الفصل الثاني

تغادر ندى بغضب و تترك عمر و سليم يتحدثان و اثناء حديثها يقل سليم بطريقة مفاجئة

سليم/ عمر انت كنت معايا شيفت امبارح مش كده ؟

عمر/ ايوه

سليم/ يبقى انت اللي قولت لندى اني كبيت عليها مايه امبارح

يمسكه سليم من قميصه بطريقة كوميديه يقل عمر بتوتر مصطنع

عمر/ و الله العظيم ما قولت لها حاجه يا سليم..... صحيح انا شوفتك و انت بتعمل كده بس والله ما قولت لها حاجه

سليم/ ماشي يا عمر انا مصدقك بس عارف لو طلع أنت لهخليك تسلم على اجهزة العناية المركزه

عمر/ سيب القميص يا سليم هيتكرمش اوعى

سليم/ حاضر يا دنجوان المستشفى

عمر/ ههههه

و اثناء الحديث يرون ندى تأتي بغضب لهم و تقل

ندى/ البنت دي دماغها جزمه قديمه

سليم/ مش قولتلك

ندى/ لا دي حاجه صعبه اقسم بالله.....أولا من اي كلمه بتعيط....و مبتحبش حد يعرفها غلطها

سليم/ انا قولت انهم عندهم داء النفاق و محدش صدقني.....و بعدين

ندى/ مفيش.....حاولت كلمه مني على كلمه منها لقيتها راحت غضبانه و سيباني

سليم/ دا اللي دخل حلا كلية الطب ده مش ظلمها لا......دا ظلم طلاب الكلية و الطب نفسه

عمر/ انت اتكلمت مع امجد

سليم/ لا لسه.....انا زهقت من الكلام معاهم اصلا....اتنين طرش مش سامعين غير نفسهم

عمر/ انا هروح أحاول معاه

سليم/ ربنا يجعل في وشك القبول يا عمر.....عشان اني زهقت خلاص

يضحك عمر على رد سليم و يغادر ينظر سليم لندى و يقل

سليم/ ندى

ندى/ نعم يا سليم

سليم/ مالك

ندى/ مليش....انا كويسه مالي؟

سليم/ انتي زعلانه من عمر ولا ايه

تقل ندى في نفسها

ندى/ هو احنا بنتكلم أصلا عشان اضايق منه

ثم تقل له

ندى/ لا خالص هو معملش فيا حاجه

سليم/ ماشي يا ندوش.....بس يا ندى انا مش مجرد صديق انا اخوكي.....لو في حاجه عاوزه تقوليهالي قوليها.....و انا جاهز و مستعد اسمعك في اي وقت

ندى/ شكرا جدا يا سليم

سليم/ يلا يا بت نقوم نشوف شغلنا بدل ما احنا عاملين زي خالتي اللتاته

تضحك ندى على رد سليم و يغادرون

-----------------------------------------------------------------

يقابل عمر امجد يقل له

عمر/ امجد

امجد/ عموره تعالى (بضيق خفيف)

عمر/ايه يا عم شايل طاجن ستك ليه؟

امجد/ طاجن ستي بس....دا انا شايل طواجن العالم كله على دماغي

عمر/ ايه اللي حصل؟

امجد/ حلا

عمر/ مالها

امجد/ زهقت من وضعنا ده......كل يوم خناق و زعيق و المشاكل حتى مبتقلش بلا بالعكس بتزيد يا عمر

عمر/ انت مشكلتك يا امجد انك مع حلا ديما عامل زي الروبوت ليه مهم محدده هيخلصها و يفصل الفيشه و يقعد.....مع ان حلا مش عاوزه ده.....هي عاوزه فاصل من الشغل و جو الروبوت اللي انتوا عايشينه....بتأدوا مهم معينه على أكمل وجه وخلاص.....حلا عاوزه امجد مش دكتور امجد

امجد/ عمر انا عارف كل الكلام ده.....هي ديما بتشوفني بقصر في اللي انا بعمله و اني مبحولش ارضيها بس صدقني هي فاهمه غلط.....انا فعلا بحاول أسعدها بس هي اللي مش مقدره

