_ دخلتلهم وقعدت وانا من جوايا عاوزه اصرخ و اعيط زي الاطفال بابا قال ... = نسيب الولاد يتكلموا شويه كلهم خرجوا وسابونا احنا الاتنين _ انا قاعده بصه ف الارض وعماله افرك ف ايديا ومش عارفه اقول ايه وبحاول امنع نفسي من العياط اتكلم بهدوء ... * هو الموضوع صعب اوي كده رفعت وشي وبصتله _ نعم !! * مالك ساكته ليه _ هاااه لا ابداً مفيش * مش عاوزه تسأليني اي سؤال _ بصراحه انا اول مره اتحط ف الموقف ده ف متوتره ومفيش ف دماغي حاجه * بس اللي انا شايفه غير كده استغربت _ قصدك ايه مش فاهمه ؟! قام من ع الكرسي و قربه وقعد قدامي * يعني باين من حركاتك انك متضايقه مش متوتره انا اتوترت ومش عارفه اقول ايه _ هاه لا لا طبعا و انا ايه اللي هيضايقني يعني * جايز عشان مش عاوزه القاعده دي تحصل مثلا يعني رافضه فكرة انه حد يجي يتقدملك انا مستغربه هو ازاي عرف _ بصيت ف الارض و مش عارفه ارد اقول ايه نفسي اقوله ايوه انا مش عاوزه غيره هو بس اللي يجي يتقدم و دموعي نزلت غصب عني رجع سند ضهره ع الكرسي و ربع ايده واتكلم بنفس الهدوء * في حد ف حياتك صح ؟ انا اسف ع تطفلي يعني بس حابب اتأكد _ هزتله راسي ب ايوه من غير ما ابصله * بيحبك ؟ اتكلمت بصوت مخنوق من الدموع اللي بحاول احبسها بس فشلت _ انا بحبه * باين طبعا انك بتحبيه جدا بس سؤالي هو بيحبك؟ _ هزتله راسي ب ايوه اتنهد ... * اتمني ذلك بس اللي بيحب حد ميسبهوش يضيع منه كده ويعرضه للمواقف دي _ اصل ظروفه الفتره دي .... قطع كلامي واتكلم ... * لا لا لا الظروف دي حجه احنا لو ف وقت تاني يسمح كنت حكتلك ع كمية اللغبطه و المشاكل والبلاوي اللي ف حياتي بس مع ذلك بدور ع بنت الحلال عشان انا محتاج شريك يسندني ويدعمني و يواجه معايا الظروف دي او ع الاقل يقويني اكتر ويخفف عني الحمل شويه ، فهو لو بيحبك فعلا و عاوزك و شاريكي عنده مليون حل عشان يخليكي تبقي ليه ومعاه ده لو عاوزك حقيقي اتنهد ... * اتمني تبقي الظروف اللي منعاه دي تبقي حقيقيه و قويه عشان لو غير كده انتي هتتعبي اوي _ انا دموعي نزله بهدوء و ساكته اتنهد ... * بصي يا وعد انا همشي وانتي هتقولي لأهلك انك هتفكري طبعا كده وكده وبعدين يومين و ارفضي حسيت كأن حجر و اتشال من ع قلبي مسحت دموعي وبصتله وابتسمت ابتسامه خفيفه و شكرته انه تفهم الموضوع بس بعيني قام وقف وابتسم ابتسامه جميله زيه وقفل زرار البدله و مدلي ايده وقال... * انا فخور اني قابلت شخص قلبه ابيض و نضيف زيك ف يوم من الايام _ انا سلمت عليه وقولته شكرا طلع كارت من جيبه و ادهولي * ده الكارت بتاعي ف كل ارقامي لو احتاجتي اي حاجه او اي مساعده ف اي وقت انا تحت امرك _ ابتسمتله و هزتله راسي بماشي وبعدها هو سلم ع اهلي وخد اهله ومشي و انا ماشيه و داخله اوضتي قولتلهم هفكر و ارد عليكوا عدا يومين وقولتلهم اني مش مرتاحه ورفضته كنت قاعده ف اوضتي بالليل وقولت اتصل ب سليم و افرحه - ........ الوو اول ما فتح وسمعت صوته ارتحت _ سولي ازيك - تمام يا وعد انتي عامله ايه _ انا بقيت كويسه - ليه كان مالك _ فاكر العريس اللي قولتلك جاي يتقدملي من يومين - اه حصل ايه _ رفضته انا عاوزاك انت و هفضل مستنياك لحد ما تجيلي سكت شويه ... - طيب يا وعد انا مشغول دلوقتي هخلص و اكلمك وقفل انا استغربت من رده اوي هو ليه مفرحش اني موافقتش ع العريس و هفضل مستنياه فضلت افكر طول الليل لحد ما نمت من التعب عدا اسبوع ... _ سليم بقاله فتره مكلمنيش ولا بيرد ع رسايلي لما اكلمه و اشوف ف ايه ....... اول مره مردش ف اتصلت تاني - .... الوو _ ايوه يا سليم فينك يابني بقالك كتير مكلمتنيش ومش بترد ع الرسايل ف ايه اتوتر وهو بيكلمني - ااا..ابدا يا وعد شوية مشاكل بس عندي انا اتخضيت _ مشاكل ايه يا سليم احكي فضل ساكت شويه - حصل شوية مشاكل ف الشغل وخسرت فلوسي و سيبته انا خوفت _ طيب المشاكل دي مش هينفع تتحل و ترجع الفلوس و الشغل - لا مش هينفع _ طب هتعمل ايه - هسافر كندا عند عمي و اشتغل معاه ف شركته خوفي زاد و دموعي نزلت _ يعني مش هتعرف تيجي تتقدملي الفتره دي اتنرفز عليا - يعني شوفي انا بقولك ايه يا وعد وانتي بتفكري ف ايه عياطي زاد _ وهتقعد قد ايه عند عمك - سنه انا شهقت _ مش كتير سنه انا كل يوم والتاني اهلي بيجيبولي عريس وانا كل شويه بطلعلهم بحجه شكل عشان ارفض و تعبت - اعمل ايه بس غصب عني استحملي هي سنه واحده بس اكون عملت مبلغ كويس وانزل اتقدملك و نتجوز ع طول يا حبيبتي انا عماله اعيط ومش بتكلم - متزعليش مني يا وعد _ تصبح ع خير يا سليم قفلت معاه وفضلت اعيط لحد ما نمت بعد سنه ، كنا راجعين انا و اختي من فرح بالليل لقيتها بتشاورلي ع حاجه " وعد مش ده سليم اللي ف العربيه اللي هناك دي انا بصيت ناحية ما بتشاور و ركزت لقيته سليم فعلا _ ايوه هو طب رجع من كندا امتي و ليه مكلمنيش ع طول " ايييييه ده ده ف واحده جنبه _ انا ركزت اكتر وشوفت فعلا واحده جنبه واتصدمت و دموعي نزلت روحت مطلعه الفون و اتصلت بيه اول ما شاف الفون اتوتر وبص للبنت اللي جنبه و كنسل، انا بقيت مش مصدقه عنيا رحت اتصلت بيه تاني اتوتر برضوا وتقريبا استأذن منها و نزل من العربيه وبعد عنها شويه و بعدين رد - .... الوو انا تماسكت شويه و رديت _ و..وحشتني يا سولي بص وراه ع العربيه عشان يطمن وبعدين رد عليا... - انتي اكتر يا حبيبتي طمنيني عليكي دموعي نزلت مش مصدقه انه بيكدب عليا وبيخوني خدت نفس عميق و رديت عليه... _ طول ما انت بعيد عني مش كويسه السنه خلصت مش هتنزل بقي - هانت يا حبيبتي انا حجزت الطياره ع الاسبوع الجاي _ بجد فرحتني طيب انت بتعمل ايه دلوقتي اتوتر وبيفكر يقول ايه - انا..