الفصل الاول

منظر ازدحام السيارات و اصوات السيارات المزعجه و مشاجرات الشارع كان هناك عربة صغيره تحمل راكبين تفوق قدرتها بمراحل يجلس شاب بعمر الثامن و العشرون عاما و لكن ليس جلوس رجل بالغ بلا جالس و نصف وجهه شبه ملتصق بالزجاج و جسده ملتصق بباب العربة يقل في نفسه

سليم/  الله يسامحك يا جاسر على اللي عملته فيا دا

يقل في نفسه مقلدا جاسر

سليم/ قال مش فاضي والله يا سليم اصلي متأخر......على أساس انا غاوي تهزيق من المدير يعني......يا رب دكتور راجي يحصله فقدان في الذاكرة لحظة وصولي يا رب......اوووف

يسمع احد الركاب يقل

...../ ٣ من عشره يا أستاذ

سليم/ حضرتك بتكلمني انا

..../ ايوه

سليم/ بتقول ايه عشان مسمعتكش

...../ بقول لحضرتك ٣ من عشره

سليم/ حضرتك ساقط يعني....طب و انا مالي

..../ ساقط ايه يا أستاذ انا بقولك قول السواق ٣ من عشره

سليم/ ايوه يعني و هو السواق هيصلحلك الدرجه الهباب اللي انت جبتها دي

...../ يا باشا ما تسمع الكلام و تقوله ٣ من عشره و تخلصني

سليم/ حاضر يا عم...... ياسطا في واحد ساقط ورا و بيقولك ٣ من عشره

بعد عدة دقائق يصل سليم إلى المستشفى يذهب سريعا إلى غرفة الأطباء ليرتدي المعطف الطبي لديه يقابله جاسر و يقل

جاسر/ ايه يا ابني اتاخرت ليه؟

سليم/ انت بالذات تبعد من وشي عشان و الله هجيب المشرط بتاع العمليات و اعملك ورده جمب حسنة احمد السقا اللي عندك دي

  جاسر/ ليه انا عملت ايه؟

سليم/ مش بعتني يا واطي و قولتلي انا اسف ياسطا بس انا متأخر مش هعرف اجي اخدك.....من امتى الانضباط ده دا انت كنت بتروح الشغل بعد ما دكتور راجي يمشي من الشغل

جاسر/ هو عشان اتغيرت و قررت ابقى انسان مسؤل تبقى دي حاجه وحشه

سليم/ يا ولا...... و المسؤولية دي حلت عليك اول ما الدكتوره فريده اشتغلت في المستشفى صح

جاسر/ وطي صوتك يا سليم انت عاوز تفضحني

سليم/ متخفش اوي يا خويا.....الدكتوره فريده بتاعتك دخلت العمليات من شويه واحده و انا جي هنا مبطلتش صويت في ودني لدرجه انها بقت تصفر.....و لسه لحد دلوقتي......بس ده اللي مش مهم.....انت ليه مرحتش قولت لفريده انك بتحبها

جاسر/ مش دلوقتي يا سليم

سليم/ امال امتى 

جاسر/ لسه مجاش الوقت المناسب..... انا عارف هقولها امتى

سليم/ اول ما تتخطب لغيرك تاني مش كده

ينظر جاسر لسليم نظرة غضب و حزن و يجلس على مكتبه يذهب تجاهه سليم و يقل

سليم/ انا مقصدش يا جاسر.....بس انت قولت كده برضو و احنا في الكليه و برضو قلت استنى لحد ما اتخطبت لحسن زميلنا في الكليه....انا بس بفكر بالواقعه اللي وقعتها عشان تاخد بالك منها و متكررهاش يا دك

جاسر/ عارف يا سليم انا مش زعلان منك.....مفيش اخ بيزعل من اخوه.....انت اكتر واحد ساعدني في حياتي و اكتر  واحد تقلت عليه

سليم/ اهو دا بقى الكلام اللي يزعل.....مفيش اخوات بيقولوا لبعض كده......و يلا بقى قوم بطل نكد انا شبعت نكد في الميكروباص......ست كانت قاعده جمبي و بتتكلم في التليفون حرفيا مفيش حاجه في حياتها عدله......ابوها قتل امها و جوزها اقتل ابوها.....و هي حلقت شعر حمتها زيرو و سلخت الصلعه.....و جوزها رما اخواتها من البلكونه....يعني حياة فعلا مليانه بالمغامرات و الاكشن