عمر/ طيب يا أمجد.....خليك انت العاقل و صالحها....انت عارف حلا بتزعل تزعل و تنزل على مفيش انا اعتقد دلوقتي لو قلتلها كلمه حلوه ....هتنسى اللي حصل دلوقتي

امجد/ هحاول يا عمر

-----------------------------------------------------------------

و اثناء إنهاء الدوام كان سليم يجمع اغراضه و نظر إلى جاسر و لاحظ انه يفرقع صوابعه فادرك انه متوتر يقل له سليم

سليم/ مالك يا جاسر متوتر و كأنك عندك امتحان شفوي كده ليه؟

جاسر/ قلقان شويه

سليم/ من ايه يا عم جيجا.....خايف الباقه تخلص ولا ايه ما انت جيجا بقى

جاسر/ لا لا.....نكت بايخه زي دي تاني هنفخك من غير ذرة ندم

سليم/ هههههه خلاص خلاص.....انت قلقان من ايه

جاسر/ خايف من نفسي.....انا النهاردة شيفت مع فريده......خايف لمشاعري تخوني النهاردة......انا اه صحيح شخص هادي و متزن و مش متسرع في اتخاذ القرارات.....بس مع فريده انا ببقى شخص تاني.....ببقى هاين عليا دلوقتي اقوم و اعترف لها.....و حتى لو معرفتش....ببقى خايف يكون باين عليا

سليم/ في موضوع انت هادي و متزن ده كدب عموما.....انت عبيط زيي بالظبط.....بس مش ده المهم.....جاسر انت كتمت حبك من ناحيتها سنين.....و هي مكنتش عارفه انك بتحبها.....متخفش فريده سازجه في الحاجات دي.....و حتى لو بأن عليك......يا ريت تحس فعلا ان في واحد زيك بيحبها....معتقدش هتلاقي إخلاص و لا وفاء في حد زيك يا جاسر

ينظر جاسر إلى سليم نظرة مليئة بالامتنان و الشكر

يقل له سليم

سليم/ انا همشي بقى الحق اي ميكروباص يروحني

جاسر/ خلي بالك على نفسك يا شابه

سليم/ متقلقش عليا يا سي جاسر (بصوت انثوي)

جاسر/ اوعي حد يعاكسك في الميكروباص

سليم/ لا متخافش....محدش يجرئ يعاكسني يا سي جاسر يمكن يتحرش بيا اه (بصوت انثوي)

يضحك كلا من جاسر و سليم على هذه التمثيلية

-----------------------------------------------------------------

كانت ندى تجمع أغراضها تنظر إلى حلا بطرف اعينها و تراها تقل لها ببرود

ندى/ عاوزه ايه يا حلا

حلا/ بصيلي يا ندى

ندى/ لا

حلا/ ندى انتي عارفه اني انا دبش و كلامي و مبفكرش فيه.....دا انتي اكتر واحده عرفاني

تعتدل ندى من وضع نظرتها و تقل في غضب مصطنع

ندى/ ايوه انا استفدت ايه يعني

حلا/ خلاص بقى يا ندوش قلبك ابيض......و الله انتي اكتر واحده لما تزعلي مني ببقى بحتقر نفسي اوي

تنظر ندى لها من أعلى لاسفل و تقل في تكبر مصطنع

ندى/ لا و انا الصراحه مبصحبش ناس حقيره

تمسك حلا ذراعها و تحتضنه بقوة تقل لها ندى

ندى/ اييييه اوعي يا لازقه

حلا/ مسمحاني

ندى/ خلاص يا ستي سامحتك

حلا/ حبيبتي يا ندوش

ندى/ و انتي مش حبيبتي خالص....سيبي دراعي بقى اعععع

تدخل فريده الغرفه و تقل

فريده/ محظوظه يا ندى انتي و حلا....هتروحوا و النهاردة شيفت

ندى/ طب ما انا كنت شيفت امبارح.....عوزاني ابقى النهاردة كمان.....ليه صاحب المستشفى اسمه راشيل ولا ايه؟

فريده/ انا بكره الشيفت

ندى/ بس انتي معاكي اكتر حد هيسليكي في الشيفت

فريده/ تقصدي جاسر يعني

ندى/ ايوه.....ده هو عامل زي سليم بس مش نفس التخلف بتاعه.....حاجه كده على الهادي يا زبادي

