#قصص_الأنبياء
#قصة_موسى(١)
#المولد_والنشأة
────────⊹⊱📜⊰⊹────────
قصتنا النهاردة عن نبي من أُولي العزم من الرسل،
وأولي العزم معناها الأنبياء إللي تعرضوا لأذى شديد من قومهم واتعرضوا لابتلاءات كثيرة في حياتهم وواجهوا الأذى والبلاء ده بالصبر،
وأولي العزم من الرسل هم أفضل الأنبياء والمرسلين على الإطلاق وهم خمسة : نوح وإبراهيم وموسى وعيسى ومحمد صلى الله عليه أجمعين😊
واحنا اتكلمنا عن نوح وإبراهيم عليهما السلام يبقى النهاردة هنتكلم عن موسى عليه السلام 😁
وهو اسمه موسى بن عمران من ذرية يعقوب عليه السلام،
وهو أكثر نبي مذكور في القرآن لأن قصته مليانة عِبر، ولأن أحداث أمته تتشابه كثيرا مع أحداث أمة الإسلام،
وموسى عليه السلام له علينا فضل كبير جدا إحنا المسلمين ،
لأن في رحلة المعراج لما ربنا فرض على رسول الله صلى الله عليه وسلم الصلاة وكانت خمسين،
قابل رسول الله صلى الله عليه وسلم موسى في السماء السادسة وسأله موسى عن إللي ربنا فرضه عليه فقاله فرض علي خمسين صلاة،
فموسى عليه السلام قاله إن أمتك مش هتستحمل اطلب من ربنا التخفيف فرسول الله صلى الله عليه وسلم استغرب ونظر إلى جبريل ...يعني هو ينفع أرجع لربنا وأسأله التخفيف، فجبريل عليه السلام قاله: نعم،
ففعلا استمر رسول الله صلى الله عليه وسلم يسأل ربنا التخفيف بسبب كلام موسى عليه السلام لحد ما وصلت لخمس صلوات،
فتخيلوا الناس بتصلي الخمس صلوات بالعافية فما بالنا لو كانت خمسين😶
طبعا كله بتقدير من ربنا بس هو بس كان سبب 😉
نرجع بالزمن شوية بقى😁
اتكلمنا قبل كده عن قصة يوسف عليه السلام وإنه قال لإخوته إنهم يأتوا بجميع أهلهم من البادية في فلسطين عشان يسكنوا مصر، وفعلا جاء يعقوب عليه السلام بأبنائه ال١١ كلهم وسكنوا مصر وكان الناس بيحسنوا إليهم إكراما ليوسف عليه السلام،
كان الملك إللي بيحكم مصر في عهد يوسف عليه السلام من الهكسوس، وكان الهكسوس محتلين مصر ساعتها،
فلما قام أحمس الأول بثورة وأخرج الهكسوس من مصر وبدأ عصر الفراعنة بدأوا يستعبدوا بني إسرائيل على أساس إنهم كانوا موالين ومتعاونين مع الهكسوس، وقعدوا في الظلم والقهر حوالي ٣٠٠ سنة،
وإسرائيل هو يعقوب عليه السلام، وزي ما قلنا قبل كده إن كلمة إيل في اللغة السريانية معناها الله وكلمة إسرا معناها عبد فتكون إسرائيل بمعنى عبد الله،
وبني إسرائيل هم ذرية يعقوب عليه السلام 😊
فكان الفراعنة إللي بيحكموا مصر بيستعبدوا بني إسرائيل يخلوهم يشتغلوا المهن الحقيرة واخدينهم عبيد يعني😅
في يوم من الأيام واحد من الفراعنة يُقال إنه رمسيس الثاني شاف رؤيا...شاف إن في نار تخرج من بيت المقدس وتنتشر في مصر بتصيب كل بيوت أهل مصر ماعدا بيوت بني إسرائيل مش بتيجي ناحيتهم،
فقام من النوم خايف😳...وجمع السحرة والكهنة والوزراء وبدأ يسألهم فقالوا له ده معناه إن في طفل هيتولد من بني إسرائيل وهيكون زوال ملكك على إيده👌
فطبعا خاف وأمر إن أي طفل يتولد لبني إسرائيل يُقتل على طول😤
الفرعون ده كان أشد الفراعنة قوة وبطش وظلم ...كان مفتري يعني😑
"إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا"
والفراعنة بصفة عامة كانوا بيقولوا إن في دمهم دم إلهي يعني نسبهم متصل بالإله، الفرعون ده بقى عداهم ...قال إنه هو ذات نفسه إله ورب😶