جاسر/ هههههه  حقك عليا يا سليم.....انا سبب في الكل اللي حصلك ده

يرمش سليم اعينه اليمنى عدة مرات علامة على إصابته بنومبة نفسية و يقل

سليم/ لا عادي ولا يهمك

جاسر/ ولا يا سليم انت عينك بترعش كده ليه

سليم/  شلل مبكر متقلقش

يضحك جاسر على رد سليم و يذهبا معا خارج الغرفة

و اثناء سيرهم في المستشفى يرون الدكتور راجي يتوقف سليم بسرعه و يدور و يعود إلى الخلف بطريقة كوميديه يقل له راجي

راجي/ دكتور سليم

سليم/ انا مش دكتور.....اقصد مش سليم

راجي/ دكتور سليم تعالى قدامي حالا

يذهب له سليم و على وجهه ابتسامة ممزوجه بالتوتر و يقل

سليم/ عم الدكاتره و ابو الاستشاريين

راجي/ انت واصل المستشفى من امتى

سليم/ من حوالي ساعتين يا دكتور

راجي/ عليا الكلام ده برضو يا سليم

سليم/  لو حضرتك مش مصدقني اسأل جاسر

راجي/ اه اسأل صاحبك.....اللي اكيد هيطبلك

يمر عليهم دكتور يدعى الدكتور عيسى يقل له راجي

راجي/ دكتور عيسى

عيسى/ نعم يا دكتور راجي

راجي/ سليم واصل المستشفى من امتى

يقم سليم بالغمز لدكتور عيسى و لكن لا يفهم عيسى مقصده و يقل

عيسى/ بقاله عشر دقائق يا دكتور

يلطم سليم على وجهه و يقل

سليم/ الله يلعنك يا عيسى

عيسى/ هو في ايه هو انا عكيت ولا ايه؟

جاسر/ انت هتشولح يا عيسى

يقم سليم بعمل حركات التهديد لعيسى مثل الذبح و الخنق و الضرب باللكمات ينظر له الدكتور راجي بتحذير و غضب يبتسم له الدكتور سليم بتوتر يقل راجي لعيسى

راجي/ روح شوف شغلك يا دكتور عيسى

يغادر عيسى سريعا قبل ان ينقض عليه سليم ثم يلتف راجي لسليم و يقل

راجي/ احب اسمع مبررك المتخلف

سليم/ حضرتك عارف أني معايا شهادة معاملة اطفال صح

راجي/ و انا اللي ماضي عليها كمل

سليم/ يبقى ليه تحط عقلك بعقل واحده عمره العقلي ميتعداش الخمس ثواني من ولادته

راجي/ بس انا مبشغلش متخلفين عقليا

سليم/ لا لا خلاص يا دكتور راجي انا اسف مش هتكرر تاني.....متفرفش كده يا دكتور راجي و تزقطط....ليه ضارب وش محمود المليجي ده

راجي/ شايف يا دكتور جاسر.....اتعلم من الدكتور جاسر الساعه سابعه بالدقيقه بيكون في المستشفى

سليم/ ان شاء الله اول ما يجلي كرش هنضبط

يضربه جاسر في جانبه بقوه و يقل

جاسر/ اوعدك يا فندم انه هيتغير......و انا هشرف على كده

راجي/ اتمنى ذلك

يغادر الدكتور راجي سليم و جاسر يقل سليم لجاسر

سليم/ انت بالحركه اللي عملتها دي جبتلي فشل كلوي بيها

جاسر/ تستاهل عشان تلم لسانك بعد كده اللي عاوز قصه ده

سليم/ صباح الخير يا دكتوره فريده

ينظر جاسر خلفه سريعا و لكن لم يجد فريده فسليم كان يعمل به مقلب يسمع ضحكات سليم من خلفه و يقل له

سليم/ شكلك مفضوح اوي ياسطا

ينظر له جاسر بغضب شديد يقل له سليم

سليم/ ولا يا جاسر انت احمريت كده ليه......اوعى تكون جتلك الحصبه

يجري سليم من جاسر و يجري خلفه جاسر و كان يهينه باسوء الألفاظ و كان سليم يضحك عليه

يقف جاسر فجأة عندما يسمع صوت يقل

...../ على الدكتور جاسر إحسان فهمي التوجه إلى غرفة العمليات رقم ٣

يتكرر هذا النداء يقل جاسر

جاسر/ محظوظ يا سليم

سليم/ الحمد لله يا رب انك مخلتنيش اموت دلوقتي

جاسر/ استنى بس عليا بعد ما اخرج من العمليات.....اذا كنت مخلتكش مكان المريض اللي رايح اعمله العمليه مبقاش جاسر