فريده/ دا كويس اني مش مع سليم.......لحسن هو بيغلس على اي حد معاه طول الشيفت

ندى/ انا أدركت ده متأخرا للأسف

تضحك حلا على رد ندى و تقل فريده

فريده/ ليه ايه اللي حصل

ندى/ الدكتور اللي معرفش ازاي اتخرج من الكليه الطب كب عليا مايه ساقعه تلج و انا نايمه في الشيفت

فريده/ هههههههه يا نهار ابيض بجد

ندى/ اه و الله......كنت شيفت مع الجوكر مش مع سليم

تضحك حلا و فريده على ندى ثم يتحدثان في أمور مختلفه

------------------------------------------------------------------

عند عمر

يعود عمر إلى المنزل و يرى والدته تنتظره بغضب و تنادي عليه و هو في طريقه إلى غرفته و تقل

الفت/ عمر

يتافف عمر بقوة و يقل

عمر/ نعم يا ماما

الفت/ ابوك كان اتصل و قال انه عاوزك تروح له عشان يكلمك في موضوع مهم

عمر/ موضوع ايه

الفت/ هو قالي مقلكش حاجه

عمر/ يبقى موضوع الجواز

الفت/ عمر انت كبرت خلاص و قربت على ٣٠ سنه مش معقول هتفضل كده لحد امتى

عمر/ لحد ما انا اللي اعوز مش انتوا اللي تعوزوا

ألفت/ عمر انت عنيد و بتعاند في موضوع الجواز

عمر/ انا حر يا ماما

الفت/ لا مش حر.....انا صحيح حاولت معاك عشان تتجوز و جبتلك كل بنات اصحابي......مكنش قدامي حل غير أوافق على حل ابوك.....بالرغم اني مبحبش انه يدخل

عمر/ لما تعالجي مشكلك معاه ابقى ساعتها افكر اتجوز

الفت/ ايه علاقة علاقتي بوالدك بجوازك يا عمر

عمر/ انا مش هجوز واحده و اقولها تعالي يلا اتفرجي على عيلتي المفككه......اب و ام منفصلين بقالهم ١٨ سنه....و كل واحد بدل ما بيفكر يبعد عن التاني....شغالين ينفخوا في بعض

الفت/ هي مش هتبقى عارفه علاقتي بابوك وحش ولا حلوه يا عمر هي هتبقى همها انت.....مش اهلك

يضحك عمر بسخرية و يقل

عمر/ تفكيرك يا ماما سطحي اوي.......اذا كان هي همها انا فإنا همي انتم و هي......اوفففف انا رايح انام يا ماما مش عاوز حد يدخل عليا.......و انكل يسري يريت لو سأل عليا.....قوليله مات .....في الشيفت ......المهم اني مش عاوز اقابله

الفت/ و هو انكل يسري عملك ايه يا عمر.....دا بيعاملك زي ابنه بالظبط

عمر/ معلش اعتبريني راجل مفتري راجل مبيطمرش فيه المعروف

يغادر عمر والدته و يذهب إلى غرفته و هو في قمة الحزن

------------------------------------------------------------------

عند سليم

يعود سليم إلى المنزل و يرى اخته جنى تجري خلف اخوه الصغير فارس

يذهب سريعا سليم لكي يفصل بين جنى و فارس يقل سليم لها

سليم/ مالك يا جنى بتجري ورا فارس ليه....انت عملت ايه ياض

جنى/ سليم هو مش كانوا زمان بيوأدوا البنات صح

سليم/ حصل

جنى/ انا بقى هرجع فكرة الوأد بس للصبيان

تحاول جنى ان تنقض على فارس و لكن يعيقها سليم و يمنعها و يقل لفارس

سليم/ انت عملت ايه يا آخرة صبري

فارس/ اختك هي اللي مكبره الموضوع

جنى/ ولا انت تخرس خالص انت ليك عين تتكلم....جايب البجاحه دي منين يلا

فارس/ من سليم

سليم/ اسيبها عليك يعني ولا اعيد تربيتك من اول و جديد.....اخرس يا فارس.....اهدي كده يا جنى و قوليلي حصل ايه؟