اناا هنام اهو عشان اليوم كان طويل اوي النهارده وتعبت جامد انا فضلت اقرب منه لحد ما وقفت وراه _ طيب اتغطي كويس عشان متبردش لف وبصلي بصدمه - وعد ضحكت بسخريه _ ايوه وعد اللي بتضحك عليها و بتصدقك عشان بتحبك - وعد انتي فهمتي غلط انااااا كنت عاملهالك مفجأه صدقيني و كنت هجيلك بكرا ضحكت تاني _ والله واحده اتكلمت من ورايا × اتأخرت كده ليه يا سليم و وقفت جنبه وبصتلي من فوق لتحت × مين دي يا سولي وشه جاب الوان و اتوتر جااااامد - دي دي انا بتريقه قولتله _ ما تقولها انا مين يا سولي قال بصوت واطي - دي وعد ابتسمت × هاي وعد انا ياسمين مراته انا فتحت عيني و بوقي ع الاخر _ ايييه مراااته - اااااه اااا..ااصل اناااا انا فضلت اهز ف راسي يمين و شمال ومش مصدقه و دموعي عماله تنزل وبرجع لورا واحده واحده بعد كده لفيت و جريت - وووعد استنييي فضلت تضحك وبعد كده هو بصلها وبدء يضحك معاها × تمثيلنا كان هايل - فعلا مش عارف من غيرك كنت خلصت منها ازاي رجعت البيت مع اختي ودخلت ع اوضتي ع طول وقفلت الباب و اترميت ع السرير و انهارت ف العياط بعد وقت مش عارفه قد ايه جه ف دماغي يونس اخر عريس جه اتقدملي وادالي الكارت بتاعه قومت بالعافيه روحت عند التسريحه عيني جت ع المرايه لقيت عيوني منفوخين جدا من كتر العياط ومحمرين جامد فتحت درج التسريحه وطلعت منه الكارت ورجعت تاني قعدت ع السرير وفتحت الفون واتصلت برقم من ارقامه نفس الصوت الهادي رد... * .... الووو اول ما سمعت صوته فتحت ف العياط تاني واتكلمت _ انت كان كلامك صح الظروف دي كانت مجرد حجه عشان يبعد عني بس ، فعلا مطلعش بيحبني ولا عاوزني طول ال تلات سنين كان بيضحك عليا كان بيقضي شويه وقت بس مش اكتر ولما زهق من زني فضل يخترع ف الظروف عشان يبعدني عنه قالي هسافر سنه اشتغل مع عمي وبعدها هجيلك و نتجوز ع طول و شوفته النهارده ف الشارع مع بنت ولما كدبت عيني واتصلت بيه كان لسه بيكمل كدب عليا ولما روحتله و واجهته لقيت البنت و عرفت انها مراته اتجوز خلال السنه دي وكان بيضحك عليا وبيقول انه هيجي انه هيتقدملي ليه عمل فيا كده ليييييييييه ذنبي ايه انا وثقت ف وحبيته اوي والله وكنت مستعده اعمل اي حاجه عشانه ليه يعمل فيا كده كنت بتكلم بإنهيار _ اااااااااه ياااااربي حاسه قلبي هيقف من الوجع كان عندك حق انا دلوقتي تعبانه جامد اتكلم بهدوئه المعتاد * وعد ممكن تهدي وتسمعيني رديت عليه بصوت مبحوح _ نعم * ممكن تحمدي ربنا _ ع وجعي * طبعااااا ده خير ليكي _ طيب اسفه اني اتصلت بيك ف الوقت ده و ازعجتك بس انت جيت ع بالي فجأه ولقتني بكلمك شكرا انك سمعتني و اسفه ع الازعاج سلام * وعد وعد استني اسمعيني انا مخلصتش كلامي لسه _ اتفضل * ده درس و ربنا ادهولك يا وعد صحيح هو درس قاسي شويه بس عشان تتعلمي انه مينفعش تثقي ف اي حد كده لمجرد انه قالك بحبك و هتقدملك طالما ما عملش فعل يبقي متصدقيهوش ولازم تفكري بعقلك