و اثناء مغادرة جاسر يقل له سليم

سليم/ good luck  جيجا

يبتسم له جاسر ثم يغادر

و بعد عدة دقائق و كان سليم يعمل على بعض أوراق المستشفى يرى احد قد اقتحم المكتب و يرى انها الدكتوره حلا

تذهب تجاهه و تقل بغضب و تقترب منه بشده و تقل

حلا/ انت لازم تشوفلي حل يا سليم مع صاحبك أمجد ده

سليم/ اعععع....ابعدي عن امي يا حلا......هو انا ناقص قطع خلف.....انا لو بقيت عقيم هتبقي انتي و جوزك السبب

حلا/ سليم انا مبهزرش

يقتحم الغرفة أمجد و يقل

امجد/ كويس ان سليم موجود

سليم/ لا مش كويس خالص

امجد/ حلا بقولك ايه انا لغاية دلوقتي ماسك اعصابي متخلنيش اتجنن عليكي ( بغضب شديد )

سليم/ يا راجل كل ده و ماسكها.....امال لو فلتها هتبقى عامل ازاي

حلا/ شوفت يا سليم بيشخط فيا ازاي..... و انا أصلا صوتي ميتعداش علو صوته (بصوت عالي بشده)

سليم/ امال انا وداني صفرت من مين يا حلا......دا انتي كمان شويه و هتغلبي تردد صوت الدولفين

امجد/ شايف يا امجد....قولي انت انا اعمل ايه

سليم/ انتوا الاتنين محتاجين تتعالجه من النفاق.....انتوا عندكم داء اسمه......نفاقوليا

يقل امجد و حلا في وقت واحد

امجد و حلا/ سليم احنا مبنهزرش

سليم/ يا رب ارحمني

يسمع طرق على الباب يقل

سليم/ ادخل بسرعه

تدخل فريده و تقل

فريده/ هو في ايه؟

سليم/ الحقيني يا فريده

تذهب فريده بجانب حلا و تقل

فريده/ في ايه انتوا عاملين كده ليه؟

ينظر كلا من امجد و حلا لبعض بغضب و يقل امجد لها

امجد/ ماشي يا حلا اما وريتك ما بقاش انا امجد

حلا/ و انا اما وريتك مبقاش انا حلا

سليم/ و انا اما مشتوش من قدامي مبقاش انا سليم.....امشوا احسن والله لقول لدكتور راجي

يذهب كلا من امجد و حلا من غرفة المكتب مسرعا خوفا من الدكتور راجي تقل فريده

فريده/ هو في ايه يا سليم

سليم/ انتي يعني مش عارفه امجد و حلا من ساعت ما قالوا لان الحلال أجمل سانتظر و انتظروا و اتنيلوا على عينهم و اتجوزوا و هما على طول في خناق

فريده/ تاااني

سليم/ تاني ايه يا فريده قولي ٨٩٧٦٥٧٢٩ مليون مره

تضحك فريده على رد سليم و تقل

فريده/ هموا ليه بيجولك على طول

سليم/ نتانه على رأي لبلبه في فيلم وش إجرام

فريده/ ههههه لا بجد ليه

سليم/ هموا مش على طول بيروحوا ليا.....ساعات لجاسر و ساعات لعيسى و ساعات ليا....بس جاسر و عيسى طيبين انا بديهم بالجزمه عادي .......بس انتي عارفه ايه اكبر مشكله فعلا في حياتهم

فريده/ ايه؟

سليم/ انهم بيدخلوا  الناس في مشاكلهم......لو كانوا حل مشاكلهم بينهم و بين بعض مكنش باقوا بالوضع اللي انتي شيفاه ده

فريده/ عندك حق فعلا يا سليم

يسمعون سليم و فريده صوت جاسر و هو يدخل الغرفه و يقل

جاسر/ فضلتلك يا سليم الكل.....

