اليوم الثاني والعشرون

"الخيمة الرمضانية.. أضواء صاخبة وقلوب شاردة"

قررت "سلمى" و"عمر" أن يخرجوا عن المألوف اليوم، وألحّا على والدهما "عادل" الذي قطع اعتكافه ليوم واحد لظرف طارئ وعلى والدتهما "زينب" والجدة "هنية" لقضاء السهرة في إحدى "الخيم الرمضانية" الشهيرة على أطراف المدينة.

وصلوا إلى الخيمة، فاستقبلتهم الأضواء الساطعة، والموسيقى العربيه وأغاني رمضان الشهيرة التي تملأ المكان، والديكورات التي تحاول محاكاة "الحارة المصرية" بلمسات مخملية.

قالت سلمى وهي تلتقط "سيلفي" مع الفوانيس العملاقة: واو يا تيتا! شوفي الجمال، الخيمة روح تانيه خالص! دي أحلى مية مرة من قعدة البيت والمسلسلات. الناس هنا شيك، والأكل ريحته تجنن.

نظرت الجدة "هنية" حولها، رأت الدخان المتصاعد من "الشيشة" يختلط برائحة البخور، ورأت الشباب مشغولين بهواتفهم والضحك العالي يغطي على صوت "التواشيح" المسجلة.

عدلت شالها وقالت: والله يا بنتي، الخيمة دي فيها كل حاجة إلا رمضان. زمان يا سلمى، كانت الخيمة هي الصيوان اللي بيتنصب عشان القرآن والدعا. مكنش فيها 'دي جي' ولا أضواء ترقص على الحيطان. إحنا جينا هنا عشان نتسحر ولا عشان نتفرج على عرض أزياء ونشم الدخان؟

تدخل "عادل" وهو يحاول إيجاد مكان للجلوس وسط الزحام: يا حماتي، دي مظاهر بهجة، والناس عايزة تفك عن نفسها. وبعدين الخيمة دي بتجمع الناس مع بعضها، مش ده اللي إنتي دايماً بتنادي بيه؟ اللمة؟

ردت الجدة بضحكة ساخرة وحكمة عميقة: اللمة يا عادل هي إن القلوب تقرب، مش إن الكراسي تخبط في بعضها! بص حواليك يا ابني، كل واحد قاعد مع اللي معاه وباصص في تليفونه. الخيمة دي عاملة زي الفانوس الصيني بظبط، شكل من بره منور ومن جوه فاضي. رمضان يا ولاد شهر الخلوة، مش شهر الخروج. إحنا في العشر الأواخر، يعني المفروض نكون بنجري ورا ليلة القدر، مش بنجري ورا 'حجز طاولة' في خيمة!

قالت "زينب" وهي تنظر لقائمة الأسعار بذهول: يا خبر أبيض يا عادل! شوية فول وزبادي بتمن عزومة كاملة في البيت؟ دي الخيمة دي محتاجة قرض عشان نتسحر فيها! يا أمي عندك حق، دي خيمة الأسعار المهاجرة مش خيمة رمضانية!

ضحك "عمر" وهو يحاول تقليد رقصة "التنورة" التي بدأت تقدم عرضاً في وسط الخيمة، وقال: يا ماما، إنتي بتدفعي ث

تمن الأتموسفير! وبعدين يا تيتا، التغيير مطلوب، إحنا طول الشهر في البيت، لازم نشوف الدنيا بره عاملة إزاي.

ردت الجدة لهجة لاذعه: الدنيا بره يا واد يا عمر بقت تجارة بكل حاجة، حتى بالروحانيات. الخيمة الحقيقية هي اللي بتبنيها في قلبك، وتسكن فيها مع ربنا في هدوء. اللي عايز يحس برمضان بجد، يروح يقعد على رصيف جامع قديم، ويسمع صوت المبتهل وهو طالع من القلب، مش وهو طالع من سماعات بتهز الأرض. إحنا بقينا بنهتم بـ ديكور الصيام أكتر من الصيام نفسه.

نظر عادل للأجواء الصاخبة، ثم نظر للجدة، وأحس بصدق كلامها. قام من مكانه وقال: والله يا حماتي، لقمة البيت في هدوء، وصلاة ركعتين في سكون، أحلى من كل الدوشه والصداع ده. إحنا هنسحركم أحلى سحور، بس نرجع بيتنا، ونلحق ركعتين قبل الفجر في هدوء.. الخيمة دي طلعت دوشة على الفاضي. يلا بينا

سلمي: عندكوا حق والله الموضوع صعب وزحمه اوفر اوي

عمر: يلا بينا نمشي نروح احسن البيت اهدي من هنا بكتير

الرسالة المستفادة:

"رمضان رُوح تسكن البيوتَ.. لا ديكورٌ يملأُ الخيام." لا بأس من الترويح عن النفس، ولكن لا تجعلوا "المظاهر الرمضانية" الصاخبة تنسيكم جوهر الشهر وسكينته، خاصة في العشر الأواخر. الخيمة الحقيقية هي خيمة العبادة والذكر، واللمة الحقيقية هي التي تزيد من خشوعكم لا من تشتتكم. تذكروا أن البركة توجد في البساطة، وأن أثمن اللحظات هي التي تخلو فيها مع ربك، بعيداً عن أضواء "النيون" وضجيج "التريندات".

الخاتمة:

عادوا إلى البيت قبل الفجر بساعة. أعدت زينب طبق فول بسيط بـ "السمن البلدي"، وجلسوا جميعاً في البلكونة في هدوء تام.

قالت سلمى وهي تتنفس الصعداء: تصدقي يا تيتا؟ السكوت هنا له طعم أشيك بكتير من خيمة النص مليون اللي كنا فيها دي

ردت الجدة وهي تسبح بسبحتها: عشان هنا يا بنتي الملائكة هي اللي حاضرة، مش الجرسونات! كملوا سحوركم يا ولاد، وقوموا الحقوا نفحات الفجر، ده لسه فيه "وتر" مستني اللي يسجد ويطلب.

غمز عمر لعادل وقال: بس يا بابا، إنت وفرت تمن السحور في الخيمة، يعني العيدية السنة دي لازم تكون دبل!

ضحكت الجدة وقالت: ده إنت اللي دبل في الشقاوة يا واد يا عمر! كُل الزبادي وإنت ساكت. عشان تقومه تصلوا ركعتين قبل الفجر ما يأذن