ: تتفق وياي على مكان معين بكل مره ويصير التسليم الصبح حتى محد يشك بينه.

هَيْصَم: تعرف اسمها أو لقبها؟

مُنقذ: فيروز.

هَيْصَم: متأكد؟

مُنقذ: اي طبعاً.

هَيْصَم: شگد سعره؟

مُنقذ: منو؟

هَيْصَم: ضميرك.

مُنقذ: عوفاً سيدي بس هاي الحقيقه.

هَيْصَم: اختك بأمانتي بعدك مُصر على هاي الحقيقه؟

مُنقذ: ش ش نو بأمانتك؟!

هَيْصَم: الناس نوعان شرطه ومخالفين القانون واني شرطي مخالف القانون.

مُنقذ: سيدي بشرفك الا عائلتي.

هَيْصَم: صير شاطر وغرد والا ادبر قضيه اضيع بيها اهلك بالكامل واني مو مثلك أدلتي ركيكه احرص على انو تكون مؤبد او أعدام.

مُنقذ: انت رجل دولة متسويها.

هَيْصَم: جرب وشوف شنو يسوي رجل الدولة.

مُنقذ: تمام راح اعترف بكل شي اعرفه بس لتقترب من اهلي.

هَيْصَم: هيج وصير شاطر ليش تعبني وياك.

لائِث: بشر؟

هَيْصَم: حمامه وبيضه هم.

لائِث: سويتها عفيه عليك يالنجر.

هَيْصَم: كل انسان عنده عزيز ميقبل يتأذه ويصير بيه شي مو زين أو لَّباءَة هذا الشخص اللي ماعرف السبب لكن الموت اهون من دمعة اعيونها ورجفة ايدها من الخوف.

لائِث: وين صافن؟

هَيْصَم: خلي نرجع للمركز أو اتصلي بهَمَّاس شوفلي طلعت نتائج المختبر؟

لائِث: ان شاء الله راح اتصل.

فيروز: رجعت للزنزانه مره ثانيه المكان بارد ومظلم شهر 11 بدايته جسمي يأذيني حيل والتعب ماخذ من حيلي حيل انهارت قوتي وثقتي بنفسي بس بقه عندي أمل برب العالمين ميتركني وحدي واكيد يساعدني ويطلعني من هذا الوضع،

اسوء شي بالحياة هي اتهام انسان بريئ ما اله ذنب وياكبرها عند الله شهادة الزور مظلومه ويتيمه ورطوني بدون رحمه بذنب عظيم برائتي من عنده واضحه بس الجميع مغمض العين وغاض البصر،

ثواني دقايق صارت ساعات وخلص ثاني يوم اني بي بالسجن مشفته ومكحلت عيني بيه بقيت ساكته وبالعه غصتي شنو ممكن اسوي وما بأيدي حيل ماعندي واسطه ولا شخص واگف بظهري يسندني ويكون عون اليه بوقت الحاجه،

صفنت بوضعي واخذتني الأفكار لوقت مستحيل يكون بالواقع، لو جان والدي عايش ياترى شنو سوه هم يخليني انام وحدي بمكان موحش لو انضرب بهمجيه وبدون رحمه واتهم زور؟؟

اي فيروز بقيتي تحجين وي نفسج حتى اللي وعدج ميتركج وينه هسه؟!

للحظه فكرت وقطعت الأمل انو يجي شخص يطلعني من هذا المكان،

صحيت من افكاري على صوت القفل ينفتح دخلت شرطيه اقتربت من عندي ولزمتني من أيدي استوقفتها واني اسأل،

فيروز: وين ماخذتني؟

تعالي وانت تعرفين.

مشينه وقفتني يم باب لونه اسود طرقت الباب سمعت صوته دخلنه ضربت تحيه وطلعت واني بقيت واگفه أشرلي بأيدة انو اقترب سويت مثل ميريد صرت قريبه من المكتب أشرلي مره ثانيه وهو يقرأ بملف امامه اگعد على الكرسي ايضاً سويت اللي يريدة،

انتبهت بشكله نسيت المكان والزمان ولفتني رسم ملامحه المبهر والساحر للنظر دققت بكل شي بيه لدرجه حفظته،

حامض حلو بحلگه طبعاً اعرفه من ينقلها من خد الى خد ثاني بس ميحركها حتى متبين الى اذا تعمقت النظر بيه لابس نظارات قراءة وأيد لازم بيها الملف والثانيه مخليها على شواربه يلعب بيهن ابتسمت شكله حلو او حرفياً هو كله على بعضه حلو او يمكن من حبي اله اشوفه هيج ماعرف،

قاطعني صوته وهو يگول وعينه مشالها من الملف.

هَيْصَم: ان شاء الله ضيافتنه عجبتج؟

فيروز: اي كلش ناس راقين انتوا.

رفع نظره و ابتسم بوجهي وگال بنبرة تساؤل.

هَيْصَم: جروحج شلونهن؟

فيروز: من شفتك تعافن.

هَيْصَم: غزل هذا يول؟!

فيروز: ليش هذا غزل؟!

هَيْصَم: صرتي تقلدين الهَيْصَم؟!

فيروز: الجميع تتشبه بالأسود وين المشكله!!

هَيْصَم: الا انتِ اريدج لَّبوة متتشبهين بأحد.

صمت دام ثواني قطع الكلام وبقت اعيونه هي اللي تحجي اخذني لغير عالم بنظراته قريت بيهم كل شي ميگدر يگوله نسيت ألمي وخوفي من المستقبل المجهول لكن نسيت بنفس الوقت اللحظات السعيدة مدوم ابداً ولازم تنتهي بشي سيء يعكر المزاج ويگلب الوضع من سيء الى اسوء.

يتبع.

هذا بارت مقدم لباجر فيعني باجر ماكو بارت شمعاتي،

تصبحون على الف خير وعافيه.

حسابي الأنستا.

@zahraaahmedn99