ينظر جاسر إلى فريده بصدمه و يقل

جاسر/ فريده.....انا اسف معرفش انك في الاوضة

فريده/ لا عادي يا جاسر ولا يهمك

يسمعون غناء سليم و هو يقل

سليم/ و قابلتك انت لاقيتك بتغير كل حيااااتي....معرفش ازاي انا حبيتك....معرفش ازاي يا حياااااتي

تغادر فريده سليم

يذهب جاسر لسليم و يمسكه من قميصه و يقل

جاسر/ انت برضو مش ناوي تحرم نفسك

سليم/  ايه يا عم جاسر ......هو الغنى اتمنع في المستشفيات اليومين دول ولا ايه

يدخل عيسى الغرفة يرى سليم يريد ان ينقض عليه من فوق مكتبه يمسكه جاسر بإحكام يقل عيسى

عيسى/ هو في ايه مالك يا سليم

سليم/ مالي! بقى متعرفش مالي ها.....محدش معاه حاجه ابطحه بيها

عيسى/ اهدء بس انا عملت فيك ايه

سليم/ انت....انت خنتني خيانه اسوء من خيانة امي لما تبقى عمله بسلة.....بقى يا جزمه دكتور راجي يسألك انا جي من امتى تقولوا من عشر دقائق

عيسى/ انا معرفش انك عاوزني اكدب عليه

سليم/ دي مفيهاش عاوز يا عيسى....دي بديهيات الحياه يا بابا

يقذف جاسر سليم على المقعد و يقل

جاسر/ اترزع بقى

عيسى/ جاسر غرفة ٣١١ طلباك

سليم/ تقصد الست صفاء

جاسر/ انا رايح لها

و  بعد مغادرة جاسر يقل عيسى

عيسى/ انا بدأت احس ان الواد جاسر ده شوجر مامي

سليم/ اصلك متعرفش قصتها يا عيسى

عيسى/  و هي ايه قصتها

سليم/ من يوم ما جت المستشفى هنا و جاسر بدا يباشر في علاجها ولادها كانوا بيزوروها اول تلات شهور دخلت فيها المستشفى و بعد كده بطلوا يزوروها.....جاسر حاول يتواصل معاهم عشان يرجعوا يزوروها تاني لان حالتها النفسية بقت وحشه جدا بعد انقطاع زيارتهم و بعد حوالي شهر جلها فقدان في الذاكرة و مبقتش فاكره حاجه خالص.....و من ساعتها و هي لما تقابل حد تاني يوم تنساه......و جاسر بقى بالنسبالها كل حاجه كان احن عليها من ولادها

عيسى/ و انتوا معرفتوش ولادها

سليم/ جاسر عرفهم بس تقول ايه عيال وسخه متمرطش فيهن التربيه

و بعد عدة دقائق من التحدث يرى سليم ندى التى ترتدي نظارة طبيه.....تراه ندي و تجري إلى غرفة المكتب يذهب سليم سريعا إلى باب الغرفه لكي يغلق و لكن كان ندي تعيقه تقل له

ندى/ افتح يا سليم

سليم/ ابوس ايدك يا ندى اهدي

ندى/ سليم افتح بدل ما هنيمك في تلاجة الميتين النهاردة

سليم/ حاضر بس تهدي

ندى/ سلييييم

سليم/ يا منجي من المهالك يااااااارب

يفتح سليم الباب و يرى ندى تقتحم الغرفه و تقل

ندى/ بقى انا تكب عليا ميه و انا نايمه امبارح في الشيفت

سليم/ انا بس نفسي افهم مين الحلوف اللي قالك امبارح......بصي يا ندى انا كنت ملان جدا في الشيفت فقولت اما نتسلى شويه

ندى/ و انا جايه لك بقى النهاردة مخصوص عشان اسليك

سليم/ كرهت التسليه

كانت ندى سوف تنقض على سليم و لكن راوغها سليم و هرب منها تجري خلفه ندى و اعينها تشع انتقام و يجري خلفهم عيسى

------------------------------------------------------------------

في الجهة الأخرى

ذهب جاسر إلى غرفة ٣١١ و دخل و قال بمرح

جاسر/ صفصف قلبي

صفاء/ أنت مين يا ولد يا حليوه انت

جاسر/ انا جاسر يا صافي.....دكتور جاسر

يذكرها جاسر به ثم تقل

صفاء/ اه جاسر حبيبي......تعالى

يذهب لها جاسر و يقل

جاسر/ عامله ايه يا صافي

صفاء/ الحمد لله.....و كمان ايه صافي دي....عيب تقولي كده

جاسر/ تقلانا عليا ليه بس يا صافي

صفاء/ بس يا واد بتكسف متقولش صافي

جاسر/ يا حلاوة القشطه لما تحمر

صفاء/ بتموت انت في البكش

يذهب جاسر امام الفراش و يمسك تقرير الحاله و يقل

جاسر/ ايه اخبارنا بقى النهاردة

ينظر جاسر  للتقرير و لكن لم يكن سارا فهي ما زالت تقريرها سيئة و لكن ليست سيئة للغاية