مش بقلبك طول الوقت وازني بين الاتنين عشان تعرفي انتي عاوزه ايه و تقرري ومش اي عيل يلعب بيكي كده وعد انتي غاليه وتستحقي يتعافر عشانك سبيهم هما اللي يحفوا وراكي مش انتي اللي تتذللي ليهم انتي ملكه تقعدي ع عرشك كله تحت رجلك وانتي اللي تتشرطي وتختاري اللي يناسبك يا وعد صوني نفسك وربنا هيبعتلك نصيبك لحد عندك ومحدش هيقدر يمنعه انا كده خلصت كلامي وعندي طلب ياريت بعد ما تقفلي معايا تقومي تتوضي وتصلي ركعتين شكر لله وبعدين تنامي ع طول هترتاحي والله وكل التعب اللي حاسه بيه ده هيروح ممكن كنت بسمعه و دموعي نزله بهدوء ومش هنكر ان كلامه هداني شويه _ حاضر * سلام يا وعد وهطمن عليكي بكرا _ سلام ، قومت دخلت الحمام و فضلت اغسل وشي كتير بالميه و بعدين اتوضيت زي ما طلب و خرجت لبست الاسدال وبدأت اصلي و كنت بعيط جامد و ف السجود مفيش ع لساني غير يارب خلصت وكنت عاوزه اقوم بس خلاص رجليا مش شيلاني ونمت مكاني عدا يوم والتاني و شهر والتاني و التالت و طول الفتره دي يونس مكانش سايبني كان ع طول يا عندنا ف البيت يا مخرجني وبيفسحني ولو يوم مجاش بيفضل معايا ع الفون لحد ما انام وبقينا قريبين جدا جدا من بعض وقدر يخليني اتخطي سليم وانساه تماماً و كمان ف شئ اتحرك جوايا تجاهه بس خليته جوايا و ف يوم لقيت اختي دخلالي الاوضه و كنت بكلم يونس فون " وعد وعد عاوزاكي ف موضوع مهم ضروري _ طيب معلش يا يونس معلش هقفل معاك دلوقتي عشان اشوف الرخمه دي عاوزه ايه و هكلمك تاني ضحك * ماشي يا قمري براحتك قفلت معاه وبصتلها _ افندم خير " بابا و ماما قالولي اعرفك ان ف عريس جاي بعد بكرا عشان يشوفك قلبي وجعني عريس يعني خلاص كده يونس مجرد حلم بس هو حلم وبعيد اوي كمان لأن انا بس اللي عندي مشاعر ناحيته اتنهدت _ ماشي و انا جاهزه اقعد معاه ، بعد ما اختي خرجت انا قعدت حزينه شويه كده وبفكر ف حظي اللي مش بينصفني خالص ولقيت يونس بيتصل فتحت * ايه يا بنتي كل ده رغي ما انتو قاعدين ف وش بعض ع طول رديت بحزن _ معلش لسه مخلصين كلام * طيب صوتك حزين ليه مالك _ ابدا متقدملي عريس و هيجي بعد بكرا * بجد ده خبر حلو اوي ايه اللي مزعلك بقي وعد اوعي تكوني بتحبي حد تاني اتكلمت بسرعه _ لا لا والله ما بحب حد غيرك لحقت نفسي بسرعه _ قصدي قصدييي يعني كأصدقاء وبعدين ما انت عارف ان مفيش حد ف حياتي انا بس حاسه نفسي مش جاهزه للخطوه دي دلوقتي * طيب اسمعي كلامي و اقعدي معاه بس وبعد كده اللي انتي عاوزاه هيحصل اتنهدت _ حاضر يا يونس * حضرلك الخير يا قمري يلا بقي عشان تنامي _ وانت هتنام * ايوووون يلا تصبحي ع خير _ وانت من اهل الخير يوم مقابلة العريس _ بعد ما لبست و جهزت مسكت الفون وفتحت صورة يونس وبدأت دموعي تنزل مش معقول كل ما احب حد يبعد عني عارف انا عرفت الحب ع ايدك انت التجربه اللي كنت فيها دي مكانتش حب خالص