فاكرين لما قلنا قبل كده إن معظم الناس كانوا مؤمنين بتوحيد الربوبية يعني إن الكون ده له رب هو الخالق والرازق والمحي والمميت بس هم بيشركوا معاه آلهة تانية🤔
أهه فرعون بقى مش بس كفر بتوحيد الألوهية لأ ده كمان مش معترف بتوحيد الربوبية،
وبيقول إن هو الرب...يعني هو الخالق...حاجة كده آخر جنون يعني😅
"أَنَا رَبّكُمْ الْأَعْلَى "
فبدأ جنود فرعون يمشوا في الشوارع وأول لما يلاقوا طفل ذكر مولود ياخدوه كده ويذبحوه أو يقتلوه ويشوفوا غيره😶
طبعا حاجة بشعة...إحنا لما بنشوف طفل ميت عادي قلبنا بيتقطع عليه، ولا لو أم ابنها مات بعد ماتولد بتبقى روحها هتطلع😞
دول بقى كانوا ياخدوا الطفل الرضيع إللي لسه مولود ويذبحوه قصاد أمه وأبوه وأهله ويسيبوه ويمشوا،
ودول مش قادرين يعملوا لهم حاجة،
☆وطبعا المذابح إللي حصلت للأطفال بسوريا مش بعيد عننا، أكيد شفتم الأطفال الصغيرين ومنظرهم وهم مذبوحين😔
فده كان واقع بني إسرائيل...ذبح وقتل في الأطفال وياخدوا الرجال يشتغلوا بالسُّخرة..وياخدوا النساء يشتغلوا في قصور الأغنياء...حياة كلها ذل وقهر.
"يَسْتَضْعِفُ طَائِفَةً مِنْهُمْ يُذَبِّحُ أَبْنَاءهُمْ وَيَسْتَحْيِي نِسَاءهُمْ إِنَّهُ كَانَ مِنَ الْمُفْسِدِينَ"
لما الملأ بقى شافوا إن أعداد المواليد بدأوا يقلوا ومفيش أطفال ذكور ...لقوا إنه مع الزمن مش هيلاقوا حد يشتغل عندهم، فقالوا لفرعون كده مش هنلاقي حد يشتغل عندنا وهنضطر إننا إللي نشتغل...فقال خلاص هنقتل الأطفال عام ونسيبهم عام 😤
☆لا بتتعب والله🙄
وبدأوا بتنفيذ الأمر الجديد وبقى في عام للقتل والذبح وعام للمسامحة،
وفي فرق بين القتل والذبح، الذبح لازم يُراق فيه الدماء، وبيكون بقطع شرايين الرقبة، لكن القتل ممكن يكون بالحرق أو بالخنق مثلا.
حتى هنلاقي في القرآن آيتين بنفس الكلام ماعدا كلمتين القتل والذبح.
"يَسُومُونَكُمْ سُوءَ الْعَذَابِ *يُذَبِّحُونَ* أَبْنَاءَكُمْ وَيَسْتَحْيُونَ نِسَاءَكُمْ "
"يسُومُونَكُمْ سُوءَ الْعَذَابِ *يُقَتِّلُونَ* أَبْنَاءَكُمْ وَيَسْتَحْيُونَ نِسَاءَكُمْ"
فربنا بيقولنا إن جنود فرعون مخلوش😑 ذبح ماشي ...قتل بالحرق عادي...قتل بالخنق ميضرش...يعني وصلوا لأقصى درجات التجبر.
امرأة من بني إسرائيل تحمل🤰 وتولد ذكر 🤱ولكن تولده في عام المسامحة، فاطمنت وعدى الموضوع بسلام، وكان الطفل اسمه هارون.
وبعدها على طول حملت تاني 😱
طيب ميعاد الولادة هيكون في سنة الذبح😧
تعمل إيه😶...أخفت الحمل ...بقت تلف بطنها بقماش عشان ميبنش عليها حمل، لحد ما جت لحظة الولادة...ولقت المولود ذكر😳
جنود فرعون ممكن ييجوا في أي لحظة ...ولو شافوه هيذبحوه،
في اللحظة دي ربنا أوحى للمرأة دي بحاجة في وجهة نظر البشر تعتبر جنونية... والوحي هنا بمعنى الإلهام فربنا ألهمها إنها تحط ابنها في صندوق وترميه في النيل😳
"وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ "
طيب هي أصلا خايفة عليه من القتل إزاي ترميه في المية😐
ماهو ممكن في لحظة الصندوق يتقلب والولد يموت 😥
لو بصينا للموضوع هنلاقي إن الطفل لو فضل مع أمه هيموت بنسبة 💯% ...لكن لو حطته في صندوق في النيل في إحتمال إنه ميموتش، فهو ده الحل الوحيد دلوقتي.