يقل بإبتسامة عكس بما داخله

جاسر/ دا احنا بقينا حلوين خالص اهو......انا رايي بقا نجوزك

صفاء/ اومال انا صحيح انا مجوزتش ليه يا جاسر.....يمكن انت فاكر

يحزن جاسر على حالتها و يقل بإبتسامة تردد

جاسر/ لا يا حبيبتي انتي اتجوزتي.....و جوزك مات بقاله ٧ سنين

صفاء/ لا حول الله يا رب......طب انا مخلفتش

يحك جاسر يده بشعره و يقل بتوتر

جاسر/ معلش يا صافي انا لازم امشي عشان اطمن على باقي الحالات

صفاء/ استنى مش هتلعب معايا كوتشينه

جاسر/  مش هقدر يا صفصف اول ما اخلص مرور على الحالات هاجيلك و نلعب للصبح

يغادر جاسر الغرفة و يشعر بالحزن و الاسئ على العمة صفاء

------------------------------------------------------------------

في الجهة الأخرى

تقل ندى لسليم الذي يقف خلف عيسى

ندى/ مستخبي زي البنات ليه يا سليم......اطلعي يا سليمه

سليم/ شايف قلة أدب يا عيسى

ندى/ انت بتقول لعيسى هيعملي ايه ها...ها

و تقف امام عيسى بغضب

يشعر عيسى بالخوف و يقل

عيسى/ هعمل ايه  يعني ما انا واقف بينكم زي حصار برلين هعمل ايه يعني

سليم/  ايوه خليك كده بقى

عيسى/ متتوقعش اني اصمد كتير.....اذا كان جدار برلين واقع انا مش هقع

سليم/ فينك يا عمر.....بدل الخيخه اللي انا بتحاما فيه ده

عيسى/ والله هسيبها عليك

ندى/ اطلع يا سليم من عندك

سليم/  أحلفي الأول انك مش هتعملي حاجه

ندى/ و الله ما هعمل فيك حاجه اطلع بقى

يخرج سليم من خلف عيسى و يقل

سليم/ قلبك ابيض يا ندوش بقى

تعتدل ندى من وضع نظرتها و تقل

ندى/  خلاص عفونا عنك

سليم/ يا الله دا احلى من العفو الرئاسي

عيسى/  اوعى بقى من وشي عطلطوني عن شغلي

سليم/ اااااه....تجي نشرب حاجه

ندى/ فعلا انا ريقي نشف من الجري وراك

سليم/ يلا بينا

و اثناء جلوسهم في مقهى المشفى يتحرك خلف سليم عمر و يقل بصوت عالي

عمر/ سليييم

سليم/ اعععععع

يبنفض سليم رعبا ثم يهتز مثل الذي اصابوا بالصرع و يخفض راسه تجاه اليمين و يغمض اعينه مثل الذي مات و توقف قلبه يقل له عمر بقلق

عمر/ واد يا سليم انت موت

سليم/ لا باخد اسكين كير.....

يتف سليم على عمر و يقل

سليم/ اتفوخس على شكلك......دا كمان شويه و كنت هسلم على جدي في القبر

يمسح عمر وجهه و يقل بقرف

عمر/ الله يقرفك يا سليم......و كمان انت اللي  قلبك خفيف على فكره

سليم/ لو انت عملت في واحد الحركه دي و متغضش يبقى اطرش رسمي او مخاوي جني معرفه انك وراه

يجلس عمر بجانب سليم و يقل

عمر/ مع علينا انا قلبت المستشفى عليك و مكنتش لقيك

سليم/ فاول ما لقتني قررت تعاقبني يعني.....عمر انت الوحيد اللي خلتني احس بكل التغيرات البيولوجية فيا

عمر/ الف سلامه عليكي....حقك عليا يا سولم

سليم/ ولا يهمك يا عموره

ندى/ انا هروح لحلا يا شباب

سليم/ عقليها يا ندى....عشان هربانه منها النهاردة معرفش ليه.......انا عارف ان فاقد الشئ لا يعطيه بس حاولي

تمسك ندى الكوب و كانت  سوف تقذفه بيه و لكن قال لها عمر

عمر/ خلاص يا ندى هتحطي عقلك بعقل صرصار بشعراية شنب واحده

سليم/ دا انا صرصار بشع اوي.....في باقي شنبي يا عمر قولي متخبيش عليا ياسطا

تغادر ندى بغضب و تترك عمر و سليم يتحدثان