انا حسيت بالامان معاك انت ومش هقدر احسه مع حد تاني صدقني انا عاوزه اكمل حياتي معاك انت ياربي اعمل ايه بس اختي دخلت " يلا يا وعد بابا عاوزك برا لقتني بعيط " ف ايه يا عد مالك يا حبيبتي _ انا خايفه " من ايه بس _ ارجوكي ساعديني و اتصرفي انا مش عاوزه اخرج قوليلهم اني تعبانه " مينفعش يا وعد كده _ عشان خاطري انا مش عاوزه العريس ده مش عاوزه اتجوز دلوقتي " طب طب اهدي يا حبيبتي بس متخافيش انتي اخرجي شوفيه واتكلمي معاه وبعدها اللي انتي عاوزاه هو اللي هيحصل والله ومحدش هيجبرك ع حاجه مسحت دموعي _ حاضر ، وخرجت معاها ودخلتلهم و انا بصه ف الارض وقعدت جنب بابا وبعدين لقيتهم كلهم بيخرجوا ويسيبوني و انا لسه بصه ف الارض سمعت صوته الهادي اللي بينعش قلبي * مش عاوزه تشوفيني يعني رفعت راسي بدهشه _ يونس ! انت هنا امال فين العريس فضل باصصلي ومبتسم و انا فضلت متنحه شويه لحد ما استوعبت وبعدين شهقت _ انت ال.... * العريس ايوه دموعي بدأت تنزل _ ليه عملت فيا كده ليه مقولتليش قام و جه قعد قدامي ع الارض * حبيت اعملهالك مفجأه _ مفجأتكوا دي هتقضي عليا والله ، طب انا كنت بفكر انتحر هتعمل ايه بقي لو كنت انا انتحرت * كنت موت نفسي بعدك ع طول حطيت ايدي ع بوقه بخوف _ بعيد الشر اوعي تقول كده تاني حط ايده ع ايدي وباسها * بحبك دموعي زادت بس المره دي من الفرحه _ ليه معرفتنيش من بدري اتنهد * محبتش اعمل كده عشان متفهمنيش غلط قولت خليني معاكي لحد ما تبقي قادره تاخدي قرار لكن انا حبيتك من اول مره شوفتك فيها زعلت جدا لما عرفت ان ف حد ف حياتك و زعلت اكتر عليكي عشان حرام ملاك طاهر زيك يتعامل بالطريقه الرخيصه ، كنت بدعي ليل ونهار انك تبقي ليا ومن نصيبي و الحمدلله ربنا استجاب لي _ حطيت ايدي ع وشي وفضلت اعيط جامد باس راسي وبعدين شال ايدي ومسح دموعي و ابتسم وصلي بحب * دموعك دي غاليه عندي جدا وخدت عهد ع نفسي اني مش هخليها تنزل تاني وبوعدك دلوقتي تاني ان مش هخلي دموعك تنزل لا بسببي ولا بسبب غيري خلاص يا وعدي مبسوطه _ ده اكتر وقت انا طايره من الفرح ف * وعد تاني اني هخليكي دايما مبسوطه و طايره من الفرح قولتلك قبل كده انتي ملكه تقعدي ع عرشك و كله تحت رجلك وانتي تختاري اللي يناسبك تقبلي يا ملكتي اني انول شرف مشاركتك لحياتي للابد كنت بضحك و فرحانه من قلبي بجد _ موافقه كمان انك تبقي التاج اللي هيتحط ع راس ملكتك كلهم دخلوا و ماما واختي واخته بيزغرطوا و بابا دخل بالمأذون عشان يتكتب كتابنا انا مكنتش مصدقه ومصدومه لقيت يونس مسك ايدي وروحنا قعدنا جنب المأذون وكتبنا الكتاب بارك الله لكما و بارك عليكما وجمع بينكما في خير وسط فرحة اللي حوالينا و احتفالهم بينا يونس قام وقف قدامي وخدني ف حضنه وانا حضنته جامد * بحبك يا وعدي . اڪتفيت بڪ وطناً فلا امان غيرك🫀✨ تمت بقلمي/إيمان أحمد