جنى/ الحيوان ده رسم على البالطو بتاعي

فارس/ انا الحق عليا اني كنت عاوز ازوقهولك بدل ما هو ساده كده

سليم/ هو فستان خطوبتها يا فارس دا البالطو اللي بتحتاجه في الكليه و في المعامل

جنى/ يبقى انا ليا حق اطبق في زمارة رقبته ولا لا

سليم/ خلاص يا جنى حصل خير انا هجبلك غيره تروحي بيه الكليه و انت يا فارس ملكش دعوه بحاجه اختك ماشي.....اعتذر يلا يا فارس

فارس/ هو انا غلطت لما عوزت اعملها شغل في البالطو

سليم/ يا عم الفاشون دزاينر متبقاش تتصرف من دماغك هو بالطو الدكاتره تصميمه كده

فارس/ خلاص يا جنى انا اسف

جنى/ هوففففف......خلاص محصلش حاجه

سليم/ عاوز اعد واحد اتنين تلاته ملاقيش الخلق دي في الصاله

جنى/ يعني ايه انت........

سليم/ واحد

يجري كلا من جنى و فارس إلى غرفتهم سريعا يضحك سليم عليهم و يذهب إلى غرفته

------------------------------------------------------------------

عند حلا و امجد

يعود كلا من حلا و امجد و اثناء دخولهم تحول حلا الذهاب الى غرفتهم سريعا يقل لها امجد

امجد/ استني يا حلا انا عاوز اتكلم معاكي

حلا/ نعم يا امجد

امجد/ حلا انا عارف انك زعلانه مني.....بس صدقيني انتي فاهمه غلط انا فعلا بحاول اوفر وقت و نقعد مع بعض......بالعكس انا ليه مش هحاول اعمل كده

حلا/ عشان تهربي مني من الولاد مثلا

امجد/ مستحيل يا حلا انتي و حبيبه و إياد احلى حاجه في حياتي.....بس عاوزك تقدري يا حلا ان عليا ضغط شغل و محتاج انك تساعديني مش تلوميني

حلا/ انت قولت كده قبل كده يا امجد و انا ساعدتك بس انا خلاص مش قادره.....انت معظم الوقت عندك ضغط شغل

امجد/ صدقيني فتره و هتعدي يا حلا......خليكي جمبي بس و انا ولله هحاول على قد ما اقدر اتواجد معاكم

حلا/ حاضر يا امجد بس انا عاوزه افهمك حاجه.....زني عليك و زعلي منك في الموضوع ده عشان انت فارق معايا يا امجد وجودك معايا و مع الاولاد بيفرق كتير.......بيسعد الاولاد و بيسعدني قبليهم

يحتضنها امجد و يقل

امجد/ يااااه كان فين الكلام ده يا لولي.....ولا احنا لازم نفضح نفسنا في المستشفى عشان تقولي الكلام ده

تضحك حلا على رد امجد تدخل حبيبه بينهما و تقل

حبيبه/ انتوا بتعملوا ايه؟

يقل امجد بصوت منخفض لا يسمعه سوى حل

ا

امجد/ هادمة اللذات

تضحك حلا على رد امجد

ثم يقل لحبيبه

امجد/ كنتي بتعملي ايه يا بيبو

حبيبه/ كنت انا و إياد بنرسم رسمه كبيره اوي

حلا/ طيب يا حبيبتي روحي اغسلي اديكم و تعالوا عشان نتغدا

يذهب حلا و امجد لتغير ملابسهم و يذهب إياد و حبيبه لغسل ايديهم

------------------------------------------------------------------

كان جاسر يمر على الحالات و بعد الانتهاء من فعلته تقابله فريده و تقل

فريده/ جاسر انت رايح تنام

جاسر/ لا مش تعبان....بتسالي ليه؟

فريده/ انا عاوزه حد يساليني الصراحه

جاسر/ هو انتي خلصتي شغلك

فريده/ خلصته و مش عارفه انام و زهقانه

جاسر/ تعالي نقعد

يذهبان إلى مقهى المشفى و يجلسا يقل جاسر

جاسر/ تحبي اسليكي ازاي؟

فريده/ معرفش حاول تضحكني

جاسر/ مكنش طموحي الصراحه اشتغل الخليل كوميدي

فريده/هههههه....لا مقصدش كده قولي نكته تضحك

جاسر/ ما انتي ضحكتي اهو

فريده/ لا انا مضحكتش

جاسر/ دا على الأساس اني أحول و مشوفتكيش و انتي بتعملي هيهيهيه (يقلد ضحكتها)

