أسرار خلف الجدران

ساحة المعركة

​الاشتباك بين رجال عبود وعصابة "الروسي". بيسان كانت تلحق غيث لتصوير تقريرها، وفجأة تقع في وسط النيران.

​غيث (بصراخ): "بيسان! شو عم تعملي هون؟ ارجعي لـ ورا!"

​صوت طلقة قناص تخترق.. بيسان بتوقع بالأرض وهي ماسكة بطنها والدم عم ينتشر.

​أنس: "بيساااااان! لااااااا!"

​ عبود بيوصل بـ سيارته، بيشوف غيث شايل بيسان وهي غرقانة بدمها. ملامح عبود بتتحول لـ وحش.

​عبود (بصوت بـ يهز الأرض): "بيسان! أختي.. افتحي عيونك! والله لـ أحرق الدني بمن فيها! غيث.. عـ المشفى فوراً!"

​ سيارات بتقتحم مدخل المشفى. عبود شايل بيسان وبيركض فيها لـ جوا.

​عبود (بيصرخ بالممرضين): "وينها لانا؟ نادوا لانااااا! إذا بيصير لـ أختي شي بـ هدم هالمشفى فوق راسكم!"

​مدير المشفى (بـ رعب): "سيد عبدالرحمان، الدكتورة لانا بغرفة العمليات، هلق رح ناديها".

لانا طالعة من عملية تانية، بتشوف عبود بـ هالحالة المنهارة. بتجمد مكانها لما بتشوف بيسان.

​لانا (بصدمة): "بيسان رفيقة لين؟ شو صاير معها؟"

​عبود (بيمسك لانا من كتافها وبيهزها): "لانا.. أختي عم تموت بين إيديّ. بترجاكي يا لانا.. رديلي روح بيسان، وأنا بكون مديون إلك بـ عمري كله."

لانا بتستعيد برودها المهني بـ سرعة. بتعطي أوامر صارمة.

​لانا: "سارة! جهزي غرفة رقم 4. محتاجين 6 وحدات دم . عبود.. اترك إيدي وخلينا نشتغل. كل ثانية بـ تمن حياة."

​ خلف باب العمليات - الساعة الأولى

​عبود وغيث واقفين برا. غيث عم يضرب الحيط بـ إيده وبيبكي، وعبود واقف متل الصنم وعيونه على ضوء الغرفة.

​غيث: "كله بسببي.. أنا اللي تركتها تلحقني. إذا ماتت بيسان ما رح سامح حالي يا خي."

​عبود (بصوت ميت): "اسكت يا غيث.. لانا جوا. لانا ما بـ تخلي الموت يغلبها."

لانا عم تحاول توقف النزيف. العرق عم يصب من وجهها وسارة عم تمسحه.

​لانا: "المشرط.. بسرعة! الضغط عم ينزل! بيسان.. لا تروحي منا، كرمال لين.. كرمال أخوكي."

​سارة: "لانا، الرصاصة قريبة كتير من الكلية.. الوضع حرج."

​مر 3 ساعات ولسا لانا عم تقاتل جوا. برا، لين بتوصل وهي منهارة لما عرفت إنو رفيقتها بيسان هي اللي بالداخل.

​لين (ببكي): "لانا شو عم تعمل جوا؟ ليش بيسان صابها رصاص؟ عبود.. أنتوا شو مخبين علينا؟"

​عبود (بـ تجاهل): "مو وقت الحكي هلق يا لين.. ادعي لـ رفيقتك وبس."

​سارة بتطلع لـ ثواني تجيب مستلزمات، بـ يشوفها غيث.

​غيث: "سارة! طمنينا.. بيسان لساتها عايشة؟"

​سارة (بعيون تعبانة): "لانا عم تعمل معجزة يا غيث.. بس النزيف لساته ما وقف. ادعوا لها."

​بعد خمس ساعات التعب وصل لـ آخره عند لانا. إيديها بدأت ترجف شوي من كتر الضغط والتركيز.

​لانا (بـ همس): "خلصنا.. ربطنا الشريان. الخياطة الأخيرة يا سارة.. استعجلي."