فالأم أخذت ابنها الرضيع ورضعته وحطيته في سرير خشبي ..تابوت يعني، وحطت التابوت في النيل، أتى الجنود فتشوا... ملقوش أطفال عندهم سابوهم وراحوا يدوروا على بيت ثاني،
في الوقت ده كان التابوت بيتحرك في المية لحد ما وصل عند قصر الفرعون🙊
وخادمات القصر شافوا الصندوق إللي في المية ده وراحوا يشوفوا في إيه...سحبوا الصندوق وبيبصوا لقوا طفل صغير،
أخذوا الطفل وراحوا لزوجة فرعون عشان يقولوا لها على الطفل وكان اسمها آسية بنت مزاحم،
"فَالْتَقَطَهُ آلُ فِرْعَوْنَ لِيَكُونَ لَهُمْ عَدُوًّا وَحَزَنًا"
في الوقت ده الأم قلقانة وتفكيرها كله مع ابنها إللي مش عارفة مصيره إيه😥
يا ترى حد لقاه ...ياترى غرق في المية...ياترى الجنود شافوه وقتلوه...كان هاين عليها تخرج وسط الناس وتسأل عنه من كتر ما هي هتتجنن عليه، لكن ربنا هدأّها وطمأَن قلبها،
"وَأَصْبَحَ فُؤَادُ أُمِّ مُوسَى فَارِغًا إِنْ كَادَتْ لَتُبْدِي بِهِ لَوْلَا أَنْ رَبَطْنَا عَلَى قَلْبِهَا"
قالت لأخته الكبيرة روحي شوفيه ...دوري عليه...
وفعلا طلعت البنت ومشيت على طريق النيل لحد ما وصلت لقصر الفرعون وهي كانت بتشتغل هناك، فدخلت القصر لقت في حركة غريبة... بدأت تراقب من بعيد من غير ماحد ياخد باله...
"وَقَالَتْ لِأُخْتِهِ قُصِّيهِ فَبَصُرَتْ بِهِ عَنْ جُنُبٍ وَهُمْ لَا يَشْعُرُونَ"
سمعت إن الخادمات لقوا طفل رضيع في النيل والطفل عمال يبكي جعان وكل ما واحدة تيجي ترضعه يرفض إنه يرضع منها،
فهنا عرفت البنت إن ده أخوها...فدخلت عليهم وقالت لهم:
تحبوا أدلكم على ناس ياخدوا بالهم منه ويرضعوه وهم مش هيقصروا في رعايته؟
فقالوا لها وإنتي عرفتي منين إنهم هيهتموا بيه للدرجة دي🤨
فقالت لهم عشان عايزين يكونوا أصهار الملك وكمان عشان ينتفعوا بالأجرة،
فاقتنعوا وقالوا لها تروح تجيب المرأة إللي هي بتتكلم عنها دي.