فريده/ هههههههه انا بضحك كده.....ليه قاعد مع عرسة

جاسر/ فيكي منها الصراحه

فريده/ هي مين

جاسر/ العرسة

فريده/ شكرا يا جاسر

و كانت سوف تغادر يقل لها جاسر

جاسر/ اقعدي يا بنتي بهزر......مفيش عرسة بتلبس بالطو

فريده/ هي المشكله في البالطو......دمك تقيل على فكره يا جاسر

جاسر/ خلاص خلاص......هقولك على نكته حلوه تعجبك

فريده/ خلي بالك عشان انا صعب اضحك

جاسر/ حاضر يا عرسة

تضحك فريده على جاسر ثم يقل لها

جاسر/ صعب تضحكي دا انتي اللي بينفخ في وشك بتضحكي

فريده/ ما انت ردك بيبقى غير متوقع

جاسر/ انا اسمي جاسر خارج الصندوق.....اسمعي يا ستي

محشش معجب بجارته اللي جوزها ميت قرر يقولها راح و خبط على الباب فتحتله و شافها من غير مكياج من الصدمه مش عارف يقول اي فقالها مفيش اي اخبار عن المرحوم

تضحك فريده على نكتة جاسر لدرجة ان اعينها كانت سوف تبكي و تقل

فريده/ هههههه حلوه اوي

جاسر/ اي خدمه

فريده/ و دي نكته انت اللي مألفها

جاسر/ مقتبصة عن قصة حقيقيه

تضحك فريده مرة أخرى و تقل

فريده/ انت بتتكلم جد

جاسر/ لا بهزر الصراحه......انا قراتها في الفيس بوك و عجبتني....... على فكره انتي عينك دمعت افرح ولا ازعل دلوقتي

فريده/ ههههه لا عادي دا من الضحك......اه امال صحيح يا جاسر انت بتحب القراة

جاسر/ اه بحبها اوي

فريده/ بتقرا روايات

جاسر/ يعني مش كتير.....بس الصراحه بحب اقراها اوي

فريده/ طب مبتقراش ليه كتير

جاسر/ ببقى مشغول و مبقاش فاضي اجيب رواية من المكتبه

فريده/ انا عندي روايات كتير اوي عندي مكتبه ليهم

ترا جاسر يرفع يده و يتمتم ببعض الكلمات الغير مفهومه لربه تقل له

فريده/ انت بتقول ايه

جاسر/ بحقد عليكي

تضحك فريده على جاسر و تقل له

فريده/ الروايات اللي عندي اصلا مش هتعجبك

جاسر/ ليه روايات بتتكلم عن الزومبي ولا ايه

فريده/ لا روايات رومانسيه و اغلب الرجاله مبيحبوش الروايات الرومانسيه

جاسر/ و مين قالك اني راجل.....اقصد مين قالك اني بكره الروايات الرومانسيه

تضحك فريده على جاسر ثم تقل

فريده/ انت بتحب الروايات الرومانسية

جاسر/ اه بحبها جدا

فريده/ جدع يا جاسر

يضع جاسر يده على وجهه و تقل له

فريده/ انت بتعمل كده ليه

جاسر/ بكسف

تضحك فريده على جاسر

ينفعل عليها جاسر بطريقه مصطنعه كوميديه و يقل

جاسر/ ايه بتضحكي ليه هو انا مش وش كسوف يعني ولا ايه

فريده/ لا خالص

ينظر جاسر لنفسه في كاميرة الهاتف و يقل

جاسر/ تصدقي طلع عندك حق

تضحك فريده على جاسر ثم تقل

فريده/ انا اضطر امشي عشان همر على الحالات اخر مره و اروح انام

جاسر/ انا كنت مبسوط اوي و انا قاعد معاكي

فريده/ و انا كمان الصراحه.......تصبح على خير

جاسر/ و انتي من اهله

تغادر فريده جاسر و تتركه و هو في قمة سعادته و فرحه بسبب جلوسه معاها التحدث معاها