​صوت جهاز القلب بـ يبدأ يستقر.. لانا بـ تتنفس بـ عمق ودموعها بـ تنزل تحت الكمامة.

​الضوء بـ يطفي. عبود بيقوم بسرعة من مكانه. الباب بـ ينفتح وبـ تطلع لانا.

​لانا (بتمشي بـ ثقل، وجهها أبيض، وعيونها غايرة من التعب): "الحمد لله على سلامتها.. بيسان قوية، الرصاصة طلعت والنزيف وقف.. هي هلأ منيحة."

عبود بـ يبتسم بـ راحة وبدو يمسك إيد لانا لـ يشكرها.

​لانا (بتكمل كلمتها بـ صوت خافت): "أنا.. أنا خلصت واجبي.."

​فجأة، لانا بتفقد توازنها، عيونها بـ تغمض وبـ تقع بـ حضن عبود اللي بـ يمسكها بـ لهفة ورعب.

​عبود: "لانا! لاناااا! دكتور.. حدا يلحقنا!"

عبود بـ يحمل لانا وبـ يدخل فيها لـ غرفة فحص قريبة. هو اللي أنقذته بالأول، وهلق هو اللي عم ينهار من خوفه عليها.

​سارة (بـ ركض): "هاد هبوط حاد بالضغط وسكر.. صار لها 5 ساعات واقفة على أعصابها وبدون أكل. اتركها عبود، نحن بـ نهتم فيها."

لانا نايمة وعم تاخد مغذي. عبود قاعد جنبها، ماسك إيدها وبـ يبوسها بـ ندم.

​عبود: "أسف يا لانا.. أسف إني حملتك همومي. أنقذتي أغلى ما عندي، وهلق دوري صير أنا الملاك الحارس تبعك."

بيسان بـ تفتح عيونها بـ صعوبة، غيث ولين جنبها.

​بيسان (بصوت تعبان): "غيث.. لانا وين؟ هي اللي كانت جوا.. شفت وجهها قبل ما غيب."

​لين: "لانا أنقذتك يا عمري.. بس هي تعبانة شوي وهلق نايمة."

​لين بتطلع لـ برا الغرفة وبتواجه عبود بالممر.

​لين: "هلق بدك تحكيلي.. مين أنتوا؟ وليش رصاص المافيا بـ يلحقكم؟ ولانا ليش بـ تخاطر بـ حياتها كرمالكم؟"

​عبود (بـ برود): "لانا بـ تخاطر لأنها دكتورة شريفة.. ونحن عيلة الشامي، الكلمة عنا بـ راس، والرصاص عنا بـ مية راس."

​ لانا بتفتح عيونها، بتلاقي وجه عبود قريب منها كتير.

​لانا: "بيسان.. صارت منيحة؟"

​عبود (بـ حنية): "صارت منيحة بـ فضلك.. أنتي شو عملتي بـ حالك؟ ليش هيك ضغطتي على حالك؟"

​لانا: "لأني وعدتك.. ووعد الجراح دين."

​موبايل عبود بـ يرن.. رسالة فيديو فيها صورة المشفى من برا وعليها علامة "رصاص"

​الرسالة: "بيسان عاشت.. بس المشفى كبير، ولانا لساتها جوا."

​عبود (بـ عصبية): "غيث! حاصروا المشفى! ما حدا بيفوت ولا بيطلع إلا بـ أمري!"

​عبود بـ يقرر ينقل لانا وبيسان لـ مكان آمن (مشفى خاص بـ الفيلا تبعهم)

​لانا: "ما رح اترك شغلي عبود! ما فيك تحبسني بـ قصرك."

​عبود: "هي المرة مو حبس.. هي حماية. الروسي صار بـ غرفتك يا لانا، وما رح اسمح له يلمس شعرة منك."

​الإسعافات بتنقل لانا وبيسان تحت حماية موكب سيارات ضخمة. لانا بـ تطلع من شباك الإسعاف بـ خوف.

​لانا (بـ سرها): "دخلت لـ قلب الخطر بـ رجليّ.. يا ترى رح أقدر أطلع منه بـ سلام؟"