"وَحَرَّمْنَا عَلَيْهِ الْمَرَاضِعَ مِنْ قَبْلُ فَقَالَتْ هَلْ أَدُلُّكُمْ عَلَى أَهْلِ بَيْتٍ يَكْفُلُونَهُ لَكُمْ وَهُمْ لَهُ نَاصِحُونَ"
☆طيب ليه الفرعون مقتلش الطفل الصغير دي😐
لأن زوجته آسية لما شافت الطفل حبته جدا ولما دخل عليها وشاف الطفل عرف إنه من بني إسرائيل من لون بشرته وملامحه وعرف إنه اتحط في التابوت عشان خافوا عليه من الذبح فأمر إنه يُقتل ،
فآسية قالت له لأ 😧 خليه قرة عين لي ولك... يفرحنا ويسعدنا ويمكن نتبناه
ففرعون قالها قرة عين ليكي إنتي أنا لأ😒
وكان فرعون بيحب آسية جدا فنزل على رغبتها ووافق إن الطفل لا يُقتل، ويُقال إن آسية سمّت الطفل الصغير ده موسى..طبعا مفيش دليل من القرآن والسنة على الكلام ده لكن المفسرين بيقولوه😚
راحت البنت وجابت المرأة إللي قالت لهم عليها وهي أم موسى عليه السلام، ولما رضعته قَبِل إنه يرضع منها فكل إللي في القصر فرحوا إن الطفل بدأ ياكل 😊
وطلبت آسية من المرأة إنها تفضل معاها في القصر عشان تراعي موسى عليه السلام فرفضت وقالت لها إن عندها زوج وأبناء فهي ممكن تاخده عندها في بيتها وترضعه وتراعيه، حاولت آسية تقنعها ...مفيش فايدة فوافقت آسية إن موسى عليه السلام يرجع مع المرأة إللي هي أمه ومحدش يعرف إنها أمه، وأمرت لها بأجرة زي مرتب شهري كده😚
"وَقَالَتِ امْرَأَةُ فِرْعَوْنَ قُرَّةُ عَيْنٍ لِي وَلَكَ لَا تَقْتُلُوهُ عَسَى أَنْ يَنْفَعَنَا أَوْ نَتَّخِذَهُ وَلَدًا"
☆محتاجين نقف هنا وقفة 😁
شايفين التحدي 👌 فرعون بقاله كم سنة عمّال يقتل في الأطفال عشان خايف من طفل واحد ...فإنت بتتحدى ربنا مثلا يعني😏
طيب إللي إنت خايف منه ده إنت إللي هتربيه وإنت إللي هتراعيه 👌
والأم إللي كانت خايفة منك على ابنها ،
هنجيبها عندك في القصر وهترضعه قصاد كووول إللي موجودين في القصر ومحدش هيقدر يمسها هي أو ابنها بأي أذى وإنت أولهم👌
ومش بس كده... ده الأم دي هتاخد الطفل وهتربيه عندها في البيت وإنت هتديها أجرة على كده كمان... وهيكونوا تحت حمايتك👌
بتقتل الأطفال عشان تثبّت مُلكك...بتستعبد الناس وتظلمهم وتقهرهم عشان تثبّت ملكك...طيب شوف إزاي ربنا هيهلكك بإيدك👌
أخذت أم موسى ابنها ورجعت للبيت وفضل موسى معاها خلال فترة الرضاعة كانت ساعات تجيبه لآسية عشان تشوفه،
"فَرَدَدْنَاهُ إِلَى أُمِّهِ كَيْ تَقَرَّ عَيْنُهَا وَلَا تَحْزَنَ وَلِتَعْلَمَ أَنَّ وَعْدَ اللَّهِ حَقٌّ وَلَكِنَّ أَكْثَرَهُمْ لَا يَعْلَمُونَ"
وبعد ما عدت السنتين طلبت آسية إن موسى عليه السلام يرجع للقصر عشان يعيش فيه كابن لفرعون وابن ليها وكانت آسية لا تُنجب،
وكانت في يوم من الأيام تلاعب موسى وهو صغير فأعطته لفرعون وحطته في حِجره، فموسى شد فرعون من لحيته بقوة فقال الملأ حواليه إن الطفل ده بيتوعده وه ده الطفل إللي هيكون سبب في زوال ملك فرعون،
فأمر إن موسى يُقتل، فآسية رفضت وقالت نختبره نجيب لؤلؤتين وجمرتين فلو اختار اللؤلؤ اقتلوه ولو اختار الجمر يبقى هو لا يعقل وشد لحيته زي ما الأطفال بتلعب،
وجابوا اللؤلؤ والجمر، فأخذ جبريل يد موسى عليه السلام ووضعها على الجمرتين،
فموسى أخذ جمرة وحطها في فمه فحرقت لسانه وسببت له لثغة، فقالت آسية لفرعون إنه لا يعقل زي ما شفتم فمحدش يقربله😤
📣قصة الجمر واللؤلؤ دي👆 يرويها عبد بن عباس رضي الله عنه لما كان بيفسر آية : "وفَتَنّاك فُتُونا"
تربى موسى عليه السلام ونشأ في بيت فرعون، القرآن مقلناش خلال الفترة دي إيه إللي حصل مع موسى عليه السلام، لكن أول ما بلغ مبلغ الشباب بدأ مجرى حياة موسى عليه السلام يتغير،
إيه إللي حصل غير مجرى حياته ؟
ده إللي هنعرفه الجزء الجاي إن شاء الله😁
#